Եվրամիությունը հաստատել է, որ մտադիր չէ Իսրայելի տարածք համարել Գոլանի բարձունքները։ Այս մասին ասվում է ԵՄ արտաքին գործերի եւ անվտանգության քաղաքականության գլխավոր հանձնակատար Ֆեդերիկա Մոգերինիի հայտարարությունում, տեղեկացնում է ՏԱՍՍ-ը։
«Եվրամիության դիրքորոշումը Գոլանի բարձունքների կարգավիճակի վերաբերյալ չի փոխվել։ Միջազգային նորմերին եւ ՄԱԿ ԱԽ 242 եւ 497 բանաձեւերին համապատասխան՝ Եվրամիությունը չի ճանաչում իսրայելական ինքնիշխանությունը օկուպացված Գոլանի բարձունքների հանդեպ»,- ասվում է փաստաթղթում։
Գոլանի բարձունքների վերաբերյալ ԵՄ դիրքորոշման անփոփոխության մասին հայտարարել է նաեւ Եվրախորհրդի նախագահ Դոնալդ Տուսկը մարտի 21-22-ի գագաթաժաղովի արդյունքների հիման վրա։
«Մենք չենք քննարկում այդ հարցը, բայց ԵԽ դիրքորոշումը հայտնի է եւ այն չի փոխվել»,- ասել է Տուսկը։
ԱՄՆ նախագահ Դոնալդ Թրամփը մարտի 25-ին ճանաչել է Իսրայելի ինքնիշխանությունը Գոլանի բարձունքների հանդեպ։ ՄԱԿ-ը 1967-ից համարում է, որ այդ տարածքի մի մասը օկուպացվել է իսրայելական զորքերի կողմից։
0Comments