Չեխիայում Վրաստանի դեսպան Թեյա Մաիսուրաձեն դարձավ երկրի վեցերորդ դիվանագետը, ով հրաժարական տվեց վարչապետ Իրակլի Կոբախիձեի հայտարարությունից հետո՝ ԵՄ-ի հետ բանակցություններ սկսելու հարցը սառեցնելու մասին։
«Ես հրաժարական եմ տվել Չեխիայում Վրաստանի դեսպանի պաշտոնից։ Մեծ պատիվ է ծառայել իմ երկրի ազգային շահերին շուրջ երկու տասնամյակ՝ նպաստելով նրա եվրաատլանտյան ինտեգրմանը, պաշտպանելով նրա ինքնիշխանությունն ու տարածքային ամբողջականությունը»,- գրել է դիվանագետը:
Նոյեմբերի 28-ին Կոբախիձեն ասել է, որ իշխող «Վրացական երազանք-Ժողովրդավարական Վրաստան» կուսակցությունը որոշել է մինչև 2028 թվականի վերջ չընդգրկել Եվրամիությանն անդամակցելու շուրջ բանակցությունների հարցը օրակարգում և հրաժարվել ԵՄ-ի բոլոր բյուջետային դրամաշնորհներից։ Կառավարության ղեկավարի խոսքով, դրա պատճառները ԵՄ-ի մշտական շանտաժն են՝ դրան անդամակցելու շուրջ երկխոսություն սկսելու վերաբերյալ, խորհրդարանի կողմից ընդունված մի շարք օրենքներ չեղյալ հայտարարելու պահանջները և վրացական իշխանությունների դեմ պատժամիջոցներ կիրառելու կոչերը։
Այս հայտարարությունը հարուցել է բողոքի ցույցեր, որոնք ամեն օր շարունակվում են Վրաստանի խորհրդարանի մոտ և ավարտվում լուսադեմին բռնի ցրմամբ։ Վրաստանի իշխանությունների այս որոշումից հետո ԱՄՆ-ում, Լիտվայում, Նիդեռլանդներում, Բուլղարիայում երկրի դեսպանները, ինչպես նաև Իտալիայում Վրաստանի դեսպանի պաշտոնակատարը հայտարարել են իրենց հրաժարականի մասին։
0Comments