ԱՄՆ-ը հայտարարել է նոր դարաշրջանի սկիզբ ԱՊՀ անդամ երկրների հետ հարաբերություններում՝ խոստանալով Կենտրոնական Ասիայի պետություններին ավելի մեծ ուշադրություն, քան երբևէ։ Այդ մասին են վկայում ամերիկյան վարչակազմի ներկայացուցիչների խոսքերը՝հինգ երկրների՝ Ուզբեկստանի, Ղազախստանի, Ղրղզստանի, Տաջիկստանի և Թուրքմենստանի պատվիրակությունների մասնակցությամբ կայացած հանդիպման ընթացքում։ Ամերիկացի քաղաքական գործիչների ելույթները հրապարակվել են ԱՄՆ Պետդեպարտամենտի կայքում։ 

ԱՄՆ նախագահի հատուկ ներկայացուցիչը Հարավային և Կենտրոնական Ասիայի հարցերով՝ Սերժիո Գորը, հայտարարել է, որ այժմ Կենտրոնական Ասիայի երկրներն ունեն ուղիղ կապ Սպիտակ տան հետ։ «Դուք ստանալու եք այն ուշադրությունը, որին իրապես արժանի եք», -ընդգծել է նա։ 

Իր հերթին ԱՄՆ պետական քարտուղար Մարկո Ռուբիոն ներկա փուլը կոչել է նոր դարաշրջան՝ ԱՄՆ-ի և Կենտրոնական Ասիայի պետությունների հարաբերություններում։ Նրա խոսքով՝ ներկայում Միացյալ Նահանգների շահերը համընկնում են միջինասիական գործընկերների շահերի հետ, ուստի անհրաժեշտ է խորացնել հարաբերությունները։ 

«Մեր կողմից մենք փնտրում ենք հնարավորություններ, որպեսզի ամերիկյան նորարարությունները, բիզնեսը և արտադրանքը դուրս գան նոր շուկաներ, քանի որ դա ամրապնդում է երկրների միջև կապերը։ Իսկ ձեր կողմից դուք ցանկանում եք օգտագործել Աստծո կողմից տրված մարդկային և բնական ներուժը՝ տնտեսությունը դիվերսիֆիկացնելու համար՝ չլինելով միայն հումքի կամ էներգիայի աղբյուր, այլ զարգացնելով նոր ճյուղեր և ստեղծելով երկարաժամկետ հնարավորություններ ձեր քաղաքացիների համար», -նշել է նա։