Թուրքիայում լայնածավալ ստորագրահավաք է կազմակերպվել՝ երկրի նախագահ Ռեջեփ Թայիփ Էրդողանին անվստահություն հայտնելու եւ պետության ղեկավարի արտահերթ ընտրություններ անցկացնելու նպատակով։ Դրա նախաձեռնողը եղել է երկրի ամենամեծ ընդդիմադիր Ժողովրդահանրապետական կուսակցության առաջնորդ Օզգյուր Օզելը, գրում է «ՌԻԱ Նովոստի»-ն՝ թուրքական ընդդիմադիր հեռուստաալիքներին հղումով։
«Բառացիորեն երկուշաբթի օրվանից կսկսենք ստորագրահավաք մեր երկրի բոլոր տներով, բոլոր փողոցներով, որպեսզի Էրդողանին ցույց տանք անվստահության ամենամասշտաբային դիրքորոշումը», - ասել է Օզելը։
Նա նաեւ նշել է, որ ընդդիմությունը պատրաստ է հունիսին Թուրքիայում արտահերթ նախագահական ընտրություններ անցկացնել։ Սակայն, եթե մինչ այս պահը հնարավոր չլինի հավաքել անհրաժեշտ թվով ձայներ երկրի բնակիչներից, ապա դրանք կարող են տեղափոխվել նոյեմբեր։ Սպասվում է, որ արտահերթ ընտրություններում Ժողովրդահանրապետական կուսակցության թեկնածուն կմրցի Էրդողանի հետ։
Նախագահ Մասուդ Փեզեշքիանը հերթական անգամ մերժել Է Իրանի նկատմամբ արտաքին սպառնալիքներն ու ճնշումները՝ հայտարարելով, որ Իսլամական Հանրապետությունն այլ երկրների հետ փոխգործակցելու է փոխադարձության հիման վրա և հավասարության դիրքերից:
Ինչպես հաղորդում է IRNA-ն, Փեզեշքիանն այդ հայտարարությունն արել է ապրիլի 5-ին Թեհրանում գիտության, հետազոտությունների և տեխնոլոգիաների նախարարի և նրա տեղակալների հետ հանդիպման ժամանակ:
Անդրադառնալով տարածաշրջանային և միջազգային խնդիրներին՝ նախագահն ընդգծել է, որ այլ երկրների հետ փոխգործակցությունը կենտրոնական տեղ է զբաղեցնում Իրանի արտաքին քաղաքականության մեջ:
«Իսլամական Հանրապետությունը ցանկանում է հավասար երկխոսություն, չի կարող լինել, որ նրանք ցանկանում են բանակցել Իրանի հետ, մի կողմից, և սպառնալ նրան, մյուս կողմից», – ասել է Փեզեշքիանը՝ նկատի ունենալով Միացյալ Նահանգներին և նրա՝ Թեհրանի վրա «առավելագույն ճնշման» քաղաքականությունը:
«Եթե ցանկանում եք բանակցություններ, ի՞նչ իմաստ ունի սպառնալը»,- ասել է Իրանի նախագահը Վաշինգտոնի հասցեին: «Այսօր Ամերիկան ստորացնում է ոչ միայն Իրանին, այլև մնացած աշխարհին, քանի որ նրա պահվածքը հակասում է բանակցությունների կոչին»:
Վերջին մի քանի ամիսների ընթացքում Փեզեշքիանը բազմիցս հայտարարել է, որ Իրանը պատրաստ է ԱՄՆ-ի հետ անուղղակի բանակցությունների՝ հավասարության պայմաններով:
Իրանի արտգործնախարար Աբաս Արաղչին շաբաթ երեկոյան, Նովրուզի տոնակատարության արարողության ժամանակ Իրանի պաշտոնյաների, դեսպանների և տարբեր պետությունների ներկայացուցիչների ներկայությամբ հայտարարել է Թեհրանի պայմանները՝ միջուկային ծրագրի շուրջ բանակցությունները վերսկսելու համար, հաղորդում է Mehr-ը:
Արաղչին ընդգծել է, որ Իրանի պատասխանը ԱՄՆ նախագահի նամակին տրվել է նրա ուղերձի բովանդակությանն ու տոնայնությանը համապատասխան՝ պահպանելով դիվանագիտության հնարավորությունը։
Ըստ Իրանի ԱԳՆ ղեկավարի, ուղիղ բանակցությունները մի կողմի հետ, որը մշտապես սպառնում է ուժ կիրառել՝ խախտելով ՄԱԿ-ի կանոնադրությունը, և որի պաշտոնյաները հակասական դիրքորոշումներ են հայտնում, սկզբունքորեն, անիմաստ են։
«Սակայն մենք նախկինի պես հավատարիմ ենք մնում դիվանագիտությանը և պատրաստ ենք ուսումնասիրել անուղղակի բանակցությունների ուղին», – ասել է նա:
Աբաս Արաղչին նաև հաստատել է Իրանի միջուկային ծրագրի բացառապես խաղաղ բնույթը։
«Իրանը նախկինում մի շարք կամավոր միջոցներ է ձեռնարկել JCPOA-ի (Գործողությունների համատեղ համապարփակ ծրագիր-խմբ.) շրջանակներում՝ իր միջուկային գործունեության խաղաղ բնույթի երաշխիքներ տրամադրելու համար։ Սակայն հենց ԱՄՆ-ն էր, որ միակողմանիորեն դուրս եկավ այս համաձայնագրից:
Այժմ, ունենալով այս փորձը, մենք պատրաստ ենք Իրանի դեմ ճնշող պատժամիջոցների չեղարկման դիմաց վստահության ամրապնդման տրամաբանությունից ելնելով, վերսկսել բանակցությունները մեր միջուկային ծրագրի և պատժամիջոցների վերացման շուրջ»,- ասել է Իրանի արտգործնախարարը։
Նա ընդգծել է, որ թեև Իրանը թյուրիմացությունների և վեճերի լուծման համար հավատարիմ է մնում դիվանագիտության և երկխոսության ուղուն, սակայն պատրաստ է բոլոր հնարավոր սցենարներին։
«Իրանը դիվանագիտությանը և բանակցություններին նույնքան լուրջ է վերաբերվում, որքան հաստատակամորեն և վճռականորեն պաշտպանում է իր ազգային շահերն ու ինքնիշխանությունը», – հավելել է Աբաս Արաղչին։
Ավելի վաղ ԱՄՆ նախագահը հայտնել էր, որ նամակ է ուղարկել Իրանի գերագույն առաջնորդ այաթոլլա Ալի Խամենեիին՝ միջուկային բանակցությունների վերաբերյալ առաջարկով։
Ավելի ուշ Իրանը հայտնել էր, որ ստացել է նամակը և իր պատասխանն էր ուղարկել ԱՄՆ նախագահին։
Սակայն մարտի վերջին NBC News-ին տված հարցազրույցում Դոնալդ Թրամփը սպառնացել էր Իրանին «ռմբակոծություններով» և «երկրորդային մաքսատուրքերով», եթե երկիրը համաձայնության չգա Միացյալ Նահանգների հետ՝ երաշխավորելով միջուկային զենք չստեղծել:
«Եթե նրանք համաձայնության չգան, ռմբակոծությունները կսկսվեն: Դրանք այնպիսի ռմբակոծություններ կլինեն, ինչպիսիք նրանք նախկինում չեն տեսել», – ասել է Թրամփը Իրանի մասին:
Ներկայացնում ենք տարադրամի փոխարժեքները՝ ըստ rate.am-ի:
ԱՄՆ դոլարի առքի առավելագույն արժեքն է 389․5 դրամ, վաճառքի նվազագույն արժեքը՝ 393.5 դրամ:
Եվրոյի առքի առավելագույն արժեքն է 427.50 դրամ, վաճառքի նվազագույն արժեքը՝ 438 դրամ:
Ռուսական ռուբլու առքի առավելագույն արժեքն է 4.56 դրամ, վաճառքի նվազագույն արժեքը՝ 4.62 դրամ:
Մեծ Պահքի վեցերորդ կիրակին կոչվում է Գալստյան: Այս կիրակին Հիսուս Քրիստոսի Առաջին Գալստյան` մարդեղության հիշեցումն է: Հաստատվեց այն ճշմարտությունը, որ Փրկչի Գալստյամբ հնարավորություն ընձեռնվեց մարդկությանն առաջնորդվել փրկության ուղով:
Այս կիրակին միևնույն ժամանակ Երկրորդ Գալստյան խորհուրդն ունի: Ավետարաններում և առաքյալների թղթերում Երկրորդ Գալստյանը նվիրված բազում հատվածներ կան:
Տերը զգուշացնում է Երկրորդ Գալստյան և դրա նախանշանների մասին. «Զգույշ եղեք, գուցե մեկը ձեզ խաբի, որովհետև շատերը կգան իմ անունով ու կասեն, թե՝ ես եմ Քրիստոսը. և շատերին կմոլորեցնեն: Լսելու եք պատերազմների ձայներ և պատերազմների լուրեր… Ազգ ազգի դեմ պիտի ելնի, և թագավորությունը՝ թագավորության դեմ, և պիտի լինեն սով, համաճարակ ու տեղ-տեղ երկրաշարժներ: Սակայն այս ամենը սկիզբն է երկանց … Եվ բազում սուտ մարգարեներ պիտի ելնեն ու շատերին պիտի մոլորեցնեն: Եվ անօրինության շատանալուց՝ շատերի սերը պիտի ցամաքի: Բայց ով մինչև վերջ համբերեց, նա պիտի փրկվի» (Մատթ. 24:4-13):
Գալստյան կիրակիի խորհուրդը համբերության, բարեպաշտության, առաքինության կոչն է, որովհետև հոգու բյուրեղացմամբ և ճշմարիտ հավատով մարդ կարող է սպասել Տիրոջ Հրաշափառ Գալստյանը:
Վրաստանում վաղ առավոտյան երկրաշարժ է տեղի ունեցել, հայտնել է Սպուտնիկ գործակալության վրացական ծառայությունը:
3,6 մագնիտուդ ուժգնությամբ ցնցումները են գրանցվել 06:03-ին երկրի արևելքում՝ Թբիլիսիից 4 կմ հեռավորության վրա գտնվող Էնագետի գյուղում։ Երկրաշարժի օջախը գտնվել է 24 կմ խորության վրա։
Իրանը հաստատակամ է իր ազգային շահերը պաշտպանելու հարցում. այս մասին, Tasnim գործակալության փոխանցմամբ, ասել է արտաքին գործերի նախարար Սեյեբ Աբբաս Արաղչին:
«Թրամփի նամակին Իրանի պատասխանը տրվել է նամակի բովանդակությանն ու հնչերանգին համապատասխան, միաժամանակ պահպանվել է նաև դիվանագիտությունից օգտվելու հնարավորությունը։ Մենք հաստատակամ և լրջորեն ենք պաշտպանում մեր շահերն ու ազգային ինքնիշխանությունը։
Սկզբունքորեն, ուղիղ բանակցությունները մի կողմի հետ, որը մշտապես սպառնում է ուժի դիմել՝ խախտելով ՄԱԿ-ի կանոնադրությունը, անիմաստ կլինեն, բայց մենք հավատարիմ ենք մնում դիվանագիտությանը և պատրաստ ենք փորձել անուղղակի բանակցությունների ճանապարհը», - ասել է նա:
Արտգործնախարարը, հիշեցնելով Իրանի միջուկային ծրագրի բացարձակ խաղաղ բնույթը, ընդգծել է. «Իրանը նախկինում ընդունել է մի շարք կամավոր միջոցառումներ՝ Գործողությունների համատեղ համապարփակ ծրագրի շրջանակում՝ իր միջուկային ծրագրի բնույթի վերաբերյալ հավաստիացումներ տալու համար, սակայն ԱՄՆ-ն էր, որ միակողմանիորեն դուրս է եկել այդ համաձայնագրից: Այժմ մենք պատրաստ ենք հետամուտ լինել մեր միջուկային ծրագրի շուրջ երկխոսությանը՝ հիմնված վստահության ամրապնդման տրամաբանության վրա՝ Իրանի դեմ ճնշող պատժամիջոցների չեղարկման դիմաց»։
Հիշեցնենք, որ Իրանը մերժել է ԱՄՆ նախագահի՝ միջուկային ծրագրի շուրջ բանակցելու առաջարկը՝ հայտարարելով, որ կբանակցի միայն 3-րդ երկրների միջոցով: Ի պատասխան Թրամփը սպառնացել է ռմբակոծել Իրանը:
«Եթե նրանք գործարքի չգնան, ապա ռմբակոծություններ կլինեն: Ռմբակոծություն կլինի այնպիսին, ինչպիսին նրանք նախկինում չեն տեսել», - ասել է նա:
Իրանի նախագահ Մասուդ Փեզեշքիանն ասել էր, որ Թեհրանը Թրամփին ուղղված պատասխան նամակում մերժել Է Վաշինգտոնի՝ միջուկային ծրագրի շուրջ ուղիղ բանակցություններ վարելու առաջարկը: Բանակցությունների պատուհանը բաց է միայն երրորդ երկրների միջնորդությամբ:
Մինչդեռ դրանից առաջ ԱՄՆ նախագահն ասել էր, որ «վատ բաներ կարող են պատահել Իրանի հետ», եթե երկրի իշխանությունները համաձայնության չգան Վաշինգտոնի հետ Թեհրանի վիճահարույց միջուկային ծրագրի վերաբերյալ։
ԱՄՆ նախագահը հիշեցրել էր, թե ինչպես է նամակ ուղարկել Իրանի իշխանություններին, որում ասել է, որ այսպես թե այնպես պետք է որոշում կայացվի։ Թրամփը նշել է, որ կա՛մ Վաշինգտոնն ու Թեհրանը կխոսեն ու կքննարկեն հարցեր, կա՛մ էլ շատ վատ բաներ կկատարվեն Իրանի հետ։
«Ես չեմ ցանկանում, որ դա տեղի ունենա, նախընտրում եմ, որ մենք պայմանավորվենք Իրանի հետ: Բայց եթե հարցը չլուծենք, վատ, վատ բաներ կպատահեն Իրանի հետ», - նշել է ԱՄՆ նախագահը, որի նպատակն է թույլ չտալ Թեհրանին միջուկային զենք ստեղծել:
Ավելի վաղ հաղորդվել էր, որ Թրամփի նամակը Իրանի գերագույն առաջնորդ այաթոլլահ Ալի Խամենեիին ներառում է երկամսյա վերջնաժամկետ՝ նոր միջուկային համաձայնագրի կնքման համար: Այդ մասին Axios-ին հայտնել են նամակի բովանդակության ծանոթ մեկ ամերիկացի պաշտոնյա և երկու աղբյուր:
Պարզ չէ՝ երկամսյա ժամկետը սկսվել է նամակի առաքման պահից, թե կսկսվի բանակցությունների մեկնարկից հետո։ Բայց եթե Իրանը մերժի Թրամփի առաջարկը և չբանակցի, ապա Իրանի միջուկային օբյեկտների դեմ ԱՄՆ-ի կամ Իսրայելի ռազմական գործողությունների հնարավորությունները կտրուկ կմեծանան:
Իրանի միջուկային ծրագիրն առաջընթաց է ապրել վերջին չորս տարիների ընթացքում, և երկիրն ավելի քան երբևէ մոտ է միջուկային զենք արտադրելուն: Նրա 60% հարստացված ուրանի պաշարները մինչև 90% հարստացվելու դեպքում բավարար են վեց միջուկային ռումբի ստեղծման համար, ըստ Ատոմային էներգիայի միջազգային գործակալության: Իրանը հերքել է, որ միջուկային զենք է մտադիր ստեղծել:
Fox News-ին տված հարցազրույցում Թրամփը բացահայտել էր, որ նամակ է ուղարկել Իրանի առաջնորդին՝ առաջարկելով ուղիղ բանակցություններ վարել։ «Մենք չենք կարող թույլ տալ, որ նրանք միջուկային զենք ունենան»,- ասել էր նա։ Նամակը մի քանի օր առաջ Թրամփի բանագնաց Սթիվ Ուիթքոֆը փոխանցել է Արաբական Միացյալ Էմիրությունների նախագահ Մուհամեդ Բին Զայեդին Աբու Դաբիում կայացած հանդիպման ժամանակ։ Հետո նամակն առաքվել է Թեհրան:
Քաջատեղյակ աղբյուրները նշում են, որ Թրամփի նամակը Խամենեիին «կոշտ» էր: Մի կողմից նա առաջարկել է բանակցություններ վարել նոր միջուկային համաձայնագրի շուրջ, բայց մյուս կողմից զգուշացրել է հետևանքների մասին, եթե Իրանը մերժի առաջարկը և շարունակի առաջ մղել իր միջուկային ծրագիրը: Նամակում Թրամփը նշել է, որ չի ցանկանում անվերջ բանակցություններ վարել և նշել է երկամսյա ժամկետ՝ գործարքի հասնելու համար, ասել են երկու աղբյուրներ։
Իրանի Ֆարս նահանգի Լամարդ քաղաքում 4 մագնիտուդ ուժգնությամբ երկրաշարժ է տեղի ունեցել, հայտնում է Mehr գործակալությունը:
Ցնցումները գրանցվել են կիրակի առավոտյան ժամը 10:17-ին: Երկրաշարժի օջախը գտնվել է 9 կմ խորության վրա։ Հնարավոր ավերածությունների մասին տեղեկություններ դեռևս չկան:
Ամերիկացի միլիարդատեր և ԱՄՆ kառավարության արդյունավետության դեպարտամենտի ղեկավար Իլոն Մասկը կոչ է արել ստեղծել ԱՄՆ ազատ առևտրի գոտի Եվրամիության (ԵՄ) հետ՝ հակառակ ԱՄՆ նախագահ Դոնալդ Թրամփի քաղաքականության։
Ինչպես հաղորդում է Associated Press-ը, այս մասին նա հայտարարել է Իտալիայում Լիգայի կոնգրեսում տեսակապի միջոցով ունեցած ելույթի ժամանակ։
«Հուսով եմ, որ համաձայնություն կլինի, որ և՛ Եվրոպան, և՛ Միացյալ Նահանգները պետք է անցնեն, իմ կարծիքով, իդեալականորեն զրոյական մաքսատուրքերով իրավիճակի, ըստ էության ստեղծելով ազատ առևտրի գոտի», - ասել է նա:
Գործարարը նաև նշել է, որ ԵՄ-ում տեղաշարժի և աշխատանքի ազատությունը պետք է տարածվի նաև ԱՄՆ-ի վրա։
«Սա հենց այն խորհուրդն է, որը ես տվել եմ նախագահ [Թրամփին]»,- ընդգծել է նա։
Կենտրոնական ընտրական հանձնաժողովն իրազեկում է, որ թիվ 14 և 31 Ընտրատարածքային ընտրական հանձնաժողովները ապրիլի 6-ի նիստերում ամփոփել են մարտի 30-ի ՏԻՄ ընտրությունների վերջնական արդյունքները։
Այսպիսով, Փարաքար համայնքի ավագանու արտահերթ ընտրություններին քվեարկությանը մասնակցել է 11 528 ընտրող, ընտրական իրավունք ունեցողների թիվը 20 967 է։ Քվեարկության օրն ընտրական տեղամասում կազմված ընտրողների լրացուցիչ ցուցակում ընտրողների ընդհանուր թիվը՝ 37։
Կուսակցությունների և դաշինքի ստացած քվեները՝
«ՔԱՂԱՔԱՑԻԱԿԱՆ ՊԱՅՄԱՆԱԳԻՐ» ԿՈՒՍԱԿՑՈՒԹՅՈՒՆ՝ 3 669 քվե-7 մանդատ
«ՄԻԱՍՆՈՒԹՅՈՒՆ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ՝ 6 508 քվե-12 մանդատ
«ԱԶԳԱՅԻՆ ԱՌԱՋԸՆԹԱՑ» ԿՈՒՍԱԿՑՈՒԹՅՈՒՆ՝ 900 քվե-3 մանդատ
«ԿԱՅՈՒՆՈՒԹՅՈՒՆ» ԿՈՒՍԱԿՑՈՒԹՅՈՒՆ՝ 426 քվե-0 մանդատ։
Անվավեր քվեաթերթիկները թիվը 23 է, արձանագրվել է 6 անճշտություն։
Գյումրի համայնքի ավագանու արտահերթ ընտրություններին մասնակցել է 47 434 ընտրող, ընտրական իրավունք ունեցողների թիվը 111 236 է։
Քվեարկության օրն ընտրական տեղամասում կազմված ընտրողների լրացուցիչ ցուցակում ընտրողների ընդհանուր թիվը 35 է։
Կուսակցությունների եւ դաշինքների ստացած քվեները՝
«ՔԱՂԱՔԱՑԻԱԿԱՆ ՊԱՅՄԱՆԱԳԻՐ» ԿՈՒՍԱԿՑՈՒԹՅՈՒՆ՝ 17 188 քվե-14 մանդատ
ՀԱՅԱՍՏԱՆԻ ԿՈՄՈՒՆԻՍՏԱԿԱՆ ԿՈՒՍԱԿՑՈՒԹՅՈՒՆ՝ 9 727 քվե-8 մանդատ
«ԱՊՐԵԼՈՒ ԵՐԿԻՐ» ԿՈՒՍԱԿՑՈՒԹՅՈՒՆ՝ 1 695 քվե-0 մանդատ
«ՄԱՅՐ ՀԱՅԱՍՏԱՆ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ՝ 2 904 քվե- 2 մանդատ
«ՀԱՅԱՍՏԱՆԻ ԱՇԽԱՏԱՎՈՐԱԿԱՆ ՍՈՑԻԱԼԻՍՏԱԿԱՆ ԿՈՒՍԱԿՑՈՒԹՅՈՒՆ»՝ 652 քվե- 0 մանդատ
«ԵՎՐԱԴԱՇԻՆՔ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ՝ 2 113 քվե-0 մանդատ
«ԴԵՄՈԿՐԱՏԱԿԱՆ ԱՅԼԸՆՏՐԱՆՔ» ԿՈՒՍԱԿՑՈՒԹՅՈՒՆ՝ 1 407 քվե-0 մանդատ
«ՄԵՐ ՔԱՂԱՔԸ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ՝ 7 380 քվե-6 մանդատ
«ԻՄ ՀԶՈՐ ՀԱՄԱՅՆՔ» ԿՈՒՍԱԿՑՈՒԹՅՈՒՆ 3 739 քվե-3 մանդատ։
Անվավեր քվեաթերթիկների թիվը 607 է, անճշտությունների գումարային չափը՝ 69։
Ֆոտո
