«Հրապարակ» թերթը գրում է. «Վիլեն Գաբրիելյանի` մանդատից հրաժարվելու որոշման հարցում ՔՊ-ում հակասական տեղեկություններ են պտտվում։ Նրա մտերիմները վստահեցնում են, որ որոշումը Վիլենինն է, որ «օյաղանալուց» հետո նա անձամբ դիտել է Գյումրիում իր արկածների տեսանյութերը եւ հասկացել, որ անվայելուչ վարք է դրսեւորել, ու մտերիմներին վստահեցրել է, որ պարտավոր է պատասխան տալ, ու մանդատից հրաժարվելու որոշումը Գյումրու դեպքերի հաջորդ օրը չի հրապարակել միայն ընկերների խնդրանքով, որոնք փորձել են համոզել, որ հետ կանգնի:

ՔՊ-ի մյուս թեւը ճիշտ հակառակն է պնդում՝ Վիլեն Գաբրիելյանը, նախապես իմանալով, որ երեքշաբթի օրը վարչությունում իր հարցը լուծվելու է, առաջ է ընկել ու տարածել նման հայտարարություն։

Գյումրու դեպքերի հաջորդ օրը նա եղել է ԱԺ-ում, շփվել գործընկերների հետ եւ լուտանքներ ստացել նրանցից, թե ինչպես կարող էր խայտառակել իրենց: Երեկոյան, երբ տեղեկացրել են, որ իր հարցը հասել է վարչություն, ու պետք է ներկայանա բացատրություններ տալու, շտապել է հայտարարություն անել։

Մանդատից հրաժարվելու հայտարարությունում նա նշել է․ «ԱԺ պատգամավորն իր առաքելությունում պարտավոր է չդրսեւորել անհարկի վարքագիծ», եւ տեղեկացրել է, որ ինքնառաջադրվում է ՔՊ կուսակցության վարչության առաջիկա ընտրություններում՝ որպես վարչության անդամի թեկնածու։

«Ինձ համար միանշանակ է, որ մեր կուսակցությունն ունի լրջագույն առողջացման եւ կերպարանափոխման կարիք»,- գրել է Վիլեն Գաբրիելյանը՝ առանց մանրամասնելու, թե ինչ առողջացման մասին է խոսքը:

Մեր աղբյուրի փոխանցմամբ՝ վերջին միտքը եւս հուշում է, որ Գաբրիելյանն ինքնակամ չի հեռանում եւ ակնարկում է, որ կուսակցությունում «հիվանդներ» շատ կան, ինքը միակը չէ»:

Առավել մանրամասն թերթի այսօրվա համարում

«Միասնական» ընդդիմությունն անհամբեր սպասում է Վարդան Ղուկասյանի՝ Գյումրու քաղաքապետ դառնալուն։ Եթե դարձավ, կարելի կլինի «հանգիստ խղճով» շնորհավորել «միասնական» ընդդիմությանը փառահեղ հաղթանակի առիթով։ Բա ո՞նց չշնորհավորել։ Չէ՞ որ 7 տարվա պայքարի արդյունքում նման հաղթանակ ունեցանք՝ Վարդան Ղուկասյանը դարձավ քաղաքապետ։ Այն էլ Հայրաքաղաքի քաղաքապետ։ Այս մասին գրում է քաղաքագետ Հրանտ Մելիք-Շահնազարյանը։

«Բայց ի՞նչ կտա դա «միասնական» ընդդիմությանը։ Ինձ իսկապես հետաքրքիր է՝ ինչի՞ մասին էր մտածում «միասնական» ընդդիմությունը Գյումրու ընտրություններին մասնակցելու որոշում կայացնելիս։ Ընդհանրապես ինչի՞ մասին էր այս ողջ պրոցեսը։ Նրա, որ Վարդան Ղուկասյանը քաղաքապետ դառնա՞։ Թե՞ ավելի հեռուն գնացող նպատակներ էլ կային։ Եթե այո, ապա Ղուկասյան քաղաքապետը պարզապես խաչ է քաշում բոլոր այդ ծրագրերի վրա։ Որովհետև նրա՝ քաղաքապետ դառնալուց հետո ընդդիմության մասին «միասնական» բառն արդեն չակերտներով էլ հնարավոր չի լինի գրել։

Բայց հիմա դա էլ մի կողմ դնենք։ Ես էլի հարցեր ունեմ։ Օրինակ, ո՞րն է «միասնական» ընդդիմության ղուկասյանական թևի (այո, հիմա արդեն կարելի է նրանց համարձակ ղուկասյանական թև կոչել) նպատակը. Գյումրին ՔՊ-ական քաղաքապետ չունենա, թե՞ Վարդան Ղուկասյանը դառնա Գյումրու քաղաքապետ։ Եթե առաջին տարբերակն է, ապա պատրա՞ստ են արդյոք իրենք քվեարկել Մարտուն Գրիգորյանի օգտին։ Ենթադրենք Մարտունը շատ վատն է, եսասեր, անձնական շահը սիրող և այլն, և այլն… Պատրա՞ստ է արդյոք «միասնական» ընդդիմության ղուկասյանական թևը քվեարկել այդպիսի մարդու օգտին, միայն թե Գյումրին ՔՊ-ական քաղաքապետ չունենա։ Ցավոք, հարցը հռետորական է։

Բայց ուրիշ հարց տամ՝ ավելի իրատեսական։ Պատրա՞ստ է արդյոք «միասնական» ընդդիմության ղուկասյանական թևը Գյումրու քաղաքապետի այլ թեկնածու առաջարկել։ Թեկուզ հենց Վարդան Ղուկասյանի ցուցակից։

…Մարտուն Գրիգորյանն արդեն խոստացել է, որ Գյումրին ՔՊ-ական քաղաքապետ չի ունենալու։ Ես հավատում եմ նրա խոստմանը։ Բայց նաև գիտեմ, որ այդ խնդիրը լուծելու տարբեր ուղիներ և ձևեր կան։ Սակայն տեսնում եմ, որ «միասնական» ընդդիմության ղուկասյանական որևէ նման տարբերակները քննարկելու տրամադրվածություն չունի։ Համենայն դեպս՝ հանրային դաշտում դա չի երևում։ Մինչդեռ շտապելու որևէ առիթ չկա։ Լավ կլիներ, եթե «միասնական» ընդդիմությունը փորձեր այս խնդիրը դիտարկեր ոչ միայն Գյումրու, այլև ամբողջ երկրում շատ սպասվող հետագա քաղաքական զարգացումների կոնտեքստում։ Հնարավոր է՝ վերջում պարզվի, որ ինչի համար այսօր այդքան ջանասիրաբար քննադատում են (մեղմ եմ ասում) Մարտուն Գրիգորյանին, վաղը դրա համար շնորհակալություն հայտնեն նրան։

Հատուկ տաղանդավորների համար ուզում եմ նշել, որ առաջարկս չշտապել և լավագույն լուծումը իրական միասնության և գործընկերային մթնոլորտում գտնելն է։ Ի վերջո, քաղաքականությունը հնարավորությունների արվեստ է։ Չեմ բացառում, որ հենց Վարդան Ղուկասյան քաղաքապետն է այդ լավագույն լուծումը, բայց, անկեղծ ասած, խիստ կասկածում եմ»,– գրել է նա։

«Ժողովուրդ» օրաթերթը գրում է. ««Ժողովուրդ» օրաթերթի իրազեկ աղբյուրները փոխանցում են, որ ՀՀ ներքին գործերի նախարար Արփինե Սարգսյանը երեխայի է սպասում:

Տեղեկացնենք, որ նա երկար տարիներ ամուսնացած է, բայց նոր պետք է ծնվի նրա առաջնեկը: «Ժողովուրդ» օրաթերթը տեղեկացավ նաեւ, որ Արփինե Սարգսյանին համակարգում սկսել են խնայել, շատ չբարկացնել, քանի որ այնպիսի վիճակում է, որ պետք է ոչ միայն նախարարի, այլեւ նրա ծնվելիք բալիկի առողջության մասին մտածել: Եվ սա բավականին արտասովոր վիճակ է համակարգի համար: Բավական չէ, որ կին է ղեկավարում ուժային կառույցը, որը անսովոր էր համակարգի համար, հիմա էլ մայրիկ է դառնում, պետք է խնայել նրան:

«Ժողովուրդ» օրաթերթը տեղեկացավ նաեւ, որ մայրական արձակուրդով պայմանավորված՝ ամիսներ անց Արփինե Սարգսյանը չի հաճախելու աշխատանքի: Սա նշանակում է, որ Նիկոլ Փաշինյանը պետք է Արփինե Սարգսյանին փոխարինող փնտրի»։

Առավել մանրամասն թերթի այսօրվա համարում

ՀՀ ԱԺ նախագահ Ալեն Սիմոնյանի հրավերով ապրիլի 1-ին Հայաստան է ժամանել Վիետնամի Սոցիալիստական Հանրապետության Ազգային ժողովի նախագահ Չան Թան Մանի գլխավորած պատվիրակությունը: Հայտնում են ԱԺ-ից։

«Զվարթնոց» օդանավակայանում հյուրերին դիմավորել են ՀՀ ԱԺ նախագահի տեղակալ Հակոբ Արշակյանը եւ ՀՀ ԱԺ Հայաստան-Վիետնամ բարեկամական խմբի ղեկավար Հասմիկ Հակոբյանը:

Վրաստանի խորհրդարանը երրորդ և վերջին ընթերցմամբ ընդունել է հեռարձակման մասին օրենքը, որն արգելում է արտասահմանից հեռուստաալիքների ֆինանսավորումը։ Այս մասին հաղորդում է ՏԱՍՍ գործակալությունը:

«Հեռարձակման մասին» օրենքում փոփոխություններին կողմ է քվեարկել 86 պատգամավոր։ Ոչ ոք դեմ չի արտահայտվել։

Օրենքի համաձայն՝ արգելք է սահմանվում «օտարերկրյա ուժի» կողմից հեռուստաալիքների ֆինանսավորման վրա։ Դրա պատճառը, ինչպես նշված է բացատրական գրության մեջ, այն է, որ տեղեկատվությունը, որը տարածում են հեռուստահեռարձակողները և ռադիոհեռարձակողները, մեծ վստահություն է վայելում և կարող է ձևավորել հասարակական կարծիք։ Թույլատրվում է միայն արտասահմանից վճարված կոմերցիոն գովազդը, հեռուստաշոփինգը և գովազդային արտադրանքի զետեղումը հեռուստատեսային ծրագրերում:

«Օտար ուժ» ասելով՝ նկատի է առնվում սուբյեկտ, որը մտնում է օտարերկրյա պետության համակարգի մեջ, ֆիզիկական անձ, որը Վրաստանի քաղաքացի չի հանդիսանում, իրավաբանական անձ, որը գրանցված չէ Վրաստանում, կամ կազմակերպություն, որն աշխատում է օտարերկրյա պետության իրավասության ներքո:

Այսօր՝ ապրիլի 1-ին, ավտովթար է տեղի ունեցել Արարատի մարզում։ Ինչպես հայտնում է Shamshyan.com-ը, ժամը 19։20-ի սահմաններում Երևան-Երասխ ավտոճանապարհի 30 կմ հատվածում բախվել են «IVECO» մակնիշի բեռնատարը և «ՎԱԶ 2107» մակնիշի ավտոմեքենան, ինչի հետևանքով վերջին հայտնվել է ճանապարհի բաժնարար գոտու բետոնե արգելապատնեշի վրա։

Վթարի հետևանքով 1 հոգի տեղափոխվել է «Արտաշատ» բժշկական կենտրոն։

Դեպքի փաստով քննչական վարչությունում նախաձեռնվել է քրեական վարույթ, որտեղ էլ պարզվում են վարորդների և վիրավորի ինքնությունը։

Ադրբեջանի արտաքին գործերի նախարար Ջեյհուն Բայրամովը հանդիպել է Եվրոպական արտաքին կապերի ծառայության գլխավոր քարտուղարի տնտեսական և գլոբալ հարցերով տեղակալ Սայմոն Մորդյուի և Հարավային Կովկասի և Վրաստանի ճգնաժամի հարցերով հատուկ ներկայացուցիչ Մագդալենա Գրոնոյի հետ:

Քննարկվել են Ադրբեջանի և Եվրոպական Միության համագործակցության ներկա վիճակն ու հեռանկարները, ինչպես նաև տարածաշրջանային և Միջազգային փոխադարձ հետաքրքրություն ներկայացնող հարցեր:

Մասնավորապես, նշվել է, որ Բաքվի նախաձեռնությամբ էներգետիկ ոլորտում իրականացվող խոշոր նախագծերը կարևոր դեր են խաղում Եվրոպայի էներգամատակարարման և անվտանգության ոլորտում:

Բայրամովը նաև տեղեկություններ է տրամադրել տարածաշրջանում առկա իրավիճակի մասին: Հանդիպմանը մտքեր են փոխանակվել նաև փոխադարձ հետաքրքրություն ներկայացնող այլ հարցերի շուրջ:

ԱՄՆ նախագահ Դոնալդ Թրամփը 2024 թվականի 2,3 միլիարդ դոլարից 2025 թվականին իր կարողությունը հասցրել է 5,1 միլիարդ դոլարի:

Այս մասին հայտնել է Forbes ամսագիրը՝ աշխարհի ամենահարուստ մարդկանց 39-րդ վարկանիշում: Ամսագրի գնահատմամբ՝ «միլիարդատերերից քչերն են ավելի հաջող տարի ունեցել, քան Դոնալդ Թրամփը, և ոչ միայն այն պատճառով, որ նա կրկին դարձել է ԱՄՆ նախագահ: Սպիտակ տուն վերադառնալուց առաջ նա զգալիորեն ավելացրել է իր կարողությունը կրիպտոարժույթի եկամտաբեր ներդրումների շնորհիվ»:

Forbes-ի տվյալներով՝ Թրամփի կարողության հիմնական աղբյուրը անշարժ գույքն է: Նրան են պատկանում նաև գոլֆի ակումբներ, շքեղ առանձնատներ, գինեգործարան և 1991 թվականի արտադրության Boeing 757-200 ինքնաթիռ, որը հայտնի է որպես Trump Force One:

Ընդհանուր առմամբ, ցուցակում ընդգրկվել է ավելի քան 3 հազար մարդ, որոնց կարողությունը միասին կազմել է 16,1 տրիլիոն դոլար: Ինչպես նշում է Forbes-ը, առաջին անգամ երեք միլիարդատեր ունի ավելի քան 200 միլիար դոլար կարողություն:

ԵՊՀ «Եվրոպական ուսումնասիրությունների կենտրոնի» ղեկավար, քաղաքական գիտությունների թեկնածու, դոցենտ Վլադիմիր Մարտիրոսյանը ֆեյսբուքյան իր էջում գրել է․

«Քանի որ ալկոհոլային գաստրոլների բացառապես կադրերի առկայությունը դարձավ որոշիչ, որ լինի այն ինչ եղավ, հնարավո՞ր է պատահաբար հայտնի «ձեռքերը բռնել տալու ու մարդու վրա թքելու» կադրերն էլ լինեն:

Ալկոգաստրոլյորի պահվացքը և թքասերի արարմունքը համադրելի չեն: Թքասերինը առավել նենգ ու ստոր երևույթ էր: Սկզբունքայինության ողջ պերճանքը նրանում է, որ արդյունքում ալկոգաստրոլյորը հենց թքասերին է ներկայացնում վայր դնելու դիմում, իսկ թքասերը ի պաշտոնե դեռ կա:

Կադրերի և տեսանյութերի առկայությունը որոշում է ամեն ինչ, քանի որ ներքին սկզբունքների և սոլիդության մասին սրանց պատկերացումները մեղմ ասած շատ ճկվող ու ճկուն են: Էդ զղջման տեքստերին և ներողություններին երբեք չհավատաք: Չլինեին կադրերն ու տեսանյութերը, ապացույցները, որևէ մեկը չէր ընդունելու տեղի ունեցածը, կարգավիճակը, խոսքերը ու իր մեղքը: Կա կադր և տեսանյութ, ուրեմն կա մեղք և պատասխան, չկա տեսանյութ, չկա մեղք ու չկա պատասխանատվություն: Էդ անկեղծության ու սկզբունքայինության լավաշները թողեք ՔՊ-ի ներքին չատերում:

Видеоկադրы решают всё:

P.S. Գյումրիում ոչ ոք առայժմ չի հաղթել: Միակ մասնագիտական և բարձրորակ հաղթանակը գրանցել են Գյումրիում այդ օրը աշխատող լրագրողները»:

Նոր քրեական հետապնդում է սկսվել գեներալ-գնդապետ Մովսես Հակոբյանի  նկատմամբ։ Ըստ մեղադրանքի, Հակոբյանի պաշտոնեական անփութության հետևանքով, 9 տարի առաջ Ռուսաստանից Հայաստանին անպիտան ռազմական տեխնիկա է մատակարարվել։ Այս մասին հայտնում է 1lurer.am-ը։

Նրանից բացի,  մեղադրյալի աթոռին է  ԶՈՒ հրթիռային զորքերի և հրետանու վարչության նախկին պետ, գեներալ-մայոր Արմեն Հարությունյանը։ 

Պայամանագիրը ստորագրել էր Մովսես Հակոբյանը․ արդյունքում ձեռք է բերվել ավելի քան 4,3 մլրդ դրամի ռազմական տեխնիկա։