Պուտինն Էրդողանի հետ զրույցում շեշտել է Սիրիայի դեմ ահաբեկչական ագրեսիայի շուտափույթ դադարեցման անհրաժեշտությունը
Թուրքական կողմի նախաձեռնությամբ ՌԴ նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ, հայտնել են Կրեմլի մամուլի ծառայությունից։
Նշվում է, որ մանրամասն ուսումնասիրվել է Սիրիայում կտրուկ սրված իրավիճակը։
«Վլադիմիր Պուտինն ընդգծել է արմատական խմբավորումների կողմից սիրիական պետության դեմ ահաբեկչական ագրեսիան անհապաղ դադարեցնելու անհրաժեշտությունը և լիարժեք աջակցություն ցուցաբերել օրինական իշխանությունների ջանքերին՝ վերականգնելու կայունությունն ու սահմանադրական կարգը ամբողջ երկրում, մասնավորապես՝ օգտագործելով տարածաշրջանում Անկարայի առկա հնարավորությունները։
Այդ կապակցությամբ առաջնորդները հանդես են եկել ինչպես երկկողմ ձևաչափով, այնպես էլ Աստանայի գործընթացի շրջանակում փոխգործակցության ամրապնդման օգտին։ Նշվել է Սիրիայում իրավիճակի կարգավորման գործում Ռուսաստանի, Թուրքիայի և Իրանի միջև հետագա սերտ համակարգման կարևորությունը։
Երկու երկրների նախագահները կշարունակեն միմյանց հետ շփվել ճգնաժամի թուլացման համար քայլերի որոնման համատեքստում։
Քննարկվել են նաև ռուս-թուրքական փոխշահավետ համագործակցության հետագա զարգացման մի շարք արդիական հարցեր՝ շեշտը դնելով առևտրատնտեսական և էներգետիկ բաղադրիչների վրա»,- նշված է զեկույցում։
0Comments