Այս պահի դրությամբ ՀՀ–ում կենսաթոշակային ֆոնդերի` գնաճով ճշտգրտված եկամտաբերությունը կազմում է մոտավորապես 7 տոկոս։ Ազգային ժողովի նիստի ժամանակ այս մասին ասաց ՀՀ կենտրոնական բանկի նախագահ Մարտին Գալստյանը։

«Մենք բավականին նորմալ եկամտաբերություն ունենք։ Մեր հաշվարկներով` եթե մարդը սկսել է աշխատել, ենթադրենք, 20 տարեկանից ու 63–65 տարեկանում գնալու է թոշակի, ի տարբերություն մեր ծնողների, որոնք այսօր ստանում են ցածր թոշակ, մենք ունենալու ենք թոշակ, որը համապատասխանելու է մոտավորապես մեր վերջին աշխատավարձի 40 տոկոսին»,– վստահեցրեց ԿԲ նախագահը։

Նա հիշեցրեց, որ օրենքով կենսաթոշակային ֆոնդերն առկա միջոցների 10 տոկոսն ուղղում են ՀՀ տնտեսության իրական հատված։

Հիշեցնենք` ՀՀ–ում 2 կուտակային ֆոնդ է գործում` «ԱՄՈւՆԴԻ–ԱԿԲԱ ասեթ մենեջմենթ» ՓԲԸ–ն և «Ցե–կվադրատ ամպեգա ասեթ մենեջմենթ Արմենիա» ՍՊԸ–ն։