Բեռլինը որոշել է չհանրայնացնել Ուկրաինային աջակցության համար ուղարկված զենքերը։ Այս մասին հայտարարել է Գերմանիայի արտաքին գործերի նախարար Աննալենա Բերբոքը՝ հավելելով, որ Գերմանիան կօգնի Կիեւին պահպանել ավելի առաջադեմ սպառազինության համակարգեր եւ ուսուցանել զինվորներին՝ դրանք օգտագործելու համար, հաղորդում է Reuters-ը։
«Մենք մատակարարել ենք հակատանկային հրթիռներ, «Սթինգերներ» եւ այլ զինատեսակներ, որոնց մասին երբեք չենք խոսել հրապարակավ, ուստի այդ մատակարարումները արագ են իրականացվել»,-ասել է նա Ռիգայում իր լատվիացի գործընկերոջ հետ մամուլի ասուլիսում:
Հարցին, թե արդյոք Գերմանիան կուղարկի Panzerhaubitze 2000 հրետանային համակարգ, որը, ըստ որոշ փորձագետների, պետք է Ուկրաինային՝ Դոնբասում ռուսական զորքերի դեմ կիրառման համար, նա ասել է , որ Գերմանիան կսովորեցնի Կիեւի զինվորականներին օգտագործել եւ պահպանել ավելի առաջադեմ համակարգեր, որոնք կարող են ստանալ այլ երկրներից:
«Եթե գործընկերները մատակարարեն հրետանի, որը մենք այլեւս չենք կարող մատակարարել, մենք կօգնենք վերապատրաստման հարցում»,-ընդգծել է Բերբոքը։
0Comments