Վարչապետ Փաշինյանի որոշում է ստորագրել․
Ղեկավարվելով «Հանրային ծառայության մասին» օրենքի 9-րդ հոդվածի 16-րդ մասով, «Կառավարության կառուցվածքի և գործունեության մասին» օրենքի 18-րդ հոդվածի 1-ին և 4-րդ մասերով և «Կառավարչական իրավահարաբերությունների կարգավորման մասին» օրենքի 10-րդ հոդվածի 13-րդ մասով՝
1. Հայաստանի Հանրապետության արտաքին գործերի նախարար Արարատ Միրզոյանին տրամադրել 2024-2025 թվականների աշխատանքային տարվա ամենամյա արձակուրդի մասը՝
5 աշխատանքային օր տևողությամբ՝ 2025 թվականի հուլիսի 28-ից օգոստոսի 1-ը ներառյալ:
2. Արարատ Միրզոյանի արձակուրդում գտնվելու ընթացքում վերջինիս կփոխարինի Հայաստանի Հանրապետության արտաքին գործերի նախարարի տեղակալ Ռոբերտ Աբիսողոմոնյանը:
Եվրախորհրդարանում առաջարկում են արագացնել ռուսական գազի ներմուծման ամբողջական արգելքը՝ վերջնաժամկետը 2028 թվականի հունվարից տեղափոխելով 2027 թվականի սկիզբ։ Այս մասին հայտնում է Reuters-ը՝ հղում անելով նախագծային փաստաթղթերին։ Նախաձեռնությունը պատկանում է այն պատգամավորներին, որոնք ձգտում են ավելի կոշտ մոտեցում կիրառել, քան հունիսին Եվրահանձնաժողովի ներկայացրածն էր։ Այն առաջարկում է դադարեցնել գնումները 2028 թվականից։ Արագացված հրաժարման կողմնակիցների թվում են խորհրդարանի խոշորագույն խմբակցությունների՝ «Եվրոպական ժողովրդական կուսակցության» և «Կանաչների կուսակցության» ներկայացուցիչները։
Բացի ժամկետը 2027 թվականի հունվար տեղափոխելուց, գաղափարի հեղինակներն առաջարկում են նաև պատիժներ սահմանել եվրոպական այն ընկերությունների համար, որոնք կխախտեն արգելքը։ Պատգամավոր Ինեսե Վայդերեի խոսքով՝ հնարավոր միջոցներից է էներգակիրների առևտրի լիցենզիաներից զրկելը։
Աշնանը Եվրոպական խորհրդարանը, ինչպես սպասվում է, կքվեարկի իր պաշտոնական դիրքորոշման ձևավորման հարցի շուրջ։ Դրանից հետո վերջնական որոշումը պետք է համաձայնեցվի ԵՄ Խորհրդի հետ, որտեղ այն պետք է հավաքի որակյալ մեծամասնություն։ Սա բացառում է առանձին պետությունների, մասնավորապես՝ Հունգարիայի և Սլովակիայի կողմից այն արգելափակելու հնարավորությունը, որոնք դեռևս խողովակաշարով ռուսական գազ են գնում և դեմ են համաեվրոպական արգելքին։
ԵՄ-ն խոստացել է հրաժարվել ռուսական գազից ունեցած բազմամյա կախվածությունից այն բանից հետո, երբ Վլադիմիր Պուտինը 2022 թվականին պատերազմ է սկսել Ուկրաինայում։ Մինչև լայնամասշտաբ ներխուժումը Ռուսաստանը ապահովում էր եվրոպական գազի ներմուծման մոտ 45%-ը։ 2024 թվականին, ինչպես գրում է Reuters-ը, այդ մասնաբաժինը նվազել է մինչև 19%, մատակարարումներն իրականացվել են «Թուրքական հոսքով» և որպես հեղուկ բնական գազ (ՀԲԳ)։ Մինչև 2025 թվականի վերջը Եվրամիությունն ակնկալում է Ռուսաստանից գնվող գազի մասնաբաժինը նվազեցնել մինչև 13%։
|
ԻԻՀ գերագույն առաջնորդ այաթոլլա Ալի Խամենեին ուղերձ է հղել Իսրայելի կողմից Իրանին պարտադրված պատերազմի հետևանքով նահատակյված ԻԻՀ քաղաքացիների, ռազմական հրամանատարների և միջուկային գիտնականների նահատակության 40-օրյակի կապակցությամբ։ Այս մասին հայտնում է Pars Today-ը։ Ուղերձում ասված է․ «Հանուն ամենակարող Աստծու։ Լրացավ մեր սիրելի հայրենակիցների, այդ թվում՝ ռազմական հրամանատարների և ականավոր միջուկային գիտնականների նահատակության 40 օրը։ Այս հարվածը հասցրեց չար և հանցագործ Սիոնիստական ռեժիմը, որն Իրանի ժողովրդի նենգ ու համառ թշնամին է։ Մեր նահատակներն իրենք էին ընտրել այս ուղին, հույս ունենալով արժանանալ նահատակության բարձր պատվին և նրանք հասան այդ պատվին։ Թող վայելեն այդ պատիվը։ Սակայն ժողովրդի, հատկապես նահատակների ընտանիքների և նրանց համար, ովքեր մոտիկից ճանաչել են նահատակներին, այդ դժբախտությունը դժվար, դառը և ծանր է։ Սակայն այս իրադարձության մեջ կան նաև լուսավոր կետեր։ Երկրորդ՝ նահատակների հրամանատարության տակ գտնվող ստորաբաժանումների համառությունն ու կայունությունն է, որոնք թույլ չտվեցին, որ այս ծանր հարվածը զրկի իրենց հնարավորություններից և պարտադրի կանգ առնել։ Եվ երրորդ՝ Իրանի ժողովրդի անսասանությունը, որը դրսևորվեց միասնության, հոգևոր ուժի և մարտադաշտում միասնական լինելու վճռականության մեջ։ Այս միջադեպի ժամանակ իսլամական Իրանը ևս մեկ անգամ ցույց տվեց իր հիմքերի ամրությունը։ Իրանի թշնամին սառը երկաթ է ծեծում։ Բոլոր ոլորտներում գիտելիքների և տեխնոլոգիաների զարգացման տեմպի արագացումը գիտական վերնախավի պատասխանատվությունն է։ Իսկ երկրի և ժողովրդի պատիվն ու արժանապատվությունը պաշտպանելը հռետորների և գրողների անսասան պարտականությունն է։ Զինվորական հրամանատարների պարտականությունն է երկիրն ավելի շատ զինել ազգային անվտանգությունն ու անկախությունը պաշտպանելու միջոցներով։ Բոլոր պատասխանատու գործադիր մարմինների պարտականությունն է լինել լուրջ ու հետևողական և արդյունքի հասցնել երկրի աշխատանքը։ Հոգևորականների պարտականություններն են հոգևոր առաջնորդությունը, սրտերը լուսավորելը և մարդկանց համբերատար, հանգիստ և անսասան լինելու խորհուրդ տալը։ Հեղափոխական եռանդը և գիտակցությունը պահպանելը մեզանից յուրաքանչյուրի, հատկապես երիտասարդության պարտականությունն է։ Թող Ամենակարող Աստված օրհնի բոլորին։ Խաղաղություն Իրանի ժողովրդին, խաղաղություն նահատակված երիտասարդներին, նահատակված կանանց ու երեխաներին, բոլոր նահատակներին ու նրանց համար սգացողներին։ |
Ներկայացնում ենք տարադրամի փոխարժեքները՝ ըստ rate.am-ի:
ԱՄՆ դոլարի առքի առավելագույն արժեքն է 382 դրամ, վաճառքի նվազագույն արժեքը՝ 386 դրամ:
Եվրոյի առքի առավելագույն արժեքն է 446 դրամ, վաճառքի նվազագույն արժեքը՝ 454 դրամ:
Ռուսական ռուբլու առքի առավելագույն արժեքն է 4.8 դրամ, վաճառքի նվազագույն արժեքը՝ 4.91 դրամ:
Գլխավոր դատախազությունը հաստատում է, որ Էջմիածնի նախկին քաղաքապետի դրվագով քրեական վարույթ կա, որը հարուցվել է Հակակոռուպցիոն կոմիտեում փողերի լվացման և պաշտոնական լիազորությունները չարաշահելու հոդվածներով:
«Ազատության» հարցմանն ի պատասխան, սակայն, իրավապահները չեն մանրամասնել, թե Դիանա Գասպարյանին ու ամուսնու մորը՝ Ռուզաննա Ասատրյանին արդյոք այս հոդվածներո՞վ է մեղադրանք առաջադրվել: Հավելում են, որ նախաքննությունը շարունակվում է, և դրա շահերից ելնելով` այլ տեղեկություններ չեն կարող հաղորդել:
«Ազատության» տեղեկություններով, հարս ու սկեսուր մեղադրյալի կարգավիճակ ունեն:
«Ժողովուրդ» օրաթերթը գրում է. ««Ժողովուրդ» օրաթերթի տեղեկություններով` ՀԷՑ-ի կառավարիչ «գործուղված» Ռոմանոս Պետրոսյանը բավականին մեծ չափի աշխատավարձ է ստանալու. խոսքը մոտ 10 միլիոն դրամի մասին է, որը նա պետք է ստանա յուրաքանչյուր ամիս։
«Ժողովուրդ» օրաթերթը դիմեց ՀԷՑ-ը «գրաված» Ռոմանոս Պետրոսյանին` պարզելու համար, թե որքանով է իրական տեղեկությունը: «Աշխատավարձիս դրույքաչափը շատ ավելի քիչ է, քան ձեր նշած թիվը։ Ես նաեւ հրաժարվելու եմ ընկերության միջոցներից պարգեւավճարներ ստանալու հնարավորությունից, ինչը վաղուց ընդունված նորմ է եղել բարձր ղեկավարության համար։
Ինձ հետ պարգեւավճարներ չեն ստանա նաեւ մյուս բարձրաստիճան ղեկավարները, որոնք նշանակվել են իմ կողմից, կամ կշարունակեն գործել իմ ղեկավարությամբ», – մեզ փոխանցեց Պետրոսյանը:
Հիշեցնենք, որ դեռևս հուլիսի 9-ին «Ժողովուրդ» օրաթերթը տեղեկացրել էր, թե ինչ ունեցվածք է հայտարարագրել Ռոմանոս Պետրոսյանը:
Մինչեւ 2018 թվականը նա ունեցել է 2001 թվականին ձեռք բերված բնակարան եւ 2014 թվականին ձեռք բերված հողամաս, որոնք գտնվում են Կոտայքի մարզում։ 2019 թվականին` հեղափոխությունից մեկ տարի անց, Երեւանի Արաբկիր վարչական շրջանում նա գնել է բնակարան 51 մլն 357 հազար դրամով՝ 133 հազար ԱՄՆ դոլարով: Իսկ արդեն 2023 թվականին Պետրոսյանը գնել է BMW մակնիշի մեքենա 8 մլն դրամ արժողությամբ. մեքենան 2017 թվականի արտադրության է։ ՊՎԾ նախկին պետի բանկային հաշիվների մնացորդները կազմել են 7 հազար եվրո եւ 7 մլն 420 հազար դրամ։
Ի դեպ, Պետրոսյանը ՊՎԾ պետ դառնալուց հետո 133 հազար դոլարանոց տուն է գնել»։
Մանրամասները՝ «Ժողովուրդ» օրաթերթի այսօրվա համարում:
Տպավորություն է, թե ամեն ինչ արվում է, որ վարորդները Երևանի կենտրոն չգան. Sputnik Արմենիայի հետ զրույցում նման տեսակետ հայտնեց ոստիկանապետի նախկին տեղակալ, գեներալ-մայոր Սամվել Հովհաննիսյանը` խոսելով երևանյան երթևեկության վերջին փոփոխությունների մասին։
Նշենք` հուլիս 19-ից Երևանի Սարյան և Մոսկովյան փողոցներում երթևեկությունը դարձել է միակողմանիմիայն աջ`դեպի Բաղրամյան պողոտա։ Քաղաքային իշխանությունը նախապես հայտարարել էր, որ դրա արդյունքում Սարյան փողոցում կավելանա ևս 1 երթևեկելի գոտի, ինչը թույլ կտա ապահովել ընդհանուր տրանսպորտային հոսքերի անընդհատություն։
«Երթևեկության կազմակերպումը լուրջ մասնագիտություն է։ Չի կարելի վերցնել մի օր մի բան փոխել, մյուս օրը` մի ուրիշ բան։ Պետք է լինի գիտակ մոտեցում, հաշվարկել տրանսպորտային հոսքերը` օրվա տարբեր ժամերին, խաչմերուկներում լուսացույցների փոփոխման տակտերը»,– նշում է մասնագետը` միաժամանակ կասկած հայտնելով, որ երթևեկության վերջին փոփոխություններն արվել են առանց այս հաշվարկների։ Ապացույցը` քաղաքի կենտրոնում ավելացած խցանումներն են։
Սարյանով երթևեկող վարորդները որոշակի դրական փոփոխություն արձանագրում են, բայց դրա փոխարեն Մաշտոցի պողոտայում խցանումները չեն դադարում անգամ հանգստյան օրերին։
«Սարյանը միակողմանի դարձնելուց առաջ հարկավոր էր հաշվարկել` որն է լինելու այլընտրանքը։ Մի զուգահեռ փողոցը Պռոշյանն է, որտեղ շատ քիչ վարորդներ են բարձրանում, քանի որ Սարյանից շատ է հեռու, մյուսը` Մաշտոցն է։ Ստացվում է, որ տրանսպորտային հոսքի մոտ 45-52 տոկոսը հիմա ընկնում է Մաշտոցի պողոտայի վրա»,– նշում է նախկին ոստիկանապետը` հավելելով, որ նախկինում ոստիկանությունը ձեռնպահ էր մնում Կենտրոնի փողոցներում միակողմանի երթևեկություն սահմանելուց հենց այդ մտավախությամբ։
Ամռան համեմատաբար թեթև երթևեկության պայմաններում արդեն նկատելի խնդիրը, Սամվել Հովհաննիսյանի համոզմամբ, շատ ավելի է բարդանալու սեպտեմբերից, հատկապես որ Սարյան փողոցում 2 դպրոց կա։
«Ո՞նց են այդ դպրոցների երեխաների ծնողները մոտենալու և հեռանալու։ Սրանք գլոբալ հարցեր են, որոնց լուծման համար պետք է ամբողջ տարածքը հաշվարկվի 3-4 խաչմերուկ առաջ ու հետ` իրենց ճյուղավորվող փողոցների հոսքերով, թողունակություններով»,– ասում է ոստիկանության սպան։
Նա նաև մտավախություն ունի, որ աշնանը, հատկապես պիկ ժամերին Մաշտոցի պողոտայի խցանումներին ավելանալու է նաև միակողմանի դարձած Սարյանի խցանումը։ Իր բնորոշմամբ` Սարյանում ձևավորված խցանման «պոչը հասնելու է մինչև Մաշտոցի պողոտա»։
Խնդիրն էլ ավելի է խորացնում Մաշտոցի պողոտայից դեպի ձախ` Պուշկին, Ամիրյան, Խորենացի փողոցներ ավտոմեքենաների երթևեկությունն արգելելը։
«Շատ սխալ են արել։ Մաշտոցի պողոտայի ամենադյուրին ու ամենալավ կազմակերպված խաչմերուկը Մաշտոց–Խորենացի խաչմերուկն էր` լուսացույցերի հավասարաչափ տակտերով ու տրանսպորտային հոսքերի համաչափ ապահովմամբ։ Այնտեղ ընդհանրապես պետք չէր ոչ մի բանի ձեռք տալ»,– նշում է Հովհաննիսյանը` կիսելով վարորդների դժգոհությունը կատարված փոփոխություններից։
Նշենք, որ Մաշտոցի պողոտայից դեպի ձախ երթևեկությունն արգելելու պատճառով, վարորդներն այսօր կամ ստիպված են ամբողջ պողոտան անցնել մինչև Գրիգոր Լուսավորիչ, շրջադարձ կատարել ու վերադառնալ մինչև իրենց անհրաժեշտ խաչմերուկը, կա՛մ նույն փողոցով թեքվել աջ, այնտեղ շրջադարձ կատարել, որպեսզի դրանից հետո կարողանան վերադառնալ և Մաշտոցի պողոտան ուղիղ հատել։ Սա իր հերթին կրկնակի ավելացնում է պողոտայի ծանրաբեռնվածությունը Պուշկին– Գրիգոր Լուսավորիչ հատվածում։
2025 թ. երկրորդ եռամսյակում Հայաստանի 1000 խոշոր հարկատուների ցանկը գլխավորում է «Մոբայլ Սենթր Արթը»՝ 32,9 մլրդ դրամ մուտքով։ Երկրորդ տեղում «Գրանդ Տոբակո» ընկերությունն է՝ 30,4 մլրդ դրամ մուտքով։ Ցանկի երրորդ տեղում «Գազպրոմ Արմենիա» ընկերությունն է` ավելի քան 28 մլրդ դրամ մուտքով։ Հայտնում է ՊԵԿ–ը։
Խոշոր հարկատուների ցանկում չորրորդ հորիզոնականում «Արդշինբանկն» է՝ 27,9 մլրդ դրամի հարկային մուտքով, հինգերորդում «Ամերիաբանկը»՝ 21,4 մլրդ դրամի մուտքով։
Այս անգամ գրեթե միշտ «1000 խոշոր հարկատուների» ցանկը գլխավորող Զանգեզուրի պղնձամոլիբդենային կոմբինատը վեցերորդ հորիզոնականում է՝ 20,3 մլրդ դրամի մուտքով։
«Սի Փի Էս Էներջի Գրուպը» ցանկի յոթերորդ տեղում է՝ 12,1 մլրդ դրամի հարկային մուտքով, «Ինթերնեյշնլ Մասիս Տաբակը» ութերորդում է՝ 11,4 մլրդ դրամի մուտքով։
Իններորդ հորիզոնականում «Փրիթի Ուեյ» ընկերությունն է՝ ավելի քան 11,2 մլրդ դրամի մուտքով։
«1000 խոշոր հարկատուների» տասնյակը եզրափակում է «Դիջիթեյնը»՝ ավելի քան 11 մրդ դրամի հարկային մուտքով։
Նշենք, որ Հայաստանի 1000 խոշոր հարկատուները հունվար-հունիս ամիսների ընթացքում պետական բյուջե ընդհանուր առմամբ վճարել են ավելի քան 986 միլիարդ 71 միլիոն դրամ, նախորդ տարվա նույն ցուցանիշը կազմել է 900 միլիարդ 401 միլիոն դրամ, կամ ավելի է հավաքագրվել 85 միլիարդ 670 միլիոն դրամ:
Ծաղիկ արտադրող ևս 4 ընկերության արտահանման թույլտվություն է ստացել։ Տեղեկությունը հայտնում է ՀՀ սննդամթերքի անվտանգության տեսչական մարմինը։
Նշվում է, որ Սննդամթերքի անվտանգության տեսչական մարմնի և ՌԴ անասնաբուժական և բուսասանիտարական վերահսկողության դաշնային ծառայության (Ռոսսելխոզնադզոր), կողմից հայկական ծաղկի ջերմոցային տնտեսություններում անցկացված համատեղ առցանց տեսահսկողական միջոցառումների արդյունքում դրական եզրակացություն ստացած ընկերությունները կարող են ծաղիկ արտահանվել Ռուսաստանի Դաշնություն։
Այսպիսով, արդեն 14 ընկերության ծաղիկների արտահանում է արտոնված։
Հիշեցնենք, որ ռուսական կողմը 3 հիմնական խնդիր էր բարձրաձայնել՝ կասկածներ, որ երրորդ երկրից Հայաստան ներմուծված ծաղիկները վերաարտահանվում են Ռուսաստան, մեկօրյա ընկերությունների միջոցով արտահանումը՝ հարկերից խուսափելու համար և կարանտին վնասատու օրգանիզմների առկայություն։
ՍԱՏՄ-ն տվյալներ է փոխանցել ռուս գործընկերներին, ըստ որոնց Հայաստան ներմուծվել է միլիոնի չհասնող՝ 300-400 հազար հատ ծաղիկ, արտահանվել է գրեթե 38 միլիոն, ու դա մեզ մոտ աճեցվածն է։
Երրորդ խնդիրը վնասատուների առկայությունն է, ինչի ուղղությամբ էլ հիմա ակտիվ աշխատանք է տարվում։ Հարությունյանի խոսքով՝ տեսչական մարմնի բուժասանիտարական ամբողջ անձնակազմը ներգրավված է գործընթացում։
Հայաստանի Հանրապետության առանձին շրջաններում այսօր կեսօրից հետո սպասվում է կարճատև անձրև և ամպրոպ, հնարավոր է նաև կարկուտ։ Վաղը` հուլիսի 27-ին, սպասվում է առանց տեղումների եղանակ։ Տեղեկությունը հայտնում է ՀՀ ՇՄՆ Հիդրոօդերևութաբանության և մոնիտորինգի կենտրոնը։
Հաղորդագրության համաձայն` քամին կլինի հարավարևմտյան` 2-5մ/վ, ամպրոպի ժամանակ սպասվում է քամու ուժգնացում՝ 17-20մ/վ արագությամբ։
Մինչև հուլիսի 30-ը երեկոյան ժամերին Արմավիրում, Կոտայքի և Արագածոտնի նախալեռներում սպասվում է քամու ուժգնացում՝ 15-18 մ/վ արագությամբ։
Օդի ջերմաստիճանն այսօր ցերեկն աստիճանաբար կնվազի 2-4 աստիճանով, հուլիսի 27-29-ին նույնքան կբարձրանա։
Հուլիսի 27-ին սպասվում է առանց տեղումների եղանակ։
