Կեսգիշերին հրդեհ է բռնկվել Երևանի սուպերմարկետներից մեկում

Հունվարի 22-ին, ժամը 00:42-ին Ճգնաժամային կառավարման ազգային կենտրոն ահազանգ է ստացվել, որ հրդեհ է բռնկվել Երևան քաղաքի Հաղթանակ թաղամասում գտնվող սուպերմարկետներից մեկում։

ՆԳՆ փրկարար ծառայությունից հայտնում են, որ դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից չորս մարտական հաշվարկ և Բժշկական ապահովման վարչության հերթապահ խումբը։

Պարզվել է, որ հրդեհը բռնկվել է Հաղթանակ թաղամասի 1-ին փողոցի թիվ 5/1 հասցեում գտնվող սուպերմարկետում։ 

Հրդեհը մեկուսացվել է ժամը 01։10-ին, մարվել՝ 01։22-ին։ Այրվել են դրամարկղի հատվածը (մոտ 1 քմ), երկու ցուցափեղկ՝ սննդով և կենցաղային իրերով (մոտ 16 քմ), մասամբ ջերմահարվել է կախովի առաստաղը (մոտ 20 քմ)։