Օտարերկրյա քաղաքացիները, որոնք կորցրել են  Ռուսաստանում գտնվելու օրինական հիմքը, կարող են անարգել կարգավորել երկրում իրենց իրավական կարգավիճակը մեկ օրվա ընթացքում, սեպտեմբերի 11-ից այդ հնարավորությունն արդեն չի լինի, նրանց կսկսեն արտաքսել երկրից: «Արմենպրես»-ի փոխանցմամբ՝ այդ մասին ՏԱՍՍ-ին հայտնել են Ռուսաստանի արտաքին գործերի նախարարությունից:

Գերատեսչությունից պարզաբանել են, որ սեպտեմբերի 10-ին լրանում է ՌԴ նախագահի հրամանագրի գործողության ժամկետը, որը երկրում մնալու համար օրինական հիմքը կորցրած օտարերկրյա քաղաքացիներին հնարավորություն է ընձեռում կարգավորելու իրենց իրավական կարգավիճակը:

«Սեպտեմբերի 11-ից հիշյալ օտարերկրյա քաղաքացիների նկատմամբ մինչև  Ռուսաստանի սահմաններից նրանց արտաքսումը կկիրառվեն առանձին իրավունքների, այդ թվում՝ ապագայում Ռուսաստան մուտքի սահմանափակման՝ օրենքով նախատեսված բոլոր միջոցները», – նշել են գերատեսչությունում:

Սեպտեմբերի 11-ից օրինազանց օտարերկրացիներին կարգելվի գրանցել ամուսնությունը կամ ձևակերպել ամուսնալուծությունը, նրանք չեն կարողանա երեխաներին տեղավորել մանկապարտեզներում կամ ուսումնական հաստատություններում, վարել տրանսպորտային միջոց, ստանալ այլ ծառայություններ, որոնք անհրաժեշտ են յուրաքանչյուր մարդու առօրյա կյանքում։

Իսկ ՌԴ ներքին գործերի նախարարությունում հիշեցրել են, որ օրինազանց օտարերկրացիները կարգավիճակի կարգավորման համար կարող են դիմել նախարարության՝ փաստական բնակության վայրի անձնագրային-այցագրային կենտրոն կամ նախարարության միգրացիայի հարցերով տարածքային մարմինների մոտակա ստորաբաժանում, Մոսկվայում՝ «Սախարովո» բազմաֆունկցիոնալ միգրացիոն կենտրոն: