ՀՀ վարչապետի աշխատակազմից հայտնում են, որ վարչապետ Նիկոլ Փաշինյանի որոշմամբ ՀՀ ԱԳՆ-ում կառուցվածքային փոփոխություններ են կատարվել։ 

«Ղեկավարվելով «Կառավարչական իրավահարաբերությունների կարգավորման մասին» օրենքի 9-րդ հոդվածի 1-ին մասի 1-ին և 2-րդ կետերով, 3-րդ մասով, 21-րդ հոդվածի 1-ին մասով և «Նորմատիվ իրավական ակտերի մասին» օրենքի 33-րդ և 34-րդ հոդվածներով՝ 

1. Հայաստանի Հանրապետության արտաքին գործերի նախարարության (այսուհետ՝ նախարարություն) կառուցվածքում կատարել հետևյալ փոփոխությունները՝ 

1) Եվրոպայի վարչությունից առանձնացման եղանակով ստեղծել նախարարության հիմնական մասնագիտական կառուցվածքային ստորաբաժանում հանդիսացող՝ եվրոպական ինտեգրման վարչություն. 

2) քաղաքական ծրագրավորման վարչությունը միացնել դիվանագիտական գործառնությունների համակարգման վարչությանը:

2. Այդ կապակցությամբ Հայաստանի Հանրապետության վարչապետի 2018 թվականի հունիսի 11-ի «Հայաստանի Հանրապետության արտաքին գործերի նախարարության կանոնադրությունը հաստատելու մասին» N 746-Լ որոշման հավելվածի 30-րդ կետում կատարել հետևյալ փոփոխությունը և լրացումը՝ 

1) ուժը կորցրած ճանաչել 13-րդ ենթակետը.

2) լրացնել հետևյալ բովանդակությամբ 16-րդ ենթակետով՝ «16) եվրոպական ինտեգրման վարչություն:»: 

3. Սույն որոշումն ուժի մեջ է մտնում հրապարակմանը հաջորդող օրվանից»,- ասված է որոշման մեջ։

Ամերիկյան The National Interest (TNI) պարբերականը նշում է, որ ռուսական հինգերորդ սերնդի կործանիչ **Սու-57-ը տեսականորեն կարող է գերազանցել ամերիկյան F-35 Lightning II-ին, սակայն դրա համար անհրաժեշտ է արտադրության բարձր տեմպ և բավարար քանակի ինքնաթիռների առկայություն։ 

Հոդվածում նշվում է, որ Սու-57-ը համադրում է F-22-ի թաքնվածությունը, F-35-ի բազմագործառույթ հնարավորությունները և ռուսական Սու-35-ին բնորոշ գերշարժունակությունը։ Չնայած ամերիկյան կործանիչներից մի փոքր զիջում է անտեսանելիության մակարդակով, ռուսական ինքնաթիռը կարող է դա փոխհատուցել ռադիոէլեկտրոնային պայքարի արդյունավետ համակարգերով և գերշարժունակությամբ, ինչը առավելություն է տալիս մոտ հեռահարության օդային մարտում։ 

TNI-ն ընդգծում է, որ ներկայում Ռուսաստանի ռազմաօդային ուժերը դեռ չունեն բավարար քանակությամբ Սու-57-եր՝ արտադրության դանդաղ տեմպերի պատճառով, մինչդեռ ԱՄՆ արդեն արտադրել է ավելի քան 1000 միավոր F-35, ինչը նրանց տալիս է վճռորոշ քանակական առավելություն։

Լրատվամիջոցները հաղորդում են, որ անհետ կորած զինծառայողների հարազատներից երկու հոգի ձերբակալվել է:

«Քրեական վարույթի նախաքննության ընթացքում 2 անձ ձերբակալվել է: Վերջիններիս նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 3-րդ մասով (խուլիգանությունը) և 452-րդ հոդվածի 1-ին մասով (պաշտոնատար անձի օրինական ծառայողական կամ քաղաքական գործունեությանը միջամտելը)»,-Tert.am-ին հայտնել են ՔԿ-ից:

Ուշադիր հետեւում էի ԱԺ պետաիրավական հանձնաժողովում մեր հեղինակած հայտարարության քննարկումներին: Այս մասին Facebook-ի իր էջում գրել է ՀՀԿ փոխնախագահ Արմեն Աշոտյանը։

«Ուզում եմ նախ ասել, որ Հայկ Մամիջանյանը, Աննա Մկրտչյանը եւ Տիգրան Աբրահամյանը բարձր որակի քաղաքական կեցվածք եւ խոսք ցուցադրեցին։ 

Շնորհակալ եմ նաեւ «Հայաստան» դաշինքի ներկա պատգամավորներին իրենց ակտիվ եւ բովանդակային ներգրավման համար։

ՔՊ-ական դեմագոգիկ դատարկախոսությանն ու ճարպկալեզվությանը հակադրվեց հիմնավոր եւ ծանրակշիռ փաստարկների հեղեղ, իսկ քաղաքական մինի-մենամարտերում ընդդիմության ներկայացուցիչները մի քանի գլուխ բարձր էին ու համոզիչ։ 

Զուգահեռ ընթերցելով միջազգային մամուլը՝ հանդիպեցի մի լուրի, ըստ որի Եվրոպական հանձնաժողովի ղեկավարին Եվրոպական խորհրդարանում այսօր անվստահություն հայտնելու նախաձեռնություն է քննարկվելու, որին կարող են միանալ նաեւ իշխող ԵԺԿ խմբակցության պատգամավորներ։ 

«Դեպի Եվրոպա» ճանապարհ հռչակած քպական մանդատավոր քոչվորներին չէր խանգարի ուսումնասիրել հենց եվրոպական փորձը ՝ կառավարության ղեկավարին անվստահություն հայտնելու հարցում։

Ինչպես ասում են՝ Never say never:

Ի դեպ սա վերաբերում է նաեւ ընդդիմադիր դիրքավորված որոշ շրջանակներին։

Նիկոլը եւ իր կառավարումը աղետ է, եւ այս փաստը քվեարկությամբ չէ, որ պիտի արձանագրվի։

Չէ՞ որ հայտնաբերված ռակը ռակ է՝ անկախ նրանից, թե հիվանդատերը կքվեարկի ախտորոշման օգտին թե ոչ»։

ԱՄՆ դոլարի փոխարժեքն այսօր՝ հոկտեմբերի 6-ին, կազմել է 382.58 դրամ՝ նախորդ օրվա համեմատ նվազել է 0.18 դրամով: Այդ մասին տեղեկանում ենք Կենտրոնական բանկի պաշտոնական կայքից։

Եվրոյի փոխարժեքը կազմել է 446.2 դրամ (նվազել  է 3.05 դրամով), իսկ ռուսական ռուբլու փոխարժեքը կազմել է 4.60  դրամ (նվազել է 0.06 դրամով): 

Հայաստանյան բանկերում դոլարը գնվում է 380-381.5 դրամով, վաճառվում է 384-385 դրամով: Եվրոն բանկերում գնվում է 439-445 դրամով, վաճառվում է 448.5–454 դրամով:

Ռուբլին բանկերում գնվում է 4.50-4.58 դրամով, վաճառվում է 4.67-4.90 դրամով:

Փոխանակման կետերում իրավիճակը հետևյալն է. դոլարը գնվում է 381 դրամով, վաճառվում՝ 384 դրամով:

Եվրոն գնվում է 446–447 դրամով, վաճառվում է 450–451 դրամով:

Ռուբլին գնվում է 4.53 դրամով, վաճառվում է 4.63 դրամով:

Շենգավիթ վարչական շրջանի ղեկավար Անդրանիկ Մինասյանը սոցցանցի իր էջում տեղեկացրել է, որ հոկտեմբերի 10-ից դադարեցնելու եմ իմ աշխատանքային գործունեությունը:

«Սիրելի՛ շենգավիթցիներ,

ուզում եմ ձեզ տեղեկացնել, որ հոկտեմբերի 10-ից դադարեցնելու եմ իմ աշխատանքային գործունեությունը:

Մենք միասին անցել ենք բազմաթիվ դժվարությունների միջով, բայց նաև ունեցել ենք նշանակալի ձեռքբերումներ, ի նպաստ մեր համայնքի զարգացմանը։ Ձեր աջակցությունն ու հավատը դարձան այն ուժը, որով հնարավոր եղավ իրականացնել բազմաթիվ ծրագրեր, կյանքի կոչել նոր գաղափարներ։ 

Յուրաքանչյուրիդ մասնակցությունը, ջանքերն ու նվիրվածությունը շարունակելու են լինել հետագա հաջողությունների գրավականը։

Ես իմ խորին շնորհակալությունն եմ հայտնում ձեզ՝ վստահության և աջակցության համար։ Վստահ եմ, որ մեր վարչական շրջանը շարունակելու է առաջընթացի ճանապարհը՝ առաջնորդվելով միասնական նպատակներով ու արժեքներով։

Թող ձեր ընտանիքներում միշտ լինի սեր, խաղաղություն և բարօրություն»:

Գերմանիան երկուշաբթի օրը հայտարարել է, որ «կայուն Ֆրանսիան կարևոր ներդրում է Եվրոպայի կայունության գործում»։ Այս հայտարարությունն արվել է Ֆրանսիայի նոր վարչապետ Սեբաստիեն Լեկորնյուի հրաժարականից հետո, ով պաշտոնավարել էր մեկ ամսից էլ պակաս, հաղորդում է France 24-ը։ 

Սակայն, կառավարության պաշտոնական ներկայացուցիչ Ստեֆան Կոռնելիուսը պնդում է, որ «Ֆրանսիայի կայունությունը կասկածի տակ դնելու պատճառներ չկան», այն բանից հետո, երբ Սեբաստիեն Լեկորնյուի հանկարծակի հրաժարականը սրել է երկրի քաղաքական ճգնաժամը։ 

Հիշեցնենք, որ Լեկորնյուն հրաժարական է տվել նոր կառավարության կազմի հրապարակումից ընդամենը մի քանի ժամ անց։

Ընդդիմադիր «Ազգային միավորում» կուսակցությունը կոչ է արել լուծարել խորհրդարանը և անցկացնել վաղաժամկետ ընտրություններ: Ընդդիմության առաջնորդ Մարին Լե Պենը հայտարարել է, որ «խելամիտ կլինի, որ Էմանուել Մակրոնը հրաժարական տա»:

Այսօր՝ հոկտեմբերի 6-ին, վրաերթ է տեղի ունեցել Երևանում: Ժամը 14:50-ի սահմաններում էլեկտրական ավտոմեքենան Նորք-Մարաշ վարչական շրջանում՝ Արմենակյան 143 հասցեի մոտ, վրաերթի է ենթարկել հետիոտնին, հաղորդում է Shamshyan.com–ը։

Վարորդը փախուստի չի դիմել, օգնել է օպերատիվորեն ժամանած Երևանի 1-03 շտապօգնության բժիշկներին՝ վիրավորին տեղափոխել հիվանդանոց:

Վրաերթի ենթարկված կնոջը քաղաքացիները, վրաերթի հարևանությամբ գործող «Երևանի Սիթի» սուպերմարկետի աշխատակիցները դուրս են բերել ավտոմեքենայի առջևի հատվածի տակից, իսկ մինչ այդ հետիոտնը կանգնած է եղել մայթին, երբ նշված ավտոմեքենան, որը կայանված է եղել «Երևան Սիթի»-ի դիմաց, առաջ է ընթացել, վրաերթի ենթարկել հետիոտնին, ապա բախվել երկաթե ճաղավանդակին, կոտրել այն և մոտ 1 մետր բարձրությունից հայտնվել բնակելի շենքի և «Երևան Սիթի»-ի տարածքում:

Դեպքի վայր են ժամանել նաև Երևանի թիվ 9-րդ հրշեջ-փրկարարական ջոկատից 1 մարտական հաշվարկ:

Քննիչի հանձնարարականով՝ ավտոմեքենան տեղափոխվել է ոստիկանության ՊԾ Երևան քաղաքի գնդի պահպանվող հատուկ տարածք:

Դեպքի վայրում հավաքված մի քանի քաղաքացիներ ասում էին, որ վարորդը Հայաստանում հայտնի գործարար է:

Վարորդը ենթարկվել է սթափության փորձ, եղել է սթափ: