Covid-19 համավարակից հետո, որը հանգեցրեց ուղևորների թվի կրճատմանը, ավիացիոն ոլորտում արագ վերականգնում է նկատվում։

Անցյալ տարի 9,5 միլիարդ մարդ է օդ բարձրացել, ինչը 9%-ով ավելի է, քան 2023 թվականին։ Որոշ գնահատականներով, աշխարհում կա ավելի քան 40 000 օդանավակայան, սակայն առևտրային ավիաընկերությունները սպասարկում են դրանցից միայն մոտ 9 000-ը։ 

Այդպիսի օդանավակայաններից մեկը գտնվում է հյուսիսաֆրիկյան մի երկրում, որը դառնում է հանգստի ավելի ու ավելի սիրված վայր։

Այցելուների մեծ մասը ժամանում է Թունիս-Կարթագեն միջազգային օդանավակայան, որը երկար ժամանակ երկրում խոշորագույնն է։

2024 թվականին օդանավակայանը սպասարկել է մոտ 7,2 միլիոն ուղևորի և հույս ունի շուտով այդ թիվը հասցնել մոտ 11 միլիոնի, հենց որ նոր տերմինալն ամբողջությամբ շահագործման հանձնվի։ 1940 թվականին բացված օդանավակայանը զբաղեցնում է ավելի քան 1200 ակր տարածք և ունի երկու թռիչքուղի, որոնցից ամենաերկարի երկարությունը 3900 մետր է։ 

Թունիսյան Tunisair ավիափոխադրողն օդանավակայանից ուղիղ չվերթներ է առաջարկում դեպի Եվրոպայի, Մերձավոր Արևելքի և Աֆրիկայի խոշոր քաղաքներ։ Օդանավակայանը սպասարկում են նաև մի քանի եվրոպական ավիաընկերություններ, այդ թվում՝ Air France-ը, Austrian Airlines-ը, British Airways-ը, KLM-ը, Lufthansa-ն։ 

Այնուամենայնիվ, այս օդանավակայանը չի կարողացել տպավորել այնտեղ ժամանող շատ այցելուների, ըստ Airhelp.com կայքի անցկացրած հարցման արդյունքների։

250 օդանավակայանների շարքում Թունիս-Կարթագենը զբաղեցնում է վերջին տեղը՝ հավաքելով ընդհանուր 5,73 միավոր մի գնահատման համակարգով, որտեղ 10-ը ամենաբարձր գնահատականն է։