Ինչպես սնվել նախադիաբետի դեպքում. 5 խորհուրդ

^{Նախադիաբետը նախորդում է դիաբետ հիվանդությանը: Նախադիաբետով մարդկանց արյան մեջ արդեն իսկ բարձր է գլյուկոզայի մակարդակը, սակայն լիարժեք դիաբետ դեռեւս չկա նրանց մոտ: Համարվում է, որ այդ շրջանում ճիշտ սնունդը կարող է օգնել խուսափել իսկական շաքարային դիաբետից, գրում է news.am:}

^{1. Ածխաջրեր}

^{Եթե դուք ունեք նախադիաբետ, ուշադրություն դարձրեք ածխաջրեր օգտագործելուն. կարեւոր է նախընտրությունը տալ բարդ ածխաջրերին: Օրինակ՝ կարելի է օգտագործել ամբողջական հացահատիկային մթերքներ, լոբազգիներ, բանջարեղեն: Իսկ ռաֆինացված, մշակված մթերքներից ցանկալի է հրաժարվել: Դրանցից են շաքարավազը, շաքար պարունակող մթերքները, սպիտակ ալյուրից պատրաստված մակարոնեղենը, սպիտակ ալյուրն առհասարակ:}

^{Բանն այն է, որ օրգանիզմը ծախսում է շատ ժամանակ եւ ուժ բարդ ածխաջրերը մարսելու համար, որոնք նաեւ ունեն ցածր գլիկեմիկ ինդեքս: Իսկ պարզ ածխաջրերն արագորեն բարձրացնում են արյան մեջ գլյուկոզայի մակարդակը, ինչն անցանկալի է նախադիաբետի պարագայում:}

^{2. Բալանսավորված սնունդ}

^{Փորձեք դարձնել ձեր սննդակարգը հնարավորինս բալանսավորված. դրանում պետք է ներառվեն ե′ւ սպիտակուցներ, ե′ւ ճարպեր, ե′ւ ածխաջրեր: Թե ինչպես դուք կարող եք ճիշտ կազմակերպել ձեր սննդակարգը, խորհուրդ է տրվում խորհրդակցել էնդոկրինոլոգի կամ դիետոլոգի հետ:}

^{3. Հաճախակի եւ փոքր չափաբաժնով}

^{Արյան մեջ գլյուկոզայի մակարդակը նորմայի մեջ պահելու համար ցանկալի է ուտել հաճախակի՝ յուրաքանչյուր 4-5 ժամը մեկ, եւ փոքր չափաբաժնով: Եթե դուք երկար ժամերի ընթացքում քաղցած եք լինում, արյան մեջ գլյուկոզայի մակարդակը նվազում է, իսկ եթե այնուհետեւ օգտագործում եք բարձր կալորիականությամբ մեծ չափաբաժնով ուտելիք, գլյուկոզայի մակարդակը կտրուկ բարձրանում է: Դիաբետի դեպքում այդպիսի տատանումներն անցանկալի են:}

^{4. Նախաճաշ}

^{Մի մոռացեք նախաճաշել: Համարվում է, որ 2-րդ տիպի դիաբետ ունեցող մարդիկ, որոնք բաց են թողնում սննդի առաջին ընդունումը, ունեն շաքարի ավելի բարձր մակարդակ ճաշի եւ ընթրիքի ժամանակ, քան մարդիկ, որոնք նախաճաշում են:}

^{Նախաճաշի համար ցանկալի է ընտրել սպիտակուցներ եւ բարդ ածխաջրեր պարունակող մթերքներ:}

^{5. Շաքար եւ շաքարի փոխարինիչներ}

^{Ինչպես արդեն նշվել է, նախադիաբետի դեպքում շաքար օգտագործելն ընդհանրապես ցանկալի չէ: Սակայն դա վերաբերում է նաեւ շաքարի փոխարինիչներին, քանի որ դրանցից մի քանիսը նույնչափ վնասակար են, որքան շաքարը:}

^{Ուրիշ ի՞նչ կարելի է անել}

^{Մասնագետները խորհուրդ են տալիս ուշադրություն դարձնել կենսակերպին ընդհանուր առմամբ.}

• ^{Եթե դուք ունեք ավելորդ քաշ, փորձեք նիհարել,}
• ^{Պարբերաբար զբաղվեք սպորտով,}
• ^{Սովորեք կառավարել սթրեսը,}
• ^{Փորձեք նորմալացնել քնի ռեժիմը:}