Սերժ Սարգսյանը ժամանակին մերժել է այն առաջարկը, որի մասին խոսել է Լուկաշենկոն․ Էդուարդ Շարմազանով. Տեսանյութ

Բորելը, Լուկաշենկոն, Լավրովն ու Պուտինը և այլ երկրների ու կազմակերպությունների ներկայացուցիչներ ասում են, որ Փաշինյանն է ճանաչել Արցախը որպես Ադրբեջանի մաս, և ոչ ոք, այդ թվում՝ Ալիևները, երբեք չեն էլ ակնարկել, որ Հայաստանի նախորդ իշխանություններն են ճանաչել Արցախը որպես Ադրբեջանի մաս։ Այս մասին NEWS.am-ի թղթակցի հետ զրույցում ասել է Հայաստանի Հանրապետական կուսակցության Գերագույն մարմնի անդամ Էդուարդ Շարմազանովը։

«Սերժ Սարգսյանը ժամանակին մերժել է այն առաջարկը, որի մասին խոսում էր Լուկաշենկոն (հայտնի ձայնագրության մեջ)։ Խոսքը 5 միլիարդ դոլարի մասին է։ «Սերժ Սարգսյանը դա մերժել է»,- նշել է նա։

Շարմազանովը հիշեցրել է, որ Լուկաշենկոն միջնորդ չի եղել, իսկ միջնորդների առաջարկները հրապարակել է ԵԱՀԿ Մինսկի խմբի ռուսաստանցի համանախագահ Իգոր Պոպովը, որտեղ Ալիևի առաջարկները տեղ չեն գտել։

«Առաջարկվում էր Ադրբեջանին փոխանցել 5 շրջան, որի դիմաց Արցախը կստանա միջանկյալ կարգավիճակ, Լաչինը և Քարվաճառը կմնան Արցախի պաշտպանության բանակի վերահսկողության տակ։ Ինքը՝ Ալիևը, 2021 թվականին խոստովանել է, որ եթե չլիներ 44-օրյա պատերազմը, Լաչինը և Քարվաճառը հավերժ կմնային հայկական վերահսկողության տակ։ Լավրովը դեռ 2016 թվականի ապրիլին հայտարարել էր, որ Կազանի փաստաթուղթը մերժել է ոչ թե Երևանը, այլ Բաքուն։ Եթե նախկինում Ադրբեջանն էր բանակցությունների ապակառուցողական կողմը, ապա Փաշինյանի հայտարարություններից հետո Հայաստանը դարձավ այդպիսի կողմ»,- հավելել է քաղաքական գործիչը։

Նրա համոզմամբ՝ Փաշինյանը սպասարկում է թուրքական օրակարգը և իրականացնում Բոլթոնի քաղաքականությունը։

«2018 թվականին Բոլթոնը Երևանում հայ ժողովրդին խորհուրդ տվեց հրաժարվել պատմական օրինաչափություններից։ Սա ներառում է Արցախից, ցեղասպանությունից և ավանդական արժեքներից հրաժարվելը: Փաշինյանն անում է այն, ինչի համար իրեն իշխանության բերեցին թուրք-գլոբալիստական ուժերը։ Արցախից հրապարակայնորեն հրաժարվելուց հետո զարմանալի չէ, որ նա մի օր պետք է կասկածի տակ դնի Հայոց ցեղասպանությունը»,- ընդգծել է Շարմազանովը։

Նա հիշեցրել է, որ Հայաստանը միշտ ասել է, որ Հայոց ցեղասպանությունը պատմական և քաղաքական փաստ է, որը ճանաչվել է միջազգային բոլոր դերակատարների կողմից։

«1915 թվականի մայիսի 24-ին Անտանտի երկրները (Ռուսաստանը, Ֆրանսիան և Մեծ Բրիտանիան) համատեղ հայտարարություն ընդունեցին և Թուրքիայի գործողություններն անվանեցին մարդկության դեմ հանցագործություն, որը Լեմկինը հետագայում որակեց որպես ցեղասպանություն։ Բացի այդ, 1915 թվականին թուրքական դատարանն ինքը մահապատժի է դատապարտել Հայոց ցեղասպանության բոլոր մեղավորներին։

Փաշինյանի հայտարարությունները, թե 1939 թվականից ի վեր իբր ոչ ոք չի խոսել Հայոց ցեղասպանության մասին, ուղղված են Ռուսաստանի դեմ՝ ցանկանալով ցույց տալ, որ այդ հարցը իբր մեր օրակարգ է մտցվել Ռուսաստանի կողմից ընդդեմ Թուրքիայի։

Եթե նա իր հռետորաբանությունը տանում է դեպի դա, ապա ի՞նչ կապ ունի Ռուսաստանը դրա հետ՝ հաշվի առնելով, որ Հայոց ցեղասպանությունը ճանաչած առաջին երկիրը եղել է Ուրուգվայը։ Հետո դա արեց Կիպրոսը։ Հայոց ցեղասպանության փաստը ճանաչել են բազմաթիվ երկրներ, որոնք երբեք չեն եղել պրոխորհրդային կամ ռուսամետ:

Մեր իշխանությունները երբեք դեմ չեն եղել Թուրքիայի հետ հարաբերությունների կարգավորմանը, բայց ոչ սեփական պատմությունից հրաժարվելու գնով։ Հիմա Փաշինյանը կատարում է Թուրքիայի բոլոր պայմանները և իրականացնում է Հայաստանի թուրքացման գործընթացը»,- ասել է Շարմազանովը։

Նա պարզաբանել է, որ Հայաստանի նախկին նախագահներից ոչ մեկը տարածքային պահանջ չի ներկայացրել ո՛չ Թուրքիային, ո՛չ Ադրբեջանին, Արցախի հարցն ընթանում էր ժողովրդի ինքնորոշման իրավունքի տրամաբանությամբ, և միայն Փաշինյանի քայլերից ու հայտարարություններից հետո է հակամարտությունը տարածքային դարձել։

«Փաշինյանից առաջ Հայաստանի բոլոր նախկին իշխանությունները Թուրքիայի հարցում ձգտել են վերականգնել պատմական արդարությունը և կանխել ցեղասպանությունները»,- եզրափակել է Շարմազանովը։