Իսրայելի վարչապետ Բենիամին Նեթանյահուի գլխավորությամբ երկրի ռազմաքաղաքական ղեկավարությունը չորեքշաբթի այցելել է Սիրիա: Այցը տեղի է ունեցել ԱՄՆ-ի՝  Իսրայելի և Սիրիայի միջև անվտանգության համաձայնագրին հասնելու ջանքերի և բանակցությունների փակուղոմ հայտնվելու պայմաններում, հաղորդում է Kan պետական ​​հեռուստառադիոընկերությունը:

«Վարչապետ Բենիամին Նեթանյահուն և պաշտպանության նախարար Իսրայել Կացն այսօր այցելել են Սիրիա: Նրանք ունկնդրել են տարածաշրջանում ստեղծված իրավիճակի վերաբերյալ ճեպազրույցներ: Այցը տեղի է ունեցել Իսրայելի և Սիրիայի միջև անվտանգության համաձայնագրի հասնելու՝ ԱՄՆ ջանքերի ֆոնին: Այցելությանը մասնակցել են նաև արտգործնախարար Գիդեոն Սաարը, Իսրայելի պաշտպանության բանակի շտաբի պետ Էյալ Զամիրը և Շին Բեթի հրամանատար Դավիթ Զինին», - նշված է Kan-ի կայում զետեղված հաղորդագրությունում:

Պետական ​​հեռարձակողի տվյալներով՝ իսրայելական աղբյուրները հայտնել են, որ բանակցությունները ներկայում փակուղում են: Դա պայմանավորված է նրանով, որ Իսրայելը չի ​​ցանկանում ընդունել Սիրիայի անցումային նախագահ Ահմեդ ալ-Շարաայի պահանջը՝ իսրայելական զորքերը դուրս բերելու բոլոր այն դիրքերից, որոնք իսրայելական բանակը գրավել է Սիրիայի հարավում նախկին նախագահ Բաշար ալ-Ասադի անկումից հետո: Աղբյուրները պնդում են, որ Իսրայելն այս դիրքերից մի քանիսից կհեռանա միայն Սիրիայի հետ լիարժեք խաղաղության համաձայնագրի, այլ ոչ թե անվտանգության համաձայնագրի դիմաց։ Սակայն, Kan-ը նշում է, որ նման համաձայնագիր ներկայում տեսանելի չէ։

Նոյեմբերի սկզբին Սիրիայի ԱԳՆ-ն, նախագահ ալ-Շարաայի Վաշինգտոն այցից հետո, հայտարարել էր, որ Միացյալ Նահանգներն աջակցում է Իսրայելի և Սիրիայի միջև անվտանգության համաձայնագրի կնքմանը՝ տարածաշրջանային անվտանգության համար։ Ալ-Շարաան ինքը ավելի ուշ Washington Post-ին տված հարցազրույցում նշել էր, որ Դամասկոսն ու Թել Ավիվն առաջընթաց են գրանցել անվտանգության համաձայնագրի հասնելու բանակցություններում։

2024 թվականի վերջին Սիրիայում իշխանության փոփոխությունից և Ահմեդ ալ-Շարաայի գլխավորությամբ նոր վարչակազմի հաստատումից հետո, Իսրայելի բանակը գրավեց անվտանգության բուֆերային գոտի Սիրիայի հարավում՝ Գոլանի բարձունքներում և մի շարք ավիահարվածներ հասցրեց՝ Բաշար ալ-Ասադի նախկին բանակի մարտական ​​ներուժը ոչնչացնելու համար։ Իսրայելի իշխանություններն այս գործողությունները բացատրեցին Գոլանի բարձունքներում գտնվող իրենց հյուսիսային քաղաքների և բնակավայրերի անվտանգային շահերով, ինչպես նաև Դամասկոսի նոր իշխանությունների ձեռքում մեծ քանակությամբ զենքի և ռազմատեխնիկայի հայտնվելը կանխելու անհրաժեշտությամբ։