Մոսկվայի վրա ուկրաինական անօդաչուների նոր հարձակումներ են եղել․ Սոբյանին

Մոսկվայի մարզի Էլեկտրոստալ քաղաքային թաղամասում նոյեմբերի 20-ի գիշերը անօդաչու թռչող սարքի հարձակում է կանխվել։ Մայրաքաղաքի քաղաքապետ Սերգեյ Սոբյանինի խոսքով՝ անօդաչու թռչող սարքը շարժվում էր դեպի Մոսկվա։ Նա պարզաբանել է, որ միջադեպը տեղի է ունեցել առանց ավերածությունների և զոհերի։ Ռուսաստանի պաշտպանության նախարարությունը նշել է, որ միջադեպը տեղի է ունեցել նոյեմբերի 19-ին` Մոսկվայի ժամանակով ժամը 23:20-ին, գրում է The Moscow Times-ը։

Նոյեմբերի լույս 19-ի գիշերը Մոսկվայի մարզի Բոգորոդսկի քաղաքային թաղամասում հերթական անօդաչու թռչող սարք է խոցվել, հայտնում են Մոսկվայի քաղաքապետն ու պաշտպանության նախարարությունը։ Ինչպես հայտնում է Shot հեռագրային ալիքը, անօդաչու թռչող սարքի բեկորներն ընկել են Մոսկվայի մարզի Գորկովսկոյե մայրուղու տարածքում։ Այս հատվածի երթեւեկությունը որոշ ժամանակով փակվել է։

Անօդաչու թռչող սարքի միջոցով մայրաքաղաքի վրա գրոհելու նախորդ փորձը գրանցվել էր հոկտեմբերի 7-ի գիշերը։ Այն ժամանակ հակաօդային պաշտպանության ուժերն անօդաչու թռչող սարքը խոցել են Իստրա քաղաքային թաղամասում։ Եվս երկու անօդաչու թռչող սարք, ըստ Մոսկվայի քաղաքապետի, ոչնչացվել է սեպտեմբերի 17-ի գիշերը Իստրայի քաղաքային թաղամասում և Մոսկվայի մարզի Ռամենսկի շրջանում։

Մայիսի սկզբից Մոսկվան և մերձմոսկովյան շրջանը անօդաչու թռչող սարքերի հարձակման են ենթարկվել ավելի քան երկու տասնյակ անգամ։ Մեկնաբանելով մայիսի 30-ի հարձակումը՝ նախագահ Վլադիմիր Պուտինը պահանջել է «խտացնել» հակաօդային պաշտպանության համակարգը։ Այն ժամանակ անօդաչու թռչող սարքերը վնասել են երեք բնակելի շենք և գրեթե գրոհել են էլիտար բնակավայրերը՝ Ռուբլևո-Ուսպենսկոե մայրուղու մոտ: