Մեր թիմի, մեր կուսակցության մոտեցումը հետևյալն է. Նիկոլ Փաշինյանը մեր պետությունը ղեկավարել է ծանրագույն ժամանակահատվածում, ծանրագույն որոշումներ ընդունելու ժամանակահատվածում և որպես մարդ, որպես քաղաքացի, որպես պետական գործիչ, հոգեբանորեն, ֆիզիկապես, բարոյապես նաև, ինքը սպառվել է և պետք է գնա հանգստի: Այս մասին այսօր՝ մարտի 19-ին, ԱԺ-ում լրագրողների հետ զրույցում նշեց ԱԺ պատգամավոր, ՔՊ-ից հեռացված Հովիկ Աղազարյանը:
«Մենք պետք է ամեն ինչ անենք, որպեսզի հերթական կամ արտահերթ ընտրությունների ժամանակ պարոն վարչապետը չվերարտադրվի օրենքներով, սահմանադրությամբ: Էլի սխալվելու իրավունքով ժողովուրդը ոնց կորոշի»,-ասաց նա՝ հավելելով, որ եթե ժողովուրդը 2018-ի պես փողոց դուրս գա եւ մի հոգի մնա, այդ ժամանակ ինքն էլ դուրս կգա:
Հարցին՝ ՔՊ պատգամավորներից որեւէ մեկն իր հետ խոսե՞լ է իրեն անձեռնմխելիությունից զրկելու թեմայով, Աղազարյանը պատասխանեց. «Ես ընդգծված կերպով չեմ շփվում իմ նախորդ գործընկերների հետ, որովհետև ես երջանիկ եմ, որ նրանց մեծամասնության հետ ճանապարհ եմ անցել և չեմ ուզում իմ շփումներով իրենց դնել դժվար, անհարմար վիճակի մեջ»:
Նա ընդգծեց, որ մասնակցելու է իրեն անձեռնմխելիությունից զրկելու քվեարկությանը և դեմ է քվեարկելու:
0Comments