Օհայո նահանգի Գրով Սիթի քաղաքում հնգամյա Ադրիանը կարևոր դեր է խաղացել մոր վրա հարձակված տղամարդու ձերբակալման գործում: Միջադեպի մասին գրել է 19 News-ը։

Դեպքը տեղի է ունեցել մթերային բանկի մոտ, որտեղ Չեյսիթի Ուորիքն իր երեք երեխաների հետ օգնություն էր ստանում։ 20-ամյա Շալիկ Բինգը, որը ավելի վաղ մեղադրվել էր ավտոմեքենայի գողության մեջ, մոտեցել է կնոջը, հարվածել նրա դեմքին, խլել նրա բանալիները և փորձել է փախցնել նրա ավտոմեքենան։ 

Երեխաները հետապնդել են կողոպտչին։ Հնգամյա Ադրիանն առաջինն է հասել հարձակվողին և կարողացել է հարվածել նրան, խլել բանալիները և վերադարձնել մորը։ Ոստիկանությունը կարճ ժամանակ անց ձերբակալել է Բինգին։ 

«Երեխաները վազեցին նրա հետևից և հետ բերեցին բանալիները։ Ոստիկանությունն անմիջապես դրանից հետո ձերբակալել է հանցագործին»,- պատմել է տիկին Ուորիքը։ Լեյտենանտ Ջեյսոն Ստեռնը նշել է, որ թեև երեխաները չպետք է մեն-մենակ հետապնդեն հանցագործներին, Ադրիանի քաջությունը հարգանք է ներնչում։ «Երբ տեսնում ես՝ ինչպես է փոքրիկ երեխան հանցագործին ասում՝ «Դա իմ մայրն է, քեզ չի հաջողվի նրան վնասել», շատ տպավորիչ է»- ասել է ոստիկանության լեյտենանտը։