Քանի որ այս պահին ուժերը հավասար չեն, հետևաբար Հայաստանին պետք է միջնորդ Ադրբեջանի հետ բանակցություններում հավասարակշռությունը պահպանելու համար, սակայն Փաշինյանը փորձում է ամեն գնով ռուսներին դուրս բերել տարածաշրջանից, և պարզ է, որ չի դիմի նրանց: Դրա մասին NEWS.am -ի թղթակցի հետ զրույցում նշել է քաղաքական վերլուծաբան Արգիշտի Կիվիրյանը։
«Չէ՞ որ Ռուսաստանում հայտարարեցին, որ ունեն բոլոր անհրաժեշտ քարտեզները սահմանազատման և սահմանագծման համար, որ կարող են տրամադրել դրանք և միջնորդ դառնալ։ Սակայն դա նշանակում է Ռուսաստանի պահպանում տարածաշրջանում, ինչը չի տեղավորվում Ռուսաստանին տարածաշրջանից դուրս բերելու՝ Հայաստանի իշխանությունների քաղաքականության մեջ, անգամ Հայաստանն ադրբեջանական նահանգ դարձնելու գնով։ Իշխանությունները ՀՀ ինքնիշխանության համար պայքարի կարգախոսներով Հայաստանը դարձրին ադրբեջանական գավառ։ Արևմուտքը, ըստ Փաշինյանի, պետք է դառնար Հայաստանի անվտանգության երաշխավորը, եթե Երևանը իջեցներ նշաձողը Ղարաբաղի հարցում: Իսկ ի՞նչ մնաց Արցախից հետո։ Արևմուտքը ցույց տվեց, որ Ադրբեջանի վրա Արցախի հարցում որևէ լծակ չունի»,- նշել է Կիվիրյանը։
Նրա խոսքով՝ Հայաստանի իշխանությունների միակ գործառույթը Ռուսաստանին տարածաշրջանից հեռացնելն ու Իրանի մուտքը թույլ չտալն է։
«Թուրքիան և Ադրբեջանը հանգիստ լուծում են իրենց խնդիրները Ռուսաստանի հետ, և հայ-ռուսական հարաբերությունները դարձել են ամենալարվածը տարածաշրջանում։ Նույնիսկ Ռուսաստանը Վրաստանի հետ այդքան լարված հարաբերություններ չունի»,- ընդգծեց փորձագետը։
0Comments