Ավստրիայի ԱԳ նախկին նախարարը պատմել է, թե ինչպես է Պուտինին հրավիրել իր հարսանիքին

Ավստրիայի ԱԳ նախկին նախարար Կարին Կնայսլը պատմել է այն մասին, թե ինչպես է Ռուսաստանի նախագահ Վլադիմիր Պուտինին հանձնել իր հարսանիքի հրավերքը: Այսօր ավստրիական Puls 4 հեռուստաալիքի հետ հարցազրույցում նա հայտնել է, որ դա տեղի է ունեցել 2018 թվականի հունիսին Վիեննա ռուս առաջնորդի այցի ժամանակ, փոխանցում է ՏԱՍՍ-ը: 

Նրա խոսքով՝ Ավստրիա հարսանյաց հանդեսին Պուտինին հրավիրելու հետ կապված պատմությունը պատահական իրադարձությունների հերթագայության մի օղակ էր, եւ ոչ մի սառը հաշվարկ չկար: Հարսանիքի հրավիրատոմսերը տպարանից հասցվել են ճիշտ նույն օրը, երբ Վիեննայում Պուտինին ընդունում էր Ավստրիայի նախագահ Ալեքսանդեր Վան դեր Բելենը: 2018 թվականի հունիսի 5-ին երկուսն էլ Արվեստների պատմության թանգարանում ցուցահանդեսն էին բացում: Կնայսլը այդ հանդիսավոր միջոցառմանը գնալիս հետն էր վերցրել հրավիրատոմսերի կույտ, որպեսզի բաժանի Ավստրիայի կառավարության իր գործընկերներին:

«Ձեռքիս մեկ հրավիրատոմս էր մնացել, եւ ես ամուսնուս հարցրեցի՝ ի՞նչ կարծիքի է, եթե վերջինը տանք Պուտինին, որ նրա հետ կիսենք ուրախությունը: Չէ՞ որ դա ինչ-որ զավեշտալի բան է. մենք 50-ն անց ենք եւ առաջին անգամ ենք ամուսնանում,- նշել է Կնայսլը: - Այդ ժամանակ մենք մոտեցանք Պուտինին, նրան տվեցինք բացիկը, ես մտքովս իսկ չէի անցկացնում, որ ուղիղ հուլիսի 18-ին, ինչպես նշված էր հրավիրատոմսի վրա, նա կհամաձայնվի օգոստոսի 18-ին գալ: Նա համաձայնվեց»: Կնայսլի խոսքով՝ իր համար միանգամայն անսպասելի էր, որ Պուտինի կընդունի հարսանիքի հրավերքը:

Հիշեցնենք, որ Ռուսաստանի նախագահ Վլադիմիր Պուտինը 2018 թվականի հունիսի 5-ին մեկօրյա այցով Վիեննայում էր, որտեղ բանակցություններ է վարել Ավստրիայի նախագահ Ալեքսանդեր Վան դեր Բելենի եւ նախկին դաշնային կանցլեր Սեբաստյան Կուրցի հետ: Պուտինը Վան դեր Բելենի հետ նույն երեկոյան Վիեննայում Արվեստների պատմության թանգարանում բացել է «Էրմիտաժի հին վարպետների կտավները» ցուցահանդեսը:

Օգոստոսի 18-ին Պուտինն այցելել էր Կնայսլի եւ ֆինանսիստ Վոլֆգանգ Մայլինգերի հարսանյաց հանդիսությանը ավստրիական Շտիրիա հողում, երբ վերադառնում էր Բեռլինում Գերմանիայի կանցլեր Անգելա Մերկելի հետ բանակցություններից: Ռուսաստանի նախագահը նորապսակներին էր նվիրել նկար, յուղաքամիչ սարք եւ Տուլայի ինքնաեռ, ինչպես նաեւ իր հետ էր բերել Կուբանի կազակական երգչախումբը: