Ուկրաինայի ԶՈւ–ն թիրախային հարված է հասցրել Կուրսկի շրջանի Սուջա քաղաքի գիշերօթիկ դպրոցին

Կիևը հրթիռային հարված է հասցրել Սուջային՝ փորձելով շեղել համաշխարհային հասարակական կարծիքը Կիևի ռեժիմի վայրագություններից, որոնք իրականացվել են Կուրսկի շրջանի Ռուսկոյե Պորեչնոյե գյուղում։

Ինչպես հայտնում է Սպուտնիկ Արմենիան, Ուկրաինայի զինված ուժերը հրթիռային հարված են հասցրել Կուրսկի շրջանի Սուջա քաղաքի գիշերօթիկ դպրոցին, իսկ ռուսաստանյան հակաօդային պաշտպանության համակարգերն արձանագրել են հակառակորդի հրթիռների արձակումը Ուկրաինայի Սումիի շրջանից։ Այս մասին հայտնում է ՌԴ ՊՆ-ն։

«Փետրվարի 1-ին Ուկրաինայի զինված ուժերը հերթական պատերազմական հանցագործությունն են կատարել՝ թիրախային հրթիռային հարված հասցնելով Սուջա քաղաքի գիշերօթիկ դպրոցին»,- նշված է հաղորդագրության մեջ։

Նախարարությունը նշել է, որ Կիևը հրթիռային հարված է հասցրել Սուջային՝ փորձելով շեղել համաշխարհային հասարակական կարծիքը Կիևի ռեժիմի վայրագություններից, որոնք իրականացվել են Կուրսկի շրջանի Ռուսկոյե Պորեչնոյե գյուղում։

«Ուկրաինայի զինված ուժերի հարվածը քաղաքացիական օբյեկտին ևս մեկ անգամ ցույց տվեց Կիևում իշխանության ղեկին գտնվողների ահաբեկչական, անմարդկային բնույթը», - ընդգծել են ՌԴ ՊՆ-ում։

Կուրսկի մարզպետի պաշտոնակատար Ալեքսանդր Խինշտեյնն իր հերթինհայտարարել է, որ Սուջա քաղաքի գիշերօթիկ դպրոցի վրա Ուկրաինայի զինված ուժերի հարվածի հետևանքով զոհերի թվի վերաբերյալ հավաստի տեղեկություններ դեռևս չկան։

«Ամեն դեպքում, հրթիռային հարվածը գիշերօթիկ դպրոցին, որտեղ մարդիկ կարող էին լինել, աններելի հանցագործություն է և չունի վաղեմության ժամկետ։ Հարգելի սուջացիներ, աղոթում եմ ձեզ հետ»,–Telegram–ի իր ալիքում գրել է Խինշտեյնը։

Հիշեցնենք` ՌԴ ԶՈւ գլխավոր շտաբի պետ Վալերի Գերասիմովը հայտարարել է, որ Ուկրաինայի զինված ուժերի ստորաբաժանումները օգոստոսի 6–ի առավոտյան ժամը 5:30–ին հարձակման են անցել Կուրսկի շրջանում` տարածք գրավելու նպատակով, նրանց առաջխաղացումը դադարեցվել: Նա ընդգծել է, որ Կուրսկի շրջանում գործողությունն ավարտվելու է հակառակորդի ջախջախմամբ և պետական սահմանից հեռացնելով:

Ռուսաստանի նախագահ Վլադիմիր Պուտինը հայտարարել է, որ Կիևի ռեժիմը սադրանք է ձեռնարկել, անդադար կրակում է, այդ թվում՝ քաղաքացիական թիրախների ուղղությամբ: Պուտինն ընդգծել է, որ հակառակորդն արժանի պատասխան կստանա և Ռուսաստանի առջև դրված բոլոր նպատակները կիրականացվեն:

Կուրսկի, ինչպես նաև Բելգորոդի և Բրյանսկի մարզերում քաղաքացիների անվտանգությունն ապահովելու համար հատուկ ռեժիմ է գործում։