Այն, ինչ տեղի է ունենում այսօր, հայ-ադրբեջանական կարգավորման հետ ոչ մի առնչություն չունի, դա ավելի շատ առնչություն ունի տարածաշրջանում Ռուսաստանի դերի և կարգավիճակի հետ: Դրա մասին NEWS.am-ի թղթակցի հետ զրույցում հայտարարել է Արցախի նախկին արտգործնախարար Կարեն Միրզոյանը։
Նա նշել է, որ այսօր փորձեր են արվում նվազեցնելու Ռուսաստանի Դաշնության դերը Հարավային Կովկասում, մի քայլ, որին Մոսկվան երբեք չի դիմի՝ հաշվի առնելով իր համար այս տարածաշրջանի աշխարհաքաղաքական նշանակությունը։
«Ակնհայտ է, որ Պուտինի Բաքու այցի հիմնական օրակարգը հենց այդ հարցն էր։ Ռուսաստանի Դաշնության և Արևմուտքի միջև լիակատար առճակատում կա, և մեր տարածաշրջանը դարձել է առճակատման ասպարեզներից մեկը նաև Հայաստանի իշխանությունների որոշակի քայլերի արդյունքում»,- նշել է Միրզոյանը։
Դիվանագետը պարզաբանել է, որ Ռուսաստանը հետապնդում է իր շահերը և տարածաշրջանում տեղի ունեցող իրադարձություններում իր համար վտանգավոր երևույթներ է տեսնում և որոշակի քայլեր է ձեռնարկում։
«Ադրբեջանը չի հրաժարվել Հայաստանի տարածքով անցնող միջանցքից։ Սակայն սա ավելի գլոբալ խնդիր է, որում ներգրավված է նաև Թուրքիան, ուստի այն պետք է դիտարկել ռուս-թուրքական հարաբերությունների համատեքստում, որտեղ նույնպես ամեն ինչ այդքան հարթ չէ։
Ռուսաստանն իր հերթին համոզված է, որ 2020 թվականի նոյեմբերի 9-ի հայտարարության 9-րդ կետը կարող է օգնել պահպանել իր ներկայությունը տարածաշրջանում»,- հավելել է Կարեն Միրզոյանը։
Նրա գնահատմամբ՝ Երևանի և Մոսկվայի միջև դիվանագիտական երկխոսությունն անկում է ապրել՝ հասնելով՝ «Հիմարն ինքդ ես» մակարդակի։
«Միևնույն ժամանակ, մեր պետական շահերը ենթադրում են կշռադատված հարաբերություններ հաստատել տարածաշրջանի երկրների և տարածաշրջանում շահեր հետապնդող երկրների հետ»,- նշել է դիվանագետը։
Նա չի կարծում, թե Հայաստանի կողմից Ռուսաստանի դեմ կտրուկ քայլեր կլինեն, քանի որ Ռուսաստանի Դաշնության հետ տնտեսական սերտ կապեր գոյություն ունեն։
«Նրանք, ովքեր փորձում են հրաժարվել Ռուսաստանի Դաշնության հետ սերտ համագործակցությունից, իրական այլընտրանք չեն առաջարկում»,- հայտարարել է նախկին նախարարը։
Նա շատ վտանգավոր ցուցանիշ համարեց այն, որ երկրի ղեկավարը (Լուկաշենկոն-խմբ.) իրեն թույլ է տալիս խոսել ինքնիշխան պետության (Հայաստանի) մասին այն տոնով, որով նա արտահայտվում էր։
«Դա վկայում է միջազգային ասպարեզում Հայաստանի իմիջի մասին։ Իսկ եթե այսպես շարունակվի, նման հայտարարություններ կարող են անել այլ երկրների ղեկավարները։ Դա անհետևողական, անբացատրելի, միջազգային ասպարեզում չընկալվող տարօրինակ գաղափարների վրա հիմնված արտաքին քաղաքականության արդյունք է։
Բացի դրանից, տարօրինակ միտում կա, երբ Հայաստանի իշխանությունները որոշ երկրների հայտարարություններին շատ արագ են արձագանքում, իսկ մյուս դեպքերում հայերի և Հայաստանի դեմ հարձակումներն անտեսում են»,- եզրափակել է Միրզոյանը։
0Comments