Ապրիլի 21
Ես ձեզ հետ եմ: Իմ Ներկայությունը իրական նշան է այն բանի, որ Ես ձեր մեղքերին թողություն եմ տվել: Ես կպահեմ ձեզ ոտքի վրա:
Կհաղթեք, անշուշտ: Մի վախեցեք փոփոխություններից: Դուք վախենալու պատճառ բոլորովին չունեք, քանի որ Ես ՝ ձեր Տերը, բնավ չեմ փոխվում: Հիսուս Քրիստոս նույնն է երեկ, այսօր և հավիտյան: Ես կանգնած եմ ձեր կողքին: Իմ Անփոփոխ ու Ամրապինդ լինելը փոխանցվում է նաև ձեզ այնքան ժամանակ, քանի կանգնած եք Ինձ մոտ: Իմ կողքին եղեք:
Ինչպես որ ճիշտ շնչառությունը բծախնդիր վարժությունից հետո ինքնաբերաբար սովորության է վերածվում, այդպես էլ՝ եթե դուք կանոնավորապես կիրարկեք Իմ Ներկայության վերադարձը, երբ անհանգստության ամեափոքր զգացումը անգամ խռովի ձեր կատարյալ հանգստությունը, այդժամ այսօրինակ առնչությունն էլ սովորություն կդառնա, և դուք այդպես կկարողանաք ապրել Իմ Ներկայության կատարյալ գիտակցության մեջ: Այդ ժամանակ է, որ կատարյալ անդորրը ու ներդաշնակությունը ձեր բաժինը կդառնան:
Կյանքը կրթության մի դպրոց է: Իմացեք, որ ապագա գործի համար խոստումնալից աշակերտն է միայն իր ուսուցչի կողմից առանձնացվում՝ ավելի դժվարին ու խիստ կարգապահության, կրթության և ուսուցման համար:
Դուք պահանջ ունեք չնմանվել այն հարյուրավորներին, այն հազարավորներին, ովքեր անտարբեր են Իմ նկատմամբ. կամենում եք լինել նրանց պես, ովքեր ամեն ժամ արտացոլում են Ինձ՝ իրենց ասածների ու արածների մեջ և՝ անգամ իրենց լինելով: Նշանակում է՝ Իմ Սիրելի Զավակներ, այս ուսումնառությունը համարեք ոչ թե խիստ, այլ սրտագին պատասխանը ձեր խնդրածի:
Ձեզանից ոչ մեկի համար կյանքը այսուհետև չի կարող նույնը լինել, քանի որ մի անգամ արդեն խմել եք Իմ տված գինուց, այսինքն՝ ճաշակել եք Համը Հավիտենական Կյանքի: Աշխարհը այլևս չի կարող հագեցնել ձեր ծարավը՝ հակառակ իր թափած բոլոր ջանքերի:
0Comments