Սահմանվել են Իրանից ԵԱՏՄ գյուղմթերքի անմաքս ներմուծման քվոտաները

Եվրասիական տնտեսական հանձնաժողովը (ԵՏՀ) 2025 թվականի համար քվոտաներ է սահմանել Իրանից ԵԱՏՄ երկրներ մի շարք գյուղատնտեսական արտադրանքների անմաքս ներմուծման համար: Տեղեկությունը հայտնում է ԵՏՀ մամուլի ծառայությունը։

«2025 թվականի համար սահմանել ԻԻՀ-ի ծագում ունեցող և Եվրասիական տնտեսական միության անդամ պետությունների տարածքներ ներմուծվող ապրանքների առանձին տեսակների նկատմամբ սակագնային քվոտաների ծավալները՝ համաձայնագրին համապատասխան»,- նշված է կոլեգիայի որոշման մեջ, որը կայացվել է մարտի 11-ին:

Ըստ այդ որոշման՝ անդամ պետության լիազոր մարմնի կողմից տրված լիցենզիայի առկայության և համաձայնագրով սահմանված ազատ առևտրի ռեժիմի տրամադրման պայմանների պահպանման դեպքում կիրառվում է ներմուծման մաքսատուրքի զրոյական դրույքաչափ։

Սակայն սակագնային արտոնությունների սահմանված ծավալներից ավել ապրանք ներմուծելու կամ ազատ առևտրի ռեժիմի տրամադրման պայմանները չպահպանելու դեպքում կկիրառվեն ԵՏՀ կոլեգիայի որոշմամբ սահմանված ներմուծման մաքսատուրքերի դրույքաչափերը։

ԵՏՀ որոշման հավելվածի համաձայն՝ Հայաստանի, Ղրղզստանի, Բելառուսի, Ղազախստանի և Ռուսաստանի Դաշնության համար թռչնամսի և ենթամթերքի ներմուծման քվոտան կազմում է 5 հազար տոննա:

Կարտոֆիլի ներմուծման սակագնային արտոնությունները.

Հայաստանի համար՝ 53 տոննա,

Բելառուսի համար՝ 157 տոննա,

Ղազախստանի համար՝ 1 021 տոննա,

Ղրղզստանի համար՝ 1 տոննա,

Ռուսաստանի Դաշնության համար՝ 18,768 հազար տոննա։

Թարմ կամ սառեցված լոլիկի ներմուծման արտոնությունները․

Հայաստանի համար՝ 364 տոննա,

Բելառուսի համար՝ 4,729 հազար տոննա,

Ղազախստանի համար՝ 1,022 հազար տոննա,

Ղրղզստանի համար՝ 125 տոննա,

Ռուսաստանի համար՝ 26,76 հազար տոննա:

Հավելվածում նշված են նաև կաղամբի, գազարի, բազուկի, նեխուրի, բողկի, վարունգի և կորնիշոնի, խնձորի և պահածոյացված լոլիկի ներմուծման քվոտաները:

Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանն ու Ղրղզստանը: