Հանրապետության տարածքում ապրիլի 7-11-ն՝ առանձին շրջաններում, օրվա ընթացքում սպասվում է կարճատև անձրև, հնարավոր է նաև ամպրոպ։

Քամին՝ հարավ-արևմտյան՝ 2-5 մ/վ: Ապրիլի 6-10-ն առանձին շրջաններում սպասվում է քամու ուժգնացում՝ 20-25 մ/վ արագությամբ։

Երևան քաղաքում ապրիլի 7-ի գիշերը սպասվում է առանց տեղումների եղանակ։

Ապրիլի 7-ի ցերեկը, 8-11-ը սպասվում է կարճատև անձրև, հնարավոր է նաև ամպրոպ։

Ճապոնիայի Նագասակի պրեֆեկտուրայի մոտակայքում ծովում հայտնաբերվել է օդային շտապօգնության այն ուղղաթիռը, որ հայտարարվել էր անհետ կորած։ Ուղղաթիռում գտնվել է վեց մարդ, որոնցից երեքը ողջ են, իսկ երեքը՝ մահացած։ Տեղեկությունը հաստատել են իշխանությունները։

Ճապոնիայի առափնյա պահպանության ծառայության փոխանցմամբ՝ կիրակի կեսօրին հաղորդում է ստացվել, որ ուղղաթիռը կորցրել է կապը՝ օդ բարձրանալով Ծուշիմա կղզու օդանավակայանից և ուղևորվելով Ֆուկուոկայի հիվանդանոց։

Որոնողական աշխատանքների ընթացքում ուղղաթիռը հայտնաբերվել է ջրի վրա։

Ըստ տվյալների՝ փրկվել են օդաչուն, մեխանիկը և բուժքույրը, նրանց գիտակցությունը տեղն է։ Իսկ բժիշկը, կին հիվանդը և նրա հարազատներից մեկը զոհվել են ։

Վթարի հանգամանքները պարզելու համար նախաձեռնվել է հետաքննություն։

Shamshyan.com-ի տեղեկություններով օրեր առաջ քրեական ոստիկանության գլխավոր վարչության և Երևանի քրեական վարչության մի քանի աշխատակիցներ մեկնել են Վրաստան ու պատճառը եղել է այն, որ քրեական ոստիկանությունում հերթական օպերատիվ տեղեկություններն են ստացվել, որ անցյալ տարվա հոկտեմբերի 1-ին Երևանում գործող «Արթմեդ» բժշկական կենտրոնից փախուստի դիմած ու տարիներ առաջ ինքնաձիգով Շենգավիթում «Շենգավիթցի Կյաժ Աշոտ»-ին սպանած «Կոկո» մականվան քրեական պատմություններով հայտնի Կոնստանտին Հունանյանը գտնվում է Վրաստանում։

ՀՀ քրեական ոստիկանները, ապա նրանց միացած Վրաստանի ոստիկանության նրանց գործընկերները պարզում են «Կոկո»-ի ենթադրյալ գտվելու վայրն ու տաք հետքերով հայտնաբերում են նրան, ով տեղափոխվում է Վրաստանում գտնվող համապատասխան բանտ։

Այս պահին կատարվում են թղթաբանական աշխատանքեր, որպեսզի «Կոկո»-ին արտահանձնեն Հայաստան։

Ինչպես ավելի վաղ հայտնել էր SHAMSHYAN.com-ը, 2024 թ․ հոկտեմբերի 1-ին Երևանի Քանաքեռ-Զեյթուն վարչական շրջանում գտնվող «Արթմեդ» բժշկական կենտրոնից փախուստի էր դիմել քրեական պատմություններով հայտնի Կոնստանտին Հունանյանը, ով ավելի շատ հայտնի է «Կոկո» մականվամբ:

Վերջինս որոշ ժամանակ բուժում էր ստացել նշված բժշկական կենտրոնում և եղել էր ՀՀ արդարադատության նախարարության քրեակատարողական ծառայության աշխատակիցների հսկողության տակ: Նշված օրը նրան իջեցրել էին  1-ին հարկ, որպեսզի հերթական բուժզննումը անցնի, և նա, ով եղել էր անվտանգության աշխատակիցների հսկողության տակ, լուսամուտից դիմել էր փախուստի: Ի դեպ, «Արթմեդ» բժշկական կենտրոնը հայտնի է նաև, որ այնտեղ միշտ բուժում են ստանում քրեական պատմություններով հայտնի անձինք: Իսկ այդ օրը փախուստի դիմած «Կոկո»-ն կալանավորվել էր տարիներ առաջ Շենգավիթում հայտնի «Կյաժ Աշոտին» ինքնաձիգով սպանելու համար:

Rate.am-ում ապրիլի 7-ի ներկայացված տարադրամի փոխարժեքներն են. 

ԱՄՆ դոլարի առքի առավելագույն արժեք է սահմանվել 388 դրամը, վաճառքի նվազագույն արժեք՝ 393.97 դրամը:

Եվրոյի առքի առավելագույն արժեք է սահմանվել 424,08 դրամը, վաճառքի նվազագույն արժեք՝ 439,38 դրամը:

Ռուսական ռուբլու առքի առավելագույն արժեք է սահմանվել 4.46 դրամը, վաճառքի նվազագույն արժեք՝ 4.79 դրամը:

Ապրիլի 8-ից երթևեկության կազմակերպման փոփոխություն կկատարվի Աբովյան փողոցում և Սայաթ-Նովայի պողոտայում: Հայտնում են Երևանի քաղաքապետարանից։

ՆԱՏՕ-ի գլխավոր քարտուղար Մարկ Ռյուտեն ասել է, որ Ռուսաստանը պետք է ԱՄՆ-ին ցույց տա Ուկրաինայում հակամարտությունը դադարեցնելու իր պատրաստակամությունը, սակայն այս պահին Կրեմլը ձգձգում է գործընթացը։ Այս մասին նա հայտարարել է CBS News-ին տված հարցազրույցում։

Նրա խոսքով՝ Վաշինգտոնը և ՆԱՏՕ-ն ջանքեր են գործադրում հակամարտությունը դադարեցնելու համար, «և որպես այդ ջանքերի մի մաս՝ ԱՄՆ-ն իսկապես ջանք չի խնայում»։ Սակայն, ըստ գլխավոր քարտուղարի, գնդակն այժմ գտնվում է Ռուսաստանի դաշտում, որը բավարար ջանք չի գործադրում հրադադարի հաստատման համար:

«Կարծում եմ, որ նրանք բավականաչափ արագ չեն գործում, և ինձ թվում է, ես նույնը լսում եմ նաև իմ ամերիկացի զրուցակիցներից, որ Ռուսաստանն իսկապես պետք է ավելին անի այս պատերազմին վերջ տալու համար», - ասել է Ռյուտեն:

«Ես խոսել եմ Մարկո Ռուբիոյի հետ, ես կանոնավոր կապի մեջ եմ ամերիկյան վարչակազմի մյուս անդամների հետ: Կարծում եմ, որ նրանք իսկապես փորձում են քայլ առ քայլ հասնել մի իրավիճակի, որտեղ այս պատերազմը կարող է ավարտվել», - ասել Ռյուտեն՝ նախքան այդ գործընթացին Ռուսաստանի հանձնառությունը կասկածի տակ դնելը:

Մայրաքաղաքում տրանսպորտային հոսքերի անցանելիությունն ավելացնելու նպատակով ս.թ. ապրիլի 8-ից երթևեկության կազմակերպման փոփոխություն կկատարվի Պռոշյան – Դեմիրճյան փողոցների խաչմերուկում: Հայտնում են Երևանի քաղաքապետարանաից։

Մասնավորապես՝ Պռոշյան փողոցից ձախ շրջադարձը դեպի Դեմիրճյան փողոց կարգելվի:

Եվրամիության երկրներն առաջիկա օրերին կփորձեն միասնական ճակատով հանդես գալ ԱՄՆ նախագահ Դոնալդ Թրամփի սահմանած մաքսատուրքերի դեմ և, ամենայն հավանականությամբ, կհաստատեն նպատակաուղղված հակաքայլերի առաջին փաթեթը մինչև 28 միլիարդ դոլարի ԱՄՆ ներմուծման դեմ՝ ատամնաթելից մինչև ադամանդ, գրում է Reuters-ը։

Նման քայլը կնշանակի, որ ԵՄ-ն կմիանա Չինաստանին և Կանադային՝ ԱՄՆ-ի դեմ պատասխան մաքսատուրքեր սահմանելու հարցում, ինչը կհանգեցնի գլոբալ առևտրային պատերազմի վաղաժամ սրացմանը, որը կթանկացնի ապրանքները միլիարդավոր սպառողների համար և ամբողջ աշխարհի տնտեսությունները կհանգեցնի ռեցեսիայի:

27 երկրների դաշինքին սպառնում են մեքենաների, պողպատի և ալյումինի ներմուծման 25 տոկոս մաքսատուրքեր, ինչպես նաև չորեքշաբթի օրվանից գրեթե բոլոր այլ ապրանքների համար 20 տոկոս մաքսատուրքեր:

Թրամփի մաքսատուրքերը ծածկում են ԵՄ-ի ԱՄՆ արտահանման մոտ 70%-ը՝ ընդհանուր 532 միլիարդ եվրո (585 միլիարդ դոլար), ընդ որում, դեռևս մաքսատուրքեր կսահմանվեն պղնձի, դեղագործական արտադրանքի, կիսահաղորդիչների և փայտանյութի վրա:

Եվրահանձնաժողովը, որը համակարգում է ԵՄ առևտրային քաղաքականությունը, երկուշաբթի ուշ երեկոյան իր անդամներին կառաջարկի ամերիկյան ապրանքների ցուցակ, որոնց վրա հավելյալ մաքսատուրքեր կդրվեն՝ ի պատասխան Թրամփի պողպատի և ալյումինի նկատմամբ մաքսատուրքերի:

Ցուցակը կներառի ամերիկյան միս, ձավարեղեն, գինի, փայտանյութ և հագուստ, ինչպես նաև մաստակ, ատամնաթել, փոշեկուլներ և զուգարանի թուղթ: Ապրանքներից մեկը, որն ավելի շատ ուշադրություն է գրավել և ԵՄ-ում տարաձայնություններ առաջացրել, բուրբոնն է: Եվրահանձնաժողովը սահմանել է 50% մաքսատուրք, ինչը դրդել է Թրամփին սպառնալ 200% հակամաքսատուրք սահմանել ԵՄ ալկոհոլային խմիչքների վրա, եթե ԵՄ-ն դիմի այդ քայլին:

Գինի արտահանողներ Ֆրանսիան և Իտալիան մտահոգություն են հայտնել։ ԵՄ-ն, որի տնտեսությունը մեծապես հենվում է ազատ առևտրի վրա, ցանկանում է լայն աջակցություն ապահովել ցանկացած պատասխանի համար, որպեսզի, ի վերջո, ճնշում գործադրի Թրամփի վրա և ստիպի նրան բանակցությունների մեջ մտնել:

Երկուշաբթի օրը Լյուքսեմբուրգում կկայանա ԵՄ-ի մասշտաբով առաջին քաղաքական հանդիպումը այն բանից հետո, երբ Թրամփը հայտարարեց մաքսատուրքերի բարձրացման մասին, ԵՄ անդամ 27 երկրների առևտրի համար պատասխանատու նախարարները կարծիքներ կփոխանակեն դրա հետևանքների և լավագույնս արձագանքելու մասին:

ԵՄ դիվանագետները հայտարարել են, որ հանդիպման հիմնական նպատակը Վաշինգտոնի հետ մաքսատուրքերը դադարեցնելու նպատակով բանակցելու ցանկության միասնական ուղերձ հաղորդելն է, ինչպես նաև հակաքայլերով պատասխանելու պատրաստակամությունը, եթե դա չհաջողվի։

Սակայն ԵՄ անդամների շրջանում կան տարբեր կարծիքներ, թե ինչպես արձագանքել: Ֆրանսիան հայտարարել է, որ ԵՄ-ն պետք է աշխատի միջոցառումների փաթեթի վրա, որը գերազանցում է մաքսատուրքերի շրջանակը, իսկ Ֆրանսիայի նախագահ Էմանուել Մակրոնն առաջարկել է եվրոպական ընկերություններին դադարեցնել ներդրումները Միացյալ Նահանգներում, քանի դեռ «իրավիճակն ավելի պարզ չի դարձել»:

Իռլանդիան, որի արտահանման գրեթե մեկ երրորդը գնում է Միացյալ Նահանգներ, կոչ է արել «կշռադատված» պատասխան տալ, մինչդեռ Իտալիան՝ ԵՄ երրորդ խոշոր արտահանողն ԱՄՆ, հարցականի տակ է դրել, թե արդյոք ԵՄ-ն ընդհանրապես պետք է պատասխան տա:

«Օրհնյալ ես դու ի կանայս, և օրհնյալ է պտուղ որովայնի քո»: (Ղուկ. Ա 42-43)

Ամեն տարի ապրիլի 7-ին Հայ Առաքելական Ս. Եկեղեցին նշում է Ս. Մարիամ Աստվածածնի Ավետման տոնը: Ամենայն Հայոց Գարեգին Բ կաթողիկոսն այդ օրը հռչակել է որպես մայրերի և մայրության բերկրանքին սպասող կանանց օրհնության օր:

Ապրիլի 7-ին բոլոր եկեղեցիներում Ս. Պատարագ է մատուցվում, և մայրության բերկրանքին սպասող կանանց օրհնության կարգ է կատարվում:

«Վեցերորդ ամսին Գաբրիել հրեշտակը Աստծո կողմից ուղարկվեց Գալիլիայի մի քաղաք, որի անունը Նազարեթ էր, մի կույսի մոտ, որ նշանված էր Հովսեփ անունով մի մարդու հետ՝ Դավթի տնից: Եվ այդ կույսի անունը Մարիամ էր: Եվ հրեշտակը, գալով նրա մոտ, ասաց. «Ուրախացի՛ր, ո՛վ շնորհընկալ, Տերը քեզ հետ է... Մի՛ վախեցի՛ր, Մարիա՛մ, որովհետև Աստծուց դու շնորհ գտար: Եվ ահա՛ դու կհղիանաս և կծնես մի որդի և նրա անունը Հիսուս կդնես: Նա մեծ կլինի և Բարձրյալի որդի կկոչվի: ... Ու նրա թագավորությունը վախճան չի ունենա»: (Ղուկ. Ա 26:33): Հրեշտակապետի ավետիսն անակնկալ էր Մարիամի համար, քանի որ նա դեռ տղամարդ չէր ճանաչել: Սակայն, իմանալով իրողությունն, ասաց. «Ահավասիկ ես մնում եմ Տիրոջ աղախինը...» (Ղուկ. 1:38):

Սա է ավետման այն գեղեցիկ պատմությունը, որ փոխանցել է մեզ Սուրբ Գիրքը: