Լեհաստանի նախագահ Անջեյ Դուդան խնդրել է երկրի կառավարությանը երաշխավորել, որ Իսրայելի վարչապետ Բենիամին Նեթանյահուն կկարողանա ներկա գտնվել այս ամսվա վերջին սպասվող Օսվենցիմի ազատագրման 80-ամյակին նվիրված միջոցառումներին՝ առանց ձերբակալության վտանգի։
Դուդան Լեհաստանի կառավարությանը խնդրել է պաշտպանել Նեթանյահուին ձերբակալությունից՝ հայտնել է Դուդայի գլխավոր օգնական Մալգոժատա Պապրոցկան՝ հաղորդում է լեհական PAP լրատվական գործակալությունը:
Պապրոցկան ասել է, որ Իսրայելի կառավարության յուրաքանչյուր պաշտոնյա և քաղաքացի պետք է իրավունք ունենա մասնակցելու տարելիցի տոնակատարություններին և նշել, որ Նեթանյահուի՝ Լեհաստանում մնալու ապահովման հետ կապված «բոլոր գործիքները» գտնվում են Դոնալդ Տուսկի կառավարության ձեռքում։
Նեթանյահուն միջազգային հետախուզման մեջ է հայտնվել այն բանից հետո, երբ ռազմական հանցագործությունների գործերով աշխարհի գլխավոր դատարանը՝ Միջազգային քրեական դատարանը, նրան և այլ անձանց ձերբակալելու հրաման է տվել՝ պայմանավորված Գազայում 15-ամսյա պատերազմով՝ մեղադրելով նրանց մարդկության դեմ հանցագործությունների մեջ:
Տեղեկություններ կան, որ հրամանը կարող է խանգարել Նեթանյահուին մեկնել Լեհաստան՝ մասնակցելու 1945 թվականի հունվարի 27-ին խորհրդային զորքերի կողմից Աուշվից-Բիրկենաու մահվան ճամբարի ազատագրման տարեդարձին նվիրված հիշատակի միջոցառումներին:
Լեհաստանը, որպես Միջազգային քրեական դատարանի մասին համաձայնագիր ստորագրած կողմ, պարտավորված կլիներ ձերբակալել նրան։ Իսրայելը ՄՔԴ-ի անդամ չէ և վիճարկում է նրա իրավասությունը:
Դատարանի անդամ է ավելի քան 120 պետություն, թեև որոշ երկրներ, այդ թվում՝ Ֆրանսիան, արդեն հայտարարել են, որ չեն ձերբակալելու նրան։
Արարողությանը կմասնակցեն միջազգային բարձրաստիճան պաշտոնյաներ և ողբերգությունից փրկված տարեցներ։ Միջոցառումը տեղի կունենա Օսվենցիմում, քաղաք, որը Երկրորդ համաշխարհային պատերազմի ժամանակ գերմանական օկուպացիայի տակ էր, և որտեղ նացիստական ուժերը ստեղծել էին մահվան ճամբարներից ամենատխրահռչակները:
0Comments