Նուբարաշենի Հոգեկան առողջության պահպանման ազգային կենտրոնից փախուստի դիմած տղամարդկանցից մեկը հայտնաբերվել է։ Տեղեկությունը հայտնեցին ՀՀ Ներքին գործերի նախարարության մամուլի ծառայությունից։

«Մեկին հայտնաբերել են Նուբարաշենի գերեզմանատան մոտ, ձեռնարկվում են միջոցառումներ մյուսին հայտնաբերելու ուղղությամբ»,- հայտնեցին ՆԳՆ-ից։

Ավելի վաղ հայտնել էինք, որ Նուբարաշենի հոգեբուժարանից 2 հարկադիր բուժվող փախուստի է դիմել։ Ոստիկանությունը փախուստի մասին ահազանգը ստացել է գիշերը՝ 01։20-ի սահմաններում։ Shamshyan.com-ի տեղեկություններով՝ տղամարդիկ փախուստի են դիմել հիվանդասենյակի պատուհանի ճաղավանդակը պոկելու միջոցով։ Ըստ կայքի՝ մեկը հարկադիր բուժվող, Երևանի բնակիչ 45-ամյա Վյաչեսլավ Լուկինն է, մյուսը` Արմավիրի մարզի բնակիչ 35-ամյա Արամայիս Միրզոյանը, որը դատարանի որոշմամբ նշված կենտրոն է տեղափոխվել որպես անվտանգության միջոց։