2024 թվականին ՀՀ ՆԳՆ Պարեկային ծառայության աշխատակիցները հետիոտների կողմից ոչ սահմանված վայրով փողոցն անցնելու համար կազմել են 19 հազար 470 արձանագրություն։ Այս մասին հայտնել են ՆԳՆ մամուլի ծառայությունից` պատասխանելով Sputnik Արմենիայի գրավոր հարցմանը։
2024 թվականին, ընդհանուր առմամբ, ՀՀ վարչական իրավախախտումների վերաբերյալ օրենսգրքի 131–րդ հոդվածի 1–ին, 2–րդ և 3–րդ մասերի համաձայն արձանագրվել է 27.457 իրավախախտում։
«Հետիոտների կողմից ոչ սահմանված վայրով անցնելու համար կազմված 19.470 արձանագրություններով հավաքագրվել է 63 մլն 852 հազար 942 դրամ։ Իսկ ընդհանուր ` 27.457 իրավախախտման համար հավաքագրվել է 107 մլն 2765 դրամ»,–հայտնել են ՆԳՆ–ից։
Հիշեցնենք` ավելի վաղ ՆԳ նախարար Արփինե Սարգսյանը հայտարարել էր, որ եթե այդ ուղղությամբ ավելի ինտենսիվ աշխատանքներ տարվեին, գրանցված իրավախախտումների թիվը շատ ավելին կլիներ։ Նա նշել էր, որ 2 ուղղությամբ աշխատանք ունեն անելու. նախ պարեկային ծառայողները պետք է ավելի աչալուրջ լինեն և արձանագրեն խախտումները և երկրորդ` պետք է քաղաքացիական նախաձեռնությունը դարձնել օրենսդրական նախաձեռնության մաս։
Նշենք, որ կա քաղաքացիական նախաձեռնություն, որ հետիոտնի համար սահմանված վայրով չանցնելը պետք է ավելի խիստ վարչական պատասխանատվություն ենթադրի։
Նախարարն ընդգծել էր, որ այդ նախաձեռնությամբ իրենք ոչ թե զուտ տուգանքի չափը մեծացնելու միտում ունեն, այլ անվտանգ ձևով ճանապարհն անցնելու տրամաբանություն զարգացնելու , որովհետև շատ հաճախ անմեղ թվացող անցումը կարող է բերել ընդհուպ մինչև մահվան ելքով պատահարի։
0Comments