Իրանը Միացյալ Նահանգներին որևէ ուղերձ չի ուղարկել՝ հակաիրանական պատժամիջոցները Վաշինգտոնի կողմից հանելու խնդրանքով։ Այս մասին հայտնել է Իրանի Ազգային անվտանգության բարձրագույն խորհրդի (ԱԱԲԽ) քարտուղար Ալի Լարիջանին։

Նոյեմբերի 7-ին ԱՄՆ նախագահ Դոնալդ Թրամփը հայտարարել է, որ Թեհրանը Վաշինգտոնին խնդրում է հանել Իրանի դեմ ամերիկյան պատժամիջոցները և որ ԱՄՆ վարչակազմը պատրաստ է լսել իսլամական հանրապետության իշխանություններին։

«Ոչ մի ուղերձ չի եղել ԱՄՆ-ին, բայց իրանցիները միշտ ձգտում են հանել պատժամիջոցները։ Մի՞թե ինչ-որ մեկը կարող է ասել, որ մենք պատժամիջոցներ ենք ուզում»,- «Մենք և Արևմուտքը այաթոլլա Խամենեիի աշխարհայացքում» համաժողովի շրջանակներում ասել է նա լրագրողներին։ 

Ինչպես նշել է Լարիջանին, կառավարության բոլոր գործողություններն ուղղված են հակաիրանական պատժամիջոցները հանելուն, սակայն դիվանագիտական ուղիներով որևէ ազդանշան չի ուղարկվել, քանի որ ավելի վաղ արդեն եղել էր ԱՄՆ-ի հետ բանակցություններ վարելու փորձը, որն ավարտվել էր 12-օրյա պատերազմով և իրանական միջուկային օբյեկտների ռմբակոծմամբ։

1979 թվականի նոյեմբերի 14-ին ԱՄՆ 39-րդ նախագահ Ջիմի Քարթերը ստորագրել է 12170 հրամանագիրը՝ ի պատասխան Թեհրանում ամերիկացի պատանդների գրավման։ ԱՄՆ ֆինանսների նախարարությանը հանձնարարվել է արգելափակել Միացյալ Նահանգներում բոլոր պաշտոնական իրանական ակտիվները, ներառյալ ամերիկյան բանկերում և դրանց արտասահմանյան մասնաճյուղերում ու բաժանմունքներում հաշիվները։ Փաստորեն, դա նշանակում էր առաջին պատժիչ տնտեսական միջոցառումների կիրառումն Իրանի դեմ։ 1980 թվականի ապրիլի 7-ին Քարթերը խզել է դիվանագիտական հարաբերությունները Թեհրանի հետ և արգելել ԱՄՆ-ից Իրան բոլոր ապրանքների, այդ թվում՝ սննդի և դեղորայքի արտահանումը։ Այնուհետև սահմանվել են Իրանից ԱՄՆ ցանկացած ապրանքի ներմուծման վրա էմբարգո և ամերիկացիների Իրան մեկնելու վրա արգելք։ Նոյեմբերի 6-ին Թրամփը ևս մեկ տարով երկարաձգել է Իրանի նկատմամբ այսպես կոչված արտակարգ դրության ռեժիմը, որը նախատեսում էր միակողմանի պատժամիջոցներ կիրառել իսլամական հանրապետության դեմ։