Փրկարար ծառայությունը տեղեկացնում է, որ ՀՀ տարածքում ավտոճանապարհները հիմնականում անցանելի են։

Փակ է Արագածոտնի մարզում «Ամբերդ» բարձր լեռնային օդերևութաբանական կայանից Քարի լիճ ավտոճանապարհը։

Դիլիջանի ոլորաններում մառախուղ է։ Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տեսակի տրանսպորտային միջոցների համար։

ԱՄՆ նախագահ Դոնալդ Թրամփը Չինաստանից ներկրվող ապրանքների մաքսատուրքերը բարձրացրել է մինչև 145 %, հայտնում է CNBC հեռուստաալիքը՝ վկայակոչելով Սպիտակ տունը:

«Սպիտակ տունը պարզաբանում է, որ չինական ապրանքների համար սահմանված մաքսատուրքերն այժմ կազմում են 145 %», – ասվում է հաղորդագրությամբ:

Ավելի վաղ ԱՄՆ նախագահը չինական ներմուծման նկատմամբ մաքսատուրքերը սահմանել էր 125 %: Նախօրեին հայտնի է դարձել նաև, որ Չինաստանը ապրիլի 10-ից կբարձրացնի ԱՄՆ-ից ներկրվող բոլոր ապրանքների սակագների լրացուցիչ դրույքաչափը՝ 34%-ից դարձնելով 84%:

Երևանում ապրիլի 10-ի ցերեկը, 11-15-ին սպասվում է կարճատև անձրև, հնարավոր է նաև ամպրոպ։ Ապրիլի 10-ին սպասվում է քամու ուժգնացում՝ 17-20մ/վ արագությամբ։

Մարզերում ապրիլի 10-ի ցերեկը շրջանների զգալի մասում, 11-15-ին` առանձին շրջաններում օրվա ընթացքում սպասվում է անձրև և ամպրոպ, ապրիլի 10-ին առանձին հատվածներում հնարավոր է նաև կարկուտ։

Ապրիլի 11-14-ին գիշերը լեռնային շրջաններում տեղումները կդիտվեն ձյան տեսքով։ Քամին՝ հարավարևմտյան՝ 5-8մ/վ: Առանձին շրջաններում սպասվում է քամու ուժգնացում՝ ապրիլի 10-11-ին` 18-23 մ/վ, 12-ին, 15-ին՝ 15-18 մ/վ արագությամբ։ Օդի ջերմաստիճանն ապրիլի 11-ին կնվազի 5-7 աստիճանով։

Ստամբուլում Ռուսաստանի Դաշնության և Միացյալ Նահանգների միջև բանակցություններն անցել են դրական մթնոլորտում և հնարավորություն են տվել առաջընթաց գրանցել երկու երկրների դիվանագիտական ​​առաքելությունների աշխատանքի կարգավորման խնդրի լուծման գործում։ Դրա մասին հայտարարել է ԱՄՆ-ում ՌԴ դեսպան, Ստամբուլում ամերիկացի դիվանագետների հետ բանակցություններում ռուսական պատվիրակության ղեկավար Ալեքսանդր Դարչիևը։

«Երկկողմ փորձագիտական ​​խորհրդակցությունների վերջին փուլը հնարավորություն ընձեռեց առաջ շարժվել երկու երկրների նախագահների առաջադրած այս խնդրի լուծման գործում»,-շեշտել է Դարչիևը։

Նա հավելել է, որ կողմերը նոտաներ են փոխանակել՝ արձանագրելով Ռուսաստան Դաշնության և Միացյալ Նահանգների դիվանագիտական ​​առաքելությունների համար անարգել բանկային և ֆինանսական ծառայությունների փոխադարձ երաշխիքների մասին համաձայնագիր, ներառյալ ՄԱԿ-ում և այլ միջազգային կազմակերպություններում Ռուսաստանի Դաշնության ներդրումները:

«Պայմանավորվածություն է ձեռք բերվել հյուրընկալող երկրում դիվանագետների տեղաշարժը հեշտացնելու, ինչպես նաև նրանց մուտքի արտոնագրերի մշակման հետագա միջոցառումների մասին»,- նշել է դեսպանը։

Այսօր՝ ապրիլի 10-ին, խոշոր ավտովթար է տեղի ունեցել Երևանում։ Ժամը 11։45-ի սահմաններում «Հյուսիս-հարավ» նոր կառուցվող, սակայն դեռևս չշահագործվող ճանապարհին, ժողովրդին հայտնի «4-րդ գյուղից» դեպի Հարավարևմտյան թաղամաս տանող ճանապարհի սկզբնամասում, ճակատ ճակատի բախվել են Երևանի բնակիչներ 23-ամյա Նարեկ Կ․-ի վարած «BMW» մակնիշի և 25-ամյա Արտաշես Մ․-ի վարած «Chevrolet» մակնիշի ավտոմեքենաները։ Այս մասին հայտնում է Shamshyan.com-ը:

Վթարի հետևանքով, ըստ նախնական տեղեկությունների, տուժածներ չկան։

Վթարի փաստով ՊԾ Երևան քաղաքի գնդի 3-րդ գումարտակում փաստաթղթեր են ձևակերպվում։

Վարորդները ենթարկվել են սթափության փորձաքննության, եղել են սթափ։

Գերմանիայում պահպանողականները և սոցիալ-դեմոկրատները համաձայնության են եկել իշխող կոալիցիայի ձևավորման հարցում: Երկրի հնարավոր ապագա կանցլեր Ֆրիդրիխ Մերցը հայտնել է, որ կողմերին հաջողվել է հաղթահարել առկա տարաձայնությունները, այդ թվում՝ միգրացիոն քաղաքականության խստացման շուրջ: Նրա խոսքով՝ Գերմանիայի հաջորդ կառավարությունն ուժեղ ծրագիր կունենա:

Մասնավորապես, կփոխվի զինվորական ծառայության մոդելը, նախևառաջ շեշտը կդրվի կամավոր ծառայության վրա՝ շվեդական օրինակով: Գերմանիայի քաղաքացիություն հնարավոր կլինի ստանալ երկրում 5 տարի բնակվելուց հետո՝ նախկին 3 տարվա փոխարեն: Նոր կառավարությունը կխստացնի անօրինական միգրացիայի դեմ պայքարը: «Ազգային սահմանները կվերահսկվեն, իսկ այն անձինք, որոնց ապաստանի դիմումները մերժվել են, կարտաքսվեն»,- հայտնել է Մերցը։ Նաև, Գերմանիայի ապագա կաբինետը մտադիր է շարունակել հակառուսական պատժամիջոցների քաղաքականությունը:

Գերմանական ԶԼՄ-ները հայտնում են, որ համաձայնության շրջանակում սոցիալ-դեմոկրատները կստանան ֆինանսների, պաշտպանության, արդարադատության, աշխատանքի և այլ նախարարություններ: Պահպանողականները՝ ներքին և արտաքին գործերի, ինչպես նաև տնտեսության և կրթության նախարարությունները:

Իրանը կդադարեցնի համագործակցությունը Ատոմային էներգիայի միջազգային գործակալության (ԱԷՄԳ) հետ և երկրից վտարել գործակալության բոլոր տեսուչներին, եթե ԱՄՆ-ը և Իսրայելը շարունակեն սպառնալ իսլամական հանրապետությանը ռազմական ուժով։ Այս մասին հայտնել է Իրանի գերագույն առաջնորդ, այաթոլա Ալի Խամենեիի քաղաքական հարցերով խորհրդական, Իսլամական հեղափոխության պահապանների կորպուսի գեներալ Ալի Շամհանին։

«Օտար երկրների կողմից շարունակվող սպառնալիքները եւ Իրանի վրա ռազմական հարձակման փորձը կարող են հանգեցնել կանխարգելիչ միջոցների կիրառմանը, ինչպիսիք են Ատոմային էներգիայի միջազգային գործակալության տեսուչների վտարումը եւ նրա հետ համագործակցության դադարեցումը։

Մեկ այլ միջոց կարող է լինել հարստացված [ուրանի] տեղափոխումն Իրանի ներսում անվտանգ եւ անհայտ վայրեր»,- գրել է նա X-ում՝ ավելացնելով #Թրամփ եւ #Իսրայել հեշթեգերը:

Մարտի 19-ին Ստամբուլի քաղաքապետ Էքրեմ Իմամօղլուի կալանավորումից հետո Թուրքիայում հակակառավարական ակցիաները չեն դադարում: Ստամբուլում զանգվածային ցույցեր են տեղի ունեցել, քաղաքացիները պահանջել են ազատ արձակել Իմամօղլուին և բերման ենթարկված ընդդիմադիր այլ պաշտոնյաների:

Ժողովրդահանրապետական կուսակցության առաջնորդ Օզգյուր Օզելը նախազգուշացրել է՝ կանգ չեն առնելու, մինչև արդյունքի չհասնեն:

Իմամօղլուն մեղադրվում է կոռուպցիայի, փողերի լվացման և ահաբեկչության հետ կապ ունենալու համար։ Ընդդիմության համոզմամբ՝ Էքրեմ Իմամօղլուի դեմ հարուցված գործը քաղաքական դրդապատճառներ ունի, քանի որ նա համարվում է առաջիկա ընտրություններում Ռեջեփ Էրդողանի հիմնական մրցակիցը:

Միջազգային հանրությունը դատապարտել է Իմամօղլուի կալանավորումը՝ այն անվանելով հակաժողովրդավարական քայլ։

ԵՄ-ն կշարունակի նոր մաքսատուրքերի մշակումն ԱՄՆ-ի դեմ, բայց դրանք սառեցնում է 90 օրով՝ «բանակցություններին հնարավորություն տալու» համար։ Այս մասին X սոցիալական հարթակում գրել է Եվրահանձնաժողովի նախագահ Ուրսուլա ֆոն դեր Լայենը։

«Մենք ի գիտություն ենք ընդունել նախագահ Թրամփի հայտարարությունը: Մենք ցանկանում ենք հնարավորություն տալ բանակցություններին: Մենք շարունակում ենք վերջնականացնել ԵՄ-ի պատասխան քայլերը, որոնք ստացել են մեր անդամ երկրների վճռական աջակցությունը, բայց 90 օրով սառեցնում ենք դրանք: Եթե բանակցությունները բավարար արդյունք չտան, մեր հակամիջոցները կգործարկվեն», – գրել է նա:

Ֆոն դեր Լեյենը նաև հաստատել է, որ ԵՄ-ն մշակում է լրացուցիչ հակաքայլեր ԱՄՆ-ի մաքսատուրքերի դեմ։

«Ինչպես ասել եմ նախկինում, բոլոր տարբերակները քննարկվում են», – եզրափակել է Ուրսուլա ֆոն դեր Լայենը։

Իսկ Եվրահանձնաժողովի գլխավոր խոսնակի տեղակալ Ստեֆան դե Կեերսմաքերը Բրյուսելում կայացած ճեպազրույցում նշել է, որ ԱՄՆ-ն սառեցրել է միայն եվրոպական ապրանքների հիմնական զանգվածի նկատմամբ մաքսատուրքերը, բայց առայժմ ուժի մեջ են մնում մաքսատուրքերը Եվրոպայից  պողպատի, ալյումինի և ավտոմեքենաների համար։

Ապրիլի 9-ին ԵՄ երկրները հաստատել են Միացյալ Նահանգներից լայն շրջանակի գյուղատնտեսական և արդյունաբերական ապրանքների համար 25% մաքսատուրքերի առաջին փաթեթի սահմանումը։ Մաքսատուրքերի երկրորդ փաթեթը պետք է գործարկվեր մայիսի 15-ին, և այնուհետև Բրյուսելը մտադիր էր նոր մաքսատուրքեր սահմանել մինչև դեկտեմբերի 1-ը: Այժմ այդ ամբողջ գործընթացը դադարեցված է:

Ապրիլի 9-ին ԱՄՆ նախագահ Դոնալդ Թրամփը հայտարարել է, որ 90 օրով դադարեցնում է մաքսատուրքերի բարձրացումն այն երկրների նկատմամբ, որոնք բանակցություններ վարելու պատրաստակամություն են ցուցաբերել։ Դրանց նկատմամբ կգործեն ներմուծման 10%-ի չափով մաքսատուրքեր։ Միևնույն ժամանակ ԱՄՆ ղեկավարը Չինաստանից ներմուծվող արտադրանքի նկատմամբ մաքսատուրքերը բարձրացրել է մինչև 125%:

Գերմանիայի Պահպանողական ՔԴՄ/ՔՍՄ դաշինքը՝ Ֆրիդրիխ Մերցի գլխավորությամբ, ապրիլի 9-ին կոալիցիա կազմելու համաձայնություն է ձեռք բերել Գերմանիայի Սոցիալ-դեմոկրատական ​​կուսակցության (ԳՍԴԿ) հետ՝ նպատակ սահմանելով վերականգնել երկրի տնտեսությունը և պայքարել անօրինական միգրացիայի դեմ։

Deutsche Welle-ի ռուսական ծառայությունը, վկայակոչելով կոալիցիոն համաձայնագիրը, նշում է, որ կառավարական նոր կոալիցիան պլանավորում է վերացնել երկրում երեք տարի բնակվելուց հետո արագացված կարգով քաղաքացիություն ստանալու իրավունքը:

Միևնույն ժամանակ, նախորդ կառավարության կողմից քաղաքացիության մասին օրենքում կատարված մյուս փոփոխությունները, ներառյալ հինգ տարի անց հպատակագրվելու իրավունքը և երկքաղաքացիություն ունենալու հնարավորությունը, ուժի մեջ կմնան։

Կառավարական կոալիցիայի գործընկերներն իրենց համաձայնագրում մեծ ուշադրություն են դարձրել Գերմանիայի տարածքում անօրինական միգրացիայի խնդիրներին։ Կուսակցություններին հաջողվել է պայմանավորվել Գերմանիա մուտք գործողներին սահմանին կանգնեցնելու շուրջ, նույնիսկ եթե նրանք ապաստան տրամադրելու խնդրագիր են ներկայացրել։ Երկու տարով կդադարեցվի ընտանիքների վերամիավորումը, կդադարեցվեն փախստականներին կամավոր ընդունելու ծրագրերը, իսկ արտաքսման համար անվտանգ երկրների ցուցակը կընդլայնվի։ Բացի այդ, հնարավոր կդառնա հանցագործների արտաքսումն Աֆղանստան և Սիրիա։ Կուժեղացվի վերահսկողությունը Գերմանիայի սահմաններին:

Գերմանիայի հաջորդ հավանական կանցլեր, ՔԴՄ-ի նախագահ Ֆրիդրիխ Մերցն ապրիլի 9-ին Բունդեսթագում կայացած մամուլի ասուլիսում իր ելույթի մի մասը նույնպես նվիրել է միգրացիային։ Նա խոստացել է «զգալի չափով վերջ դնել անօրինական միգրացիային»՝ հաստատելով խիստ սահմանային հսկողություն և այն անձանց հայրենադարձելու արշավ, որոնք երկրում են գտնվում առանց օրինական հիմքերի:

Իսկ ԳՍԴԿ-ի ղեկավար Լարս Կլինբայլը հայտարարել է, որ «ապաստանի հիմնարար իրավունքը մնում է անձեռնմխելի», իսկ Գերմանիան «մնում է ներգաղթի երկիր»։ Միաժամանակ, նրա խոսքով, նոր կառավարությունը մտադիր է կարգուկանոն հաստատել և ուժեղացնել վերահսկողությունն այս ոլորտում։