Անցած շաբաթվա ընթացքում իմ թիմը հսկայական առաջընթաց է գրանցել Ռուսաստանի և Ուկրաինայի միջև պատերազմի ավարտի հարցում (Պատերազմ, որը երբեք չէր սկսվի, եթե ես նախագահ լինեի): Այս մասին X-ի իր էջում գրել է ԱՄՆ նախագահ Դոնալդ Թրամփը։

«Անցյալ ամիս 25,000 զինվոր զոհվեց: Միացյալ Նահանգների կողմից մշակված 28 կետից բաղկացած խաղաղության ծրագիրը կատարելագործվել է՝ երկու կողմերի լրացուցիչ մասնակցությամբ, և մնացել են միայն մի քանի անհամաձայնության կետեր: Այս խաղաղության ծրագիրն ավարտին հասցնելու հույսով ես հանձնարարել եմ իմ հատուկ դեսպանորդ Սթիվ Ուիթքոֆին հանդիպել ՌԴ նախագահ Պուտինի հետ Մոսկվայում։

Միևնույն ժամանակ բանակի քարտուղար Դեն Դրիսկոլը կհանդիպի ուկրաինական կողմի հետ: Ես տեղյակ կլինեմ գրանցված ողջ առաջընթացի մասին՝ փոխնախագահ Ջեյ Դի Վենսի, պետքարտուղար Մարկո Ռուբիոյի, ռազմական նախարար Փիթ Հեգսեթի և Սպիտակ տան աշխատակազմի ղեկավար Սյուզի Ուայլսի հետ միասին: Հուսով եմ՝ շուտով կհանդիպեմ Զելենսկու և Պուտինի հետ, բայց միայն այն ժամանակ, երբ այս պատերազմի ավարտի համաձայնագիրը վերջնական լինի կամ գտնվի իր վերջնական փուլում:

Շնորհակալություն այս շատ կարևոր հարցի նկատմամբ ձեր ուշադրության համար, և եկեք բոլորս հուսանք, որ խաղաղությունը կհաստատվի որքան հնարավոր է շուտ։