Քանի դեռ Հայաստանի Սահմանադրություն չի փոփոխվել, խաղաղության պայմանագրի ստորագրումն անհնար է. այս մասին թուրքական Անադոլու գործակալությանը տված հարցազրույցում ասել է Ադրբեջանի ԱԳ նախարար Ջեյհուն Բայրամովը:

«2022 թվականի առաջին ամիսներին Հայաստանին ներկայացվել է խաղաղության պայմանագրի հինգ հիմնական կետ, իսկ նույն թվականի հոկտեմբերին սկսվել են քննարկումները երկու երկրների միջև։ Խաղաղության պայմանագրի առաջին նախագիծը կազմել է ադրբեջանական կողմը և ներկայացրել Հայաստանին։ Բանակցությունները տևել են մոտ երկուսուկես տարի։ Մեկ ամիս առաջ քննարկումներն ավարտվել են, տեքստի շուրջ համաձայնություն է ձեռք բերվել։ Կան կարևոր հարցեր, որոնց պետք է լուծել: Դրանցից ամենակարևորը Հայաստանի Սահմանադրության մեջ Ադրբեջանի նկատմամբ տարածքային պահանջների առկայությունն է։ Քանի դեռ այսպես շարունակվում է, խաղաղության պայմանագրի ստորագրումն անհնար է։ Հայաստանի Սահմանադրության փոփոխությունն անհրաժեշտ է», - ասել է ադրբեջանցի պաշտոնյան:

Բայրամովը հավելել է, որ Ադրբեջանի մեկ այլ պայման էԵԱՀԿ Մինսկի խմբի լուծարումը:

«ԵԱՀԿ Մինսկի խումբը 30 տարվա ընթացքում ոչ մի արդյունքի չի հասել։ Ղարաբաղի հարցն արդեն լուծված է, և այդ տարածքները Ադրբեջանի կազմում են։ Հայաստանը նույնպես դա ճանաչել է։ Նման իրավիճակում Մինսկի խմբի գործունեությունը շարունակելու Հայաստանի շարունակական ջանքերը մեզ համար հարցեր են առաջացնում։ Մենք համառորեն պահանջում ենք Մինսկի խմբի լուծարում», - ասել է նա:

Հայ-թուրքական երկխոսությունը վերաբերում է ոչ միայն դիվանագիտական ​​հարաբերությունների պաշտոնական հաստատմանը և սահմանի բացմանը, այլև լայնածավալ առևտրին. այս մասին, TRT-ի փոխանցմամբ, Անթալիայում միջազգային դիվանագիտական ֆորումի շրջանակում Թուրքիայի ԱԳ նախարար Հաքան Ֆիդանի հետ հանդիպումից հետո ասել է ՀՀ ԱԳ նախարար Արարատ Միրզոյանը:

«Մենք երկուսս էլ հասկանում ենք, որ վերջնական նպատակը հարաբերությունների լիարժեք կարգավորումն է, ներառյալ դիվանագիտական ​​հարաբերությունների հաստատումը և ամբողջ սահմանի բացումը։ Մեր երկխոսությունը վերաբերում է ոչ միայն դիվանագիտական ​​հարաբերությունների պաշտոնական հաստատմանը և սահմանի բացմանը: Խոսքը լայնածավալ առևտրի մասին է: Քննարկել ոնք նաև որոշ համատեղ էներգետիկ նախագծեր և երկրների միջև տարանցման հնարավորություններ»,- ասել է ԱԳ նախարարը։

Նրա խոսքով՝ իրենք անդրադարձել են միջազգային ֆորումներում համագործակցության թեմային։

«Որովհետև իրականությունը ցույց է տալիս, որ երբեմն, երբ խոսքը վերաբերում է, օրինակ, մերձավորարևելյան խնդիրներին, մեր հայացքները, մեր ընկալումները ավելի մոտ են, քան կարելի է ենթադրել», - հավելել է նա:

ԱԳ նախարարն ընդգծել է, որ Անկարայի և Երևանի միջև արդեն որոշակի քայլեր են ձեռնարկվել այնպիսի ոլորտներում, ինչպիսիք են «օդային տարածքի օգտագործումը», և երկու երկրների փորձագետները քննարկումներ են անցկացրել Մարգարա-Ալիկան սահմանային անցակետի և Գյումրի-Կարս երկաթուղու վերաբերյալ։

Այնուամենայնիվ, նա խոստովանել է, որ որոշ ոլորտներում առաջընթացը կանգ է առել: «Մենք պայմանավորվածություն ունեինք սահմանը բացելու երրորդ երկրների քաղաքացիների, ինչպես նաև դիվանագիտական ​​անձնագրեր ունեցող Հայաստանի և Թուրքիայի քաղաքացիների համար։ Ցավոք , այս պայմանավորվածությունը դեռևս կյանքի չի կոչվել»,- ասել է նախարարը։

YouTube տեսահոսթինգը մշակում է նոր գործառույթ, որը թույլ կտա սահմանափակել Shorts տեսանյութերի դիտման ժամանակը: Այս մասին հայտնում է TechCrunch-ը։ Օգտատերերը կկարողանան օրական ժամանակաչափ սահմանել՝ վերահսկելու Shorts դիտելու համար ծախսած ժամանակը:

YouTube-ի ներկայացուցիչները հաստատել են TechCrunch-ին, որ մշակում են գործառույթը, բայց դեռ հրապարակայնորեն չեն փորձարկել այն: Համաձայն Android Authority-ի կողմից հրապարակված կոդի հատվածների՝ դիտումների սահմանաչափը վերջ կտա Shorts տեսանյութերի անվերջ դիտմանը:

ԱՄՆ նախագահի հատուկ բանագնաց Սթիվեն Ուիտկոֆը Օմանում Իրանի արտգործնախարար Աբաս Արաղչիի հետ բանակցություններում Թեհրանից չի պահանջել ամբողջությամբ հրաժարվել ուրանի հարստացման ծրագրից։ Այս մասին հայտնում է The New York Times-ը՝ վկայակոչելով անանուն ամերիկացի պաշտոնյաներին։

Վերջիններս բանակցությունները որակել են «ծավալուն և երկխոսության պահպանմանը միտված»: Ուիտկոֆը, որը գլխավորում էր ԱՄՆ պատվիրակությունը, չի առաջարկել, որ Իսլամական Հանրապետությունն ամբողջությամբ դադարեցնի ուրանի հարստացումը, այլ կենտրոնացել է նրա վրա, որ «այն չօգտագործվի զենքի մեջ», ասել են թերթի աղբյուրները։

Ըստ պարբերականի, բանակցությունների առաջին փուլը Իրանի համար հաջող է անցել և թույլ է տվել հասնել այն հիմնական նպատակներին, որոնք անհրաժեշտ էին քննարկումները նոր մակարդակ տեղափոխելու համար, այն է՝ Վաշինգտոնի ուշադրության կենտրոնում եղել է Թեհրանի միջուկային ծրագիրը, իրանական միջուկային օբյեկտների վերացման հարցը չի բարձրացվել, չեն քննարկվել երկրի կապերը պաղեստինյան ՀԱՄԱՍ շարժման, շիական «Հեզբոլլահ» կազմակերպության և հութիների «Անսար Ալլահ» շարժման հետ:

Ուկրաինայի՝ Եվրամիությանն ու ՆԱՏՕ-ին անդամակցելու հեռանկարը կարելի է դիտարկել միայն պատերազմի ավարտից հետո, կարծում է Գերմանիայի պահպանողական դաշինքի՝ Քրիստոնեա-դեմոկրատական ​​միության/Քրիստոնեա-սոցիալական միության (CDU/CSU) առաջնորդ Ֆրիդրիխ Մերցը։ Միևնույն ժամանակ, նրա խոսքով, երկու ասոցիացիաներին Կիևի անդամակցության խոստումը մնում է ակտուալ։

«Ուկրաինան շատ մեծ եվրոպական երկիր է, բայց եվրոպական պատերազմող երկիր է: Պատերազմական վիճակում գտնվող երկիրը չի կարող դառնալ ՆԱՏՕ-ի կամ Եվրամիության անդամ»,- նշել է Մերցը Handelsblatt թերթին տված հարցազրույցում:

Փետրվարին Հունգարիան վետո է դրել Ուկրաինայի՝ Եվրամիությանն անդամակցելու շուրջ բանակցությունների առաջին փուլի մեկնարկի վրա։ Ավելի ուշ Շվեդիայի, Ֆինլանդիայի, Դանիայի, Լատվիայի, Լիտվայի և Էստոնիայի դիվանագետները Բրյուսելին կոչ են արել կոնկրետ առաջարկներ ներկայացնել երկրի անդամակցության գործընթացի վերաբերյալ։

Երևանով հոսող գետերի հուներում ամեն տարի կուտակվում է մեծ քանակությամբ աղբ: Մաքրման աշխատանքների արդյունքում Հրազդան գետից հեռացվել է շուրջ 9,000 խմ, իսկ Գետառից և Ողջաբերդից՝ շուրջ 4,040 խմ աղբ, հայտնել է Երևանի քաղաքապետարանը:

Հուները մաքրվում են շրջակա միջավայրը առողջ պահելու, հնարավոր հեղեղները կանխելու և քաղաքում էկոլոգիական հավասարակշռությունը պահպանելու համար: Բնության նկատմամբ հոգատար վերաբերմունքը չպետք է լինի ընդամենը արձագանք առաջացած խնդիրներին, ասվում է հաղորդագրությունում:

Լրագրող Ոսկան Սարգսյանի ֆեյսբուքյան գրառումը․ «Երևանում շինարարական բումը պայթելու է․
2018 թվականի իշխանափոխությունից հետո հայության մեջ մեծ ոգևորություն կար, լավ հնարավորություններ էին առկա Հայաստանի բնակչության, աշխարհի հայության ֆինանսական միջոցների, բիզնես գաղափարների ներգրավմամբ Հայաստանում տնտեսական մեծ, հեռանկարային ծրագրեր իրականացնելու։

Սակայն տնտեսագիտությունից անտեղյակ Նիկոլ Փաշինյանը անտեսեց այդ հնարավորությունները, 7 տարում տնտեսական մեծ ծրագրեր չիրականացվեցին, արտերկրից վերցված ավելի քան 6 միլիարդ դոլար վարկերը մսխվեցին գյուղերում ասֆալտապատումներ, սալիկապատումներ կատարելու, բարձր պաշտոնյաներին պարգևավճարներ վճարելու, զանազան ֆեստիվառներ կազմակերպելու, ծառայողական ավտոներ գնելու, արտերկիր թանկ, սակայն պետական շահի տեսանկյունից անօգուտ այցերի միջոցով։

Տնտեսական հեղափոխությունը կոչվածը սահմանափակվեց ՀԴՄ-ների դիկտատուրայով, հին ավտոների կմախքների հավաքումով, անգլերենի իմացությամբ մոշ աճեցնելով, խելացի անասնագոմերով, ինտենսիվ այգիներով։

Հիմա նվազել է Հայաստանի միջնորդ առևտուրը՝ Ռուսաստանի ոսկին ու ադամանդը Դուբայ արտահանելը, արտերկրից Ռուսաստան սարքավորումներ, տեխնոլոգիական արտադրանք մատակարարելը։ Հայաստանի տնտեսության մեջ արտադրության, արտահանման անկում է, անկում է նաև գյուղատնտեսության մեջ։

Սակայն 2024թվականին Հայաստանի բանկերը 900 միլիոն դոլար շահույթ են ունեցել։ Բանկերը հարստանում են, սակայն տնտեսության իրական հատվածը քիչ է աճում։ Երևանում շինարարական բումը դեռ շարունակվում է, քաղաքաշինական նորմերի կոպիտ խախտումներով իրար հետև մտած բազմահարկեր են կառուցում։

Սակայն Երևանում եկամտային հարկի վերադարձի օրենքի չեղարկումով,վճարովի պահանջարկի սահմանափակ լինելու պատճառով Երևանում նոր բնակարանների պահանջարկը նվազել է, նաև բնակարանների գնանկում կա։

Առաջիկայում Երևանում շինարարական բումը պայթելու է, որի հետևանքով շինարարական բիզնեսը, շինանյութերի արտադրությունը հայտնվելու են վատթար վիճակում։ Այդպես է լինում, երբ երկիրը ղեկավարում են իրենց իսկ խոստովանությամբ՝ 7 տարի առաջին դասարանում մնացածները, ովքեր նաև շահամոլ են ու չտես»։

Ոսկան Սարգսյան

Երևանում ապրիլի 13-14-ին սպասվում է կարճատև անձրև, 15-16-ին անձրև, հնարավոր է նաև ամպրոպ։ Ապրիլի 17-ին սպասվում է առանց տեղումների եղանակ։ 

Հանրապետության տարածքում 13-14-ին, 17-ի գիշերը` առանձին շրջաններում, 15-16-ին շրջանների մեծ մասում օրվա ընթացքում սպասվում է անձրև, առանձին հատվածներում նաև ամպրոպ: Ապրիլի 17-ի ցերեկը սպասվում է առանց տեղումների եղանակ։

Ապրիլի 13-15-ին գիշերը լեռնային շրջաններում տեղումները կդիտվեն ձյան տեսքով։ Քամին՝ հարավարևմտյան՝ 5-8մ/վ:

Դերասանուհի Նազենի Հովհաննիսյանն Ինստագրամի իր էջում լուսանկարներ է հրապարակել շան՝ Լեդիի գետ և կից գրել․

«Իսկ որտե՞ղ է շունիկների գերեզմանը

Էս քանի օրը Լեդին երկար պառկում էր այգու էն մասում, որտեղ Հայրս էր մահացել: Անշարժ պառկում էր:

Մեկ էլ 2019- ին էր էդպես անում երկար, երբ նոր էր մահացել Հայրս, այգում՝ նույն տեղում...

Մեկնելուցս առաջ՝ 10 օր առաջ, երբ եկել էի հողամաս, հասկացա, որ շունս հիվանդացել է. վատ էր զգում, վատ ուտում... միայն իմ բերած համովություններից կերավ( հատուկ շների համար):

հոտո բժիշկն ասել էր՝ երկամային սուր անբավարարություն ունի, օրերի հարց է....(

Լուսադեմին հասա Հայաստան, իմ այգի , որտեղ շունչն ու կյանքն իմ Լեդին էր...ծաղկած մագնոլիայի մոտ՝ հազիվ կանգնած, նիհարած իմ Շունոն

Ինչ-որ ժամանակ հայրիկիս փրկած անցեղ շունն էս բոլոր տարիներին փրկում էր մեզ՝ կարոտի ճիրաններից, հուսահատությունից ու անվերադարձ կորուստների դառնահամից:

Լեդիս, իսկական լեդի ու հոգի՜՜՜

Ստիպում էր մի ամբողջ զբաղված ընտանիքի հավաքվել նույն տանիքի տակ՝ իբր իրեն կերակրելու առիթով: Միացնում էր մեզ: Հավաքում իրար գլխի:

Հաստատ ինքն էր անում: Պապայիս դրած ավանդույթն էր իրացնում: Ո՞վ կմտածեր, որ մի մատ շունն էդքան զորություն ունի:

իսկ ու՞ր են գնում շունիկների հոգիները... երևի գտնում են իրենց տերերին՝ այնկողմնային, ավելի լավ աշխարհում, որտեղ չկա կորուստ ու ցավ, կեղեքող կարոտ կամ անարդարություն, որտեղ չկան զրպարտություններ ու մատնություններ, որտեղ չկան դժբախտներ կամ դժբախտացնողներ:

Իմ Լեդին ԵՐՋԱՆԿՈւԹՅՈւՆ ԷՐ. պարզ, չորս ոտքանի երջանկություն, հասկացող աչքերով, էլեգանտ, ոտքը ոտքին գցող ու իմաստնաբար լռող Լեդին...

Լեդին, իր Տիրոջ՝ Հայրիկիս պես ապրեց ու գնաց ակնթարթում...

երբեք նեղություն չտվեց, չանհանգստացրեց, միայն շնորհակալ էր, որ կանք, ինչպիսին էլ լինեինք՝ շնորհակալ էր ու ներկա՝ մեր կողքին:

Լեդին՝ իսկական աղջիկ, որի համար հարևանի շները բրդակոտոր ցատկում էին ցանկապատից, որ հասնեն նրան ու մենք պաշտպանում էինք մեր աղջկան... ինքն էլ՝ մեզ:

Աննկատ չէր անցնի տան մոտով և ոչ ոք:

Լեդին, պապայիս շունը, նրան հավատարիմ ու նրա սերը՝ իր մեջ պահող մինչև վերջ:

իմ քաղցր Լեդին

քնեց՝ դառնալով հավերժի ճամփորդ

քնացրինք

ասում են էդպես էր ճիշտ, որ չտանջվի:

իսկ ո՞վ գիտի ապրողի՜ տանջանքը, որից հա խլում են իր սիրած հոգիներին...

և որտեղ է շունիկների գերեզմանը

չեմ հասկանում էլ ոչինչ

ու էս կորուստը չգիտեմ ոնց են անցնում

էլ ոչինչ չգիտեմ»։