Ռուսաստանը բալիստիկ հրթիռներով հարվածել է Կիևին. Մեկ մարդ մահացել է, ինը՝ վիրավորվել

«Թշնամու հարձակման արդյունքում Գոլոսեևսկի, Սոլոմենսկի, Շևչենկովսկի և Դնեպրի շրջաններում բեկորներ են ընկել։ Շենքերի տանիքներում հրդեհներ են, այրվում են նաև մեքենաներ»,- գրել է Կլիչկոն իր Telegram ալիքում։ Նրա խոսքով՝ մեկ մարդ մահացել է, եւս ինը` վիրավորվել, նրանցից չորսը հոսպիտալացվել են։

Գոլոսեևսկի թաղամասում վնասվել է ջերմային մագիստրալը։ Առանց ջերմության են մնացել 630 բնակելի շենք, 16 բուժհաստատություն, 17 դպրոց և 13 մանկապարտեզ։ «Կիևտեպլոէներգո»-ի թիմերն արդեն սկսել են աշխատել լայնածավալ վնասների հետևանքները վերացնելու ուղղությամբ»,- նշել է Կլիչկոն։ Քաղաքի ռազմական վարչակազմը նշել է, որ հարվածը, ենթադրաբար, հասցվել է ՄիԳ-31Կ-ից «Կինժալ» աերոբալիստիկ հրթիռներով, ինչպես նաև «Իսկանդեր/KN-23» բալիստիկ հրթիռներով:

Ռուսաստանի պաշտպանության նախարարությունը հայտարարել է, որ հարձակումը պատասխան է Ուկրաինայի ԶՈւ-ի հարձակմանը Ռոստովի մարզում գտնվող Կամենսկի գործարանի վրա, որն իրականացվել է 6 ATACMS հրթիռների և չորս Storm Shadow-ների օգտագործմամբ։ Գործակալության տվյալներով՝ ռուսական հարձակման թիրախը եղել է Ուկրաինայի անվտանգության ծառայության կառավարման կենտրոնը, Կիևի կոնստրուկտորական «Լուչ» բյուրոն, որը նախագծում և արտադրում է Neptune հրթիռային համակարգեր և Alder հրթիռներ, ինչպես նաև Patriot զենիթահրթիռային համակարգի դիրքերը։ «Հարվածի նպատակները ձեռք են բերվել։ Բոլոր օբյեկտները խոցվել են»,- հայտնել են ՊՆ-ից։

Նախօրեին՝ դեկտեմբերի 19-ին՝ ուղիղ գծի ժամանակ ՌԴ նախագահ Վլադիմիր Պուտինը հրավիրեց արևմտյան երկրներին պաշտպանական համակարգերի «մենամարտ» կազմակերպել Կիևում. «Եվ մենք կտեսնենք, թե ինչ կլինի», - ասել է Պուտինը: Ուկրաինայի նախագահ Վլադիմիր Զելենսկին այնուհետև Ռուսաստանի իշխանություններին անվանել է «սրիկաներ»։ «Ի՞նչ եք կարծում, սա ադեկվատ մարդ է»,- Պուտինի մասին հարցրել է նա իր ասուլիսում։