Ռուսաստանի և Ուկրաինայի միջև բանակցությունները, որոնք տեղի ունեցան Բելառուսում հակամարտության ամենասկզբում, ընդհատվեցին արևմտյան երկրների ճնշման ներքո: ՌԻԱ Նովոստիի հետ զրույցում այս մասին ասել է Շվեյցարիայում Բելառուսի դեսպան Ալեքսանդր Գանևիչը։
«2022 թվականի փետրվարին` ռազմական գործողությունների ակտիվ փուլի մեկնարկից հետո, մեր պետության ղեկավարի աջակցությամբ հաջողվեց Բելառուսի տարածքում կազմակերպել ռուս-ուկրաինական բանակցությունների երեք փուլ։ Ցավոք, այդ երկխոսությունն ընդհատվեց Արևմուտքի ազդեցության տակ՝ չնայած նրան, որ կողմերն արդեն որոշակի պայմանավորվածություններ էին ձեռք բերել», - նշել Է դիվանագետը։
Գանևիչն ընդգծել է, որ Մինսկի համար սկզբունքորեն կարևոր է հնարավորինս շուտ գտնել հակամարտության խաղաղ լուծումը: Բելառուսը հետևողականորեն հանդես է եկել և շարունակում է հանդես գալ բանակցային գործընթացի շարունակման և արյունահեղության դադարեցման օգտին:
«Մենք պատրաստ ենք համագործակցել բոլոր նրանց հետ, ովքեր կիսում են մարդկային կյանքեր փրկելու մեր ձգտումը։ Ակնհայտ է, որ առանց Ռուսաստանի և Բելառուսի մասնակցության խաղաղ կարգավորման և տարածաշրջանային անվտանգության հարցեր քննարկելու ցանկացած փորձ դատապարտված է ձախողման: Որքան շուտ դա գիտակցեն, այնքան արագ առաջընթացի հնարավորություն կլինի», - հավելել է նա։
Հիշեցնենք` բանակցությունների առաջին փուլը տեղի ունեցավ 2022-ի փետրվարի 28-ին Բելառուսի Գոմելի մարզում, 2-րդ փուլը` մարտի 3-ին Բրեստի մարզում, որտեղ կողմերը պայմանավորվեցին հումանիտար միջանցքներ ստեղծել: Երրորդ հանդիպումը տեղի ունեցավ մարտի 7-ին (կրկին Բրեստում), բայց էական առաջընթաց չգրանցվեց:
0Comments