Ղազախստանում ՀԱՊԿ Արագ արձագանքման հավաքական ուժերի «Կոբալտ-2025» զորավարժությունների փորձը կօգտագործվի ՇՀԿ անդամ պետությունների իրավասու մարմինների «Սահանդ-Հակաահաբեկչություն-2025» համատեղ հակաահաբեկչական զորավարժությունների նախապատրաստման համար: Այս մասին հայտնում է ՇՀԿ տարածաշրջանային հակաահաբեկչական կառույցի մամուլի ծառայությունը։

Ըստ մամուլի ծառայության, ՇՀԿ ՏՀԿ պատվիրակությունը՝ գործադիր կոմիտեի տնօրեն Ուլարբեկ Շարշեևի գլխավորությամբ, որպես դիտորդ մասնակցել է ՀԱՊԿ արագ արձագանքման հավաքական ուժերի հատուկ նշանակության ուժերի «Կոբալտ-2025» հատուկ զորավարժություններին, որոնք կայացել են հոկտեմբերի 3-ին Ղազախստանի Ալատաու պոլիգոնում:

«Դրական փորձը կօգտագործվի ՇՀԿ տարածաշրջանային հակաահաբեկչական կառույցի կողմից ՇՀԿ անդամ պետությունների իրավասու մարմինների «Սահանդ-Հակաահաբեկչություն-2025» համատեղ հակաահաբեկչական վարժանքների եզրափակման նախապատրաստման ժամանակ»,-ասված է հաղորդագրության մեջ:

Մամուլի ծառայությունում հավելել են, որ «Կոբալտ-2025» զորավարժությունը ցուցադրել է ՀԱՊԿ Արագ արձագանքման հավաքական ուժերի անհատական պատրաստության և համատեղ գործողությունների բարձր մակարդակը։

Ավելի վաղ ՇՀԿ գլխավոր քարտուղար Նուրլան Երմեկբաևը ՌԻԱ Նովոստիին տված հարցազրույցում հայտարարել էր, որ կազմակերպության անդամ երկրները 2025 թվականին համատեղ հակաահաբեկչական զորավարժություններ կանցկացնեն:

ՇՀԿ-ն միջազգային կազմակերպություն է, որը հիմնադրվել է 2001 թվականին: Այն ներառում է Բելառուսը, Հնդկաստանը, Իրանը, Ղազախստանը, Չինաստանը, Ղրղզստանը, Ռուսաստանը, Տաջիկստանը, Պակիստանն ու Ուզբեկստանը: Միավորման գործընկեր երկրներն են Հայաստանը, Աֆղանստանը, Ադրբեջանը, Բահրեյնը, Եգիպտոսը, Կամբոջան, Կատարը, Քուվեյթը, Լաոսը, Մալդիվները, Մոնղոլիան, Մյանման, Նեպալը, Արաբական Միացյալ Էմիրությունները, Սաուդյան Արաբիան, Թուրքիան և Շրի Լանկան: