Ռուսաստանի նախագահ Վլադիմիր Պուտինն առաջարկել է Իրանի նախագահ Հասան Ռոհանիին քննարկել երկկողմ հարաբերությունների հարցը, իրավիճակը ԳՀՀԾ-ի շուրջ եւ իրավիճակը Սիրիայում։
«Կխոսենք երկկողմ հարցերի մասին, ԳՀՀԾ-ի մասին, տարածաշրջանում իրավիճակի մասին, այդ թվում Սիրիայի Արաբական Հանրապետությունում»,- ասել է Պուտինը Երեւանում Ռոհանիի հետ հանդիպման ժամանակ՝ ԵՏՄ գագաթաժողովից հետո, տեղեկացրել է ՌԻԱ «Նովոստի»-ն։
Ռուսաստանի նախագահը նշել է, որ երկու երկրների նախագահները կանոնավոր հանդիպումներ կունենան, բայց, հաշվի առնելով տարածաշրջանում իրավիճակի դինամիկան, ինչպես նաեւ երկկողմ կապերը, «միշտ խոսելու եւ քննարկելու բան կա»։ «Ես գոհունակությամբ փաստում եմ, որ ընթանում է համատեղ աշխատանք Իրանը Եվրասիական տնտեսական միության աշխատանքին միացնելու ուղղությամբ։ Համոզված եմ, որ այդ աշխատանքն օգտակար կլինի մեր երկրներին։ Այն կառուցվում է միջազգային իրավունքի հիմնարար սկզբունքների եւ Առեւտրի համաշխարհային կազմակերպության հիմնական դրույթների հիման վրա»,- ասել է Պուտինը։
Ռոհանին, իր հերթին, նշել է. «Բարեբախտաբար, երկկողմ հարաբերությունները մեր երկրների միջեւ առաջ է ընթանում, եւ եթե անգամ մենք հանդիպենք ամեն շաբաթ, մենք միշտ խոսելու բան կունենանք»։ Նա ավելացրել է, որ Ռուսաստանի եւ Իրանի հարաբերությունների պատմության երկար տարիների ընթացքում կողմերը «հասել են անկեղծության աննախադեպ մակարդակի»։
Ռոհանին ճշգրտել է, որ նախատեսում է Պուտինի հետ քննարկել միջազգային հարցեր, ինչպես նաեւ երկկողմ հարաբերությունների խնդիրները։ «Մեր երկու երկրները գտնվում են զգայուն տարածաշրջանում եւ, ցավոք, վերջին շաբաթում մենք տեսնում ենք բացասական դրսեւորումներ այստեղ։ Եվ որտեղ էլ մենք փոխգործակցենք, մեր վերջնանպատակը խաղաղությունն է, կայունությունը եւ անվտանգությունը»,- ավելացրել է Ռոհանին։
Ավելի ուշ, պատասխանելով հարցին, թե նախատեսում են արդյոք երկու երկրների նախագահները քննարկել իրավիճակը Սաուդյան Արաբիայի նավթային ենթակառուցվածքի օբյեկտների գրոհների հետ կապված, Ռուսաստանի նախագահի մամուլի քարտուղար Դմիտրի Պեսկովն ասել է. «Քննարկվում է ընդհանուր առմամբ Հորմուզի նեղուցի իրավիճակը, իրավիճակը տարածաշրջանում, որը բավական լարված է»։
0Comments