Ներդնում ենք էլեկտրոնային ծանուցումների մի ամբողջական մեխանիզմ, և եթե այդ մեխանիզմով անձը ծանուցվի, և ծանուցումը բոլոր փուլերով անցնի, ապա անկախ ամեն ինչից՝ աձը համարվելու է պատշաճ ծանուցված: Այդ մասին նախագիծն Ազգային ժողովի նոյեմբերի 11-ի նիստին առաջին ընթերցմամբ ներկայացրեց արդարադատության նախարար Սրբուհի Գալյանը:

«Ֆիզիկական անձանց պարագայում գործելու է էլեկտրոնային հարթակ, թվային միջավայր, որտեղ անձը մուտք է գործելու խիստ նույնականացման միջոցով, այսինքն՝ նույնականացման քարտի կամ բջջային նույնականացման միջոցով: Ծանուցումը տեղադրվելու է այդ հարթակում, և եթե անձը մուտք գործի հարթակ, ապա համարվելու է ծանուցված: Անձը կարող է տրամադրել իր հավելյալ կապի միջոցները՝ անձնական էլեկտոնային կոդ, հեռախոսահամար, որով նա հավելյալ կտեղեկացվի այն մասին, որ հարթակում ծանուցում է տեղադրվել»,- ասաց նա:

Եթե հարթակում ծանուցումը տեղադրելուց հետո անձը մուտք չգործի համակարգ, սկսելու է աշխատել հաջորդ քայլը, այն է՝ ծանուցումը հիբրիդային առաքանու միջոցով պատվիրված նամակով ուղարկվելու է անձի հաշվառման հասցեով: Հիբրիդային առաքանին այն է, երբ ծանուցողը որևէ ծրար կամ նամակ չի ուղարկում, այլ էլեկտրոնային ծանուցումն ավտոմատ փոխանցվում է փոստին, և փոստային ծրարավորումն ուղարկվում է անձի հաշվառման հասցեով:

«Այս տարբերակը թողել ենք, որպեսզի հնարավոր խնդիրներից խուսափենք, այսինքն՝ այն դեպքերի համար, երբ անձը չբացի և չծանոթանա ծանուցմանը, ապա ծանուցումը նրան ուղարկվի նաև փոստային առաքանու միջոցով: Եթե այս եղանակով ուղարկելուց հետո 7-րդ օրվա դրությամբ ֆիքսվում է, որ անձը չի ստացել ծանուցումը կամ հրաժարվել է ստանալ, ապա ծանուցումը տեղադրվում է azdarar.am հարթակում, այսինքն՝ իրականացվում է հրապարակային ծանուցում, և azdarar.am-ում տեղադրվելուց հետո՝ 7-րդ օրը, անձը համարվում է պատշաճ ծանուցված»,- ասաց նա: