ԱՄՆ-Իրան բանակցությունների երկրորդ փուլը տեղի կունենա ապրիլի 19-ին Հռոմում. այս մասին գրել է Axios-ը՝ վկայակոչելով իրավիճակին ծանոթ երկու աղբյուրի:

Ավելի վաղ Իրանի արտգործնախարար Աբբաս Արաղչին հայտարարել էր, որ երկխոսությունը տեղի կունենա Օմանում։

Աղբյուրների համաձայն՝ բանակցությունների անցկացման վայրի փոփոխությունն առաջարկել է ամերիկյան կողմը։ Թեև բանակցությունների երկրորդ փուլը Օմանում չի կայանա, սակայն ներկա կլինեն Օմանի միջնորդները։

Բանակցությունների նախորդ փուլն անուղղակի էր, երկու երկրների ներկայացուցիչները նստած էին առանձին սենյակներում, մինչդեռ Օմանի դիվանագետները հաղորդագրություններ էին փոխանցում կողմերի միջև: Այժմ Axios-ի աղբյուրները հայտնել են, որ հաջորդ բանակցությունները կարող են տեղի ունենալ արդեն նույն սենյակում նստած իրանցի և ամերիկացի պաշտոնյաների հետ:

Axios-ի մեկ այլ աղբյուր ասել է, որ երկու գլխավոր բանակցողները՝ ԱՄՆ-ի նախագահի հատուկ բանագնաց Սթիվ Ուիթքոֆը և Իրանի արտաքին գործերի նախարար Աբբաս Արաղչին, շաբաթ զրուցել են մոտ 45 րոպե: Զրույցը եղել է «իմաստալից, լուրջ», ասել է աղբյուրը:

Ապրիլի 12-ին Օմանում կայացել է ԱՄՆ-Իրան բանակցությունների առաջին փուլը, որը տևել է ավելի քան երկուսուկես ժա. կողմերը կարծիքներ են փոխանակել Իրանի միջուկային ծրագրի և Իրանի դեմ պատժամիջոցների չեղարկման հարցի շուրջ։