«Այս միջանցքը այն չէ, ինչի մասին չափազանցվել է լուրերում, և Իրանի Իսլամական Հանրապետության պահանջները կատարված են», – հայտարարել է Իրանի նախագահ Մասուդ Փեզեշքիանը, հաղորդում է Mehr-ը։

«Արաղչին վերջերս այս հարցի վերաբերյալ զեկույց է ներկայացրել, և որոշվել է, որ նրանք դա կքննարկեն։ Այս հարցում նկատվում է տարածքային ամբողջականության պահպանման սկզբունքը, կապի հաստատում Եվրոպայի հետ, այլ ոչ թե դրա փակումը հյուսիսից, ինչպես ցանկանում էր ռեժիմը (Իսրայել – խմբ․)։

Միակ մտահոգությունն այն է, որ այս ճանապարհը ցանկանում են կառուցել հայկական և ամերիկյան ընկերություններ», – նշել է Փեզեշքիանը։

Օտարերկրացիները, որոնք Ռուսաստանի Դաշնությունում են գտնվում միգրացիոն կանոնների խախտմամբ, մեկ ամիս ժամանակ ունեն իրենց կարգավիճակն օրինականացնելու կամ երկիրը լքելու համար։ Ինչպես ТАСС-ին հայտնել են Ռուսաստանի ՆԳՆ-ից, նրանք դա կարող են անել մինչև սեպտեմբերի 10-ը՝ դիմելով միգրացիոն ծառայություն։ 

Խոսքը օտարերկրյա քաղաքացիների և քաղաքացիություն չունեցող անձանց մասին է, որոնք ընդգրկված են վերահսկվող անձանց ռեեստրում, որտեղ գրանցում են Ռուսաստանում գտնվելու օրինական հիմքերը կորցրած օտարերկրացիներին։ Հունիսի կեսերին դրանում հաշվառված էր ավելի քան 800 հազար մարդ։ ՆԳՆ-ից հայտնել են, որ 2025 թվականի սեպտեմբերի 10-ից հետո իրավական կարգավիճակը կարգավորելն անհնար կլինի։ Սա վերաբերում է նաև Ուկրաինայի քաղաքացիներին, որոնք հնարավորություն ունեն ստանալու կացության թույլտվություն կամ անմիջապես փաստաթղթեր ներկայացնելու ռուսաստանյան քաղաքացիություն ստանալու համար՝ Ուկրաինայի տարածքում մշտական գրանցման առկայության դեպքում։ 

Ռուսաստանի տարածքում հետագա օրինական գտնվելու հարցը լուծելու համար օտարերկրացիները պետք է մինչև այս տարվա սեպտեմբերի 10-ը դիմեն Ռուսաստանի ՆԳՆ «ПВС» Դաշնային պետական ունիտար ձեռնարկության ցանկացած մասնաճյուղ՝ ըստ փաստացի բնակության վայրի։ 

ՆԳՆ-ից հիշեցրել են, որ օտարերկրյա քաղաքացիներին ապօրինի աշխատանքի ներգրավելու, ինչպես նաև օտարերկրացիների հետ աշխատանքային պայմանագրի կնքման կամ դադարեցման մասին ՌԴ ՆԳՆ տարածքային մարմնին չտեղեկացնելու համար սահմանված է վարչական պատասխանատվություն։ Այս իրավախախտումների համար տուգանքի առավելագույն չափը պաշտոնատար անձանց համար 50 հազար ռուբլի է, իսկ իրավաբանական անձանց համար՝ 800 հազար ռուբլի։ 

Վերահսկվող անձանց ռեեստրում ընդգրկված օտարերկրացիներին ծառայությունների մատուցումը, այդ թվում՝ կրթության ոլորտում, նույնպես համարվում է վարչական իրավախախտում։ Տուգանքի չափը ֆիզիկական անձանց համար կկազմի 2 հազարից մինչև 5 հազար ռուբլի, պաշտոնատար անձանց համար՝ 35 հազարից մինչև 50 հազար ռուբլի, իսկ կազմակերպությունների համար՝ 400 հազարից մինչև 500 հազար ռուբլի։

Իրանի հոգևոր առաջնորդ Այաթոլլա Խամենեիի նոր գրառումը.

«Իսլամական Հանրապետությունը երբեք չի ընդունի այնպիսի քաղաքականություն և ծրագրեր, որոնք կհանգեցնեն Իրանի և Հայաստանի միջև սահմանի փակմանը»:

ԱՄՆ նախագահ Դոնալդ Թրամփը բաց է Ալյասկայում Ռուսաստանի և Ուկրաինայի նախագահների հետ եռակողմ հանդիպում անցկացնելու գաղափարի համար, սակայն այս պահին ընթանում է միայն նրա անձնական հանդիպման նախապատրաստումը Վլադիմիր Պուտինի հետ։ Այս մասին գրում է Reuters գործակալությունը՝ հղում անելով Սպիտակ տան աղբյուրին։

Վարչակազմում իր աղբյուրի նույն վարկածը ավելի վաղ հայտնել էր Washington Post թերթը։

Ուրբաթ օրը, երբ Թրամփը հայտարարեց օգոստոսի 15-ին Ալյասկայում Պուտինի հետ հանդիպելու ծրագրերի մասին, մի քանի ամերիկյան լրատվամիջոցների, մասնավորապես CBS հեռուստաալիքի զրուցակիցները հայտնել էին, որ չի բացառվում դրան Վլադիմիր Զելենսկու մասնակցության տարբերակը։

Պուտինը, անցած շաբաթ մեկնաբանելով նման հնարավորությունը, հասկացրել է, որ Ուկրաինայի նախագահի հետ իր անձնական հանդիպման համար այժմ «պայմաններ» չկան, հիշեցնում է BBC-ն։

Վաշինգտոնից Երևան վերադառնալիս ԱԳ նախարար Արարատ Միրզոյանն այցելել է Փարիզում դեսպանության նոր շենք՝ ծանոթանալու վերանորոգման աշխատանքների ընթացքին։

Այդ մասին տեղեկանում ենք ԱԳՆ մամուլի խոսնակ Անի Բադալյանի Ֆեյսբուքի էջից։

Երեքշաբթի Հայաստանի արտգործնախարարի տեղակալը պետք է ժամանի Թեհրան, և մենք շարունակելու ենք խորհրդակցությունները։  Այս մասին հայտարարել է Իրանի արտգործնախարար Աբաս Արաղչին։

«Մեր դիրքորոշումը Զանգեզուրի և այս հարցի վերաբերյալ լիովին հստակ է։ Մենք ողջունում ենք Հայաստանի և Ադրբեջանի միջև ցանկացած խաղաղություն և ավելի վաղ հայտնել ենք մեր պատրաստակամությունը՝ համագործակցելու և նպաստելու Հայաստանի և Ադրբեջանի միջև խաղաղ գործընթացին։

Ինչ վերաբերում է Կովկասյան տարածաշրջանին, մեր դիրքորոշումը միանգամայն հստակ է. մենք պահանջում ենք, որ տարածաշրջանի բոլոր երկրները պահպանեն լիակատար ինքնիշխանություն իրենց տարածքների նկատմամբ, հարգեն տարածաշրջանի բոլոր երկրների տարածքային ամբողջականությունը և չենք ընդունի միջազգային սահմանների որևէ փոփոխություն», – նշել է նա։

Թուրքիայում տեղի է ունեցել 6.2 մագնիտուդով երկրաշարժ, հայտնում է Android Earthquake Alerts System։

Երկրաշարժը տեղի է ունեցել Բալըքեսիր քաղաքից 49 կմ հեռավորության վրա։

Նշվում է, որ ցնցումները զգացվել են նաև Բուլղարիայում, Կիպրոսում, Հունաստանում, Ռումինիայում և Հյուսիսային Մակեդոնիայում։

Կիևը պետք է դե ֆակտո ճանաչի Ռուսաստանի Դաշնության կողմից վերահսկվող տարածքները, ոչ թե դա ձևակերպի իրավական տեսանկյունից։ Այս մասին հայտարարել է ՆԱՏՕ-ի գլխավոր քարտուղար Ռյուտեն։

Նա նշել է, որ Ուկրաինային զենքի մատակարարումները կշարունակվեն՝ անկախ Ռուսաստան-ԱՄՆ գագաթնաժողովի արդյունքից։

Օգոստոսի 10-ին Ուկրաինայի նախագահ Վլադիմիր Զելենսկին զանգահարել է Ադրբեջանի Հանրապետության նախագահ Իլհամ Ալիևին։ 

Ըստ APA-ի՝ հեռախոսազրույցի ընթացքում անդրադարձ է եղել նաև Ադրբեջանի և Ուկրաինայի միջև երկկողմ հարաբերություններին։ Մասնավորապես, ընդգծվել է, որ անցյալ ամիս Բաքվում տեղի է ունեցել երկու երկրների միջև միջկառավարական հանձնաժողովի նիստ, որի ընթացքում արդյունավետ քննարկումներ են տեղի ունեցել առևտրատնտեսական կապերի զարգացման շուրջ։

Հեռախոսազրույցի ընթացքում կողմերը դատապարտել են Ռուսաստանի կողմից ադրբեջանական SOCAR ընկերությանը պատկանող նավթի պահեստարանի և Ադրբեջանին պատկանող այլ օբյեկտների, ինչպես նաև ադրբեջանական գազը Ուկրաինա տեղափոխող գազամղիչ կայանի վրա ուղղված նպատակային ավիահարվածները և վստահություն հայտնել, որ դա ոչ մի կերպ չի հանգեցնի Ադրբեջանի և Ուկրաինայի միջև էներգետիկ համագործակցության դադարեցմանը։

Bugatti-ն հայտարարել է նոր բաժնի՝ Programme Solitaire-ի ստեղծման մասին, որը կարտադրի եզակի մեքենաներ մեկ օրինակով, գրում է Robb Report-ը։

Ի տարբերություն Sur Mesure ծրագրի, որն առաջարկում է առկա մոդելների անհատականացում, Solitaire-ը հաճախորդներին հնարավորություն կտա ստեղծել լիովին բացառիկ մեքենա՝ «առանց անալոգների»։ Արտադրությունը կսահմանափակվի տարեկան առավելագույնը երկու օրինակով։ 

Բաժնի առաջին աշխատանքը Brouillard մոդելն էր, որի պրեմիերան կկայանա Monterey Car Week-ում։ Մեքենան հիմնված է Bugatti Mistral ռոդսթերի վրա և անվանակոչվել է ապրանքանիշի հիմնադիր Էտտորե Բուգատիի սիրելի մրցարշավային ձիու՝ ձյունաճերմակ ձիու անունով։ 

Հիպերմեքենայի արտաքին տեսքը պատրաստված է երկու երանգով. կանաչի հատուկ երանգը համակցված է բաց ածխածնի հետ։ Ներքին հարդարանքը, որն ամբողջությամբ տեսանելի է ապակե տանիքի միջով, շարունակում է ձիու թեման. նստատեղի և դռների ներդիրների վրա ասեղնագործված են ձիերի պատկերներ, իսկ փոխանցման տուփի ապակե տարրի մեջ ներկառուցված է մանրանկարչական ձիու քանդակ։ Կապոտի տակ գտնվում է լեգենդար 8.0 լիտրանոց W16 շարժիչը՝ չորս տուրբո լիցքավորիչներով, որը զարգացնում է 1578 ձիաուժ, ինչպես Mistral-ը: Մինչև 100 կմ/ժ արագացումը տևում է 2.4 վայրկյան, իսկ առավելագույն արագությունը՝ 420 կմ/ժ (261 մղոն/ժ): 

Brouillard-ի գինը չի հրապարակվում, բայց գնահատվում է, որ այն զգալիորեն կգերազանցի Mistral-ի մեկնարկային գինը՝ 5 միլիոն դոլար: