Էմերի․ Օզիլն ու Կոլաշինացը չխաղացին անձնական հանգամանքների բերումով

^{Լոնդոնի «Արսենալի» իսպանացի գլխավոր մարզիչ Ունաի Էմերին պատմել է, թե ինչու են կիսապաշտպան Մեսութ Օզիլն ու պաշտպան Սեադ Կոլաշինացը բաց թողել Emirates Cup-ի հանդիպումը ֆրանսիական «Լիոնի» հետ։ Անգլիական թիմը պարտվել էր 1։2 հաշվով։}

^{«Օզիլն ու Կոլաշինացը հանդիպումը բաց թողեցին անձնական հանգամանքների բերումով։ Հիմա լավագույն պահը չէ նրանց համար, որպեսզի դուրս գան խաղադաշտ։ Նրանք դեռ 100 տոկոսով կենտրոնացած չեն։}

^{Ամենակարեւորը նրանց անվտանգությունն է եւ իրենց ընտանիքների հետ սովորական կյանքի վերադառնալը։ Ես զրուցել եմ նրանց հետ եւ մի քանի օր լրացուցիչ հանգիստ եմ տրամադրել։}

^{Մի քանի օր հետո մենք դարձյալ կստուգենք նրանց ֆիզիական եւ հոգեբանական վիճակը»,- Էմերիի խոսքը մեջբերում է «Արսենալի» կայքը։}

^{Հիշեցնենք, որ հուլիսի 25-ին Լոնդոնի հյուսիսում դանակով զինված հանցագործները մոպեդով հարձակվել են Օզիլի եւ լոնդոնյան թիմի բոսնիացի պաշտպան Սեադ Կոլաշինացի վրա, որոնք եղել են ավտոմեքենայում։ Կոլաշինացն ու Օզիլը մուսուլման են եւ ընկերներ։}

^{Դրանից հետո Օզիլը դիմել էր անվտանգության ծառայության՝ առանձնատան համար վարձելով անվտանգության աշխատակիցների շուրջօրյա պահակային հերթապահություն, գրում է  NEWS.am SPORT:}