Ներկայացնում ենք տարադրամի փոխարժեքները՝ ըստ rate.am-ի:

ԱՄՆ դոլարի առքի առավելագույն արժեքն է 391 դրամ, վաճառքի նվազագույն արժեքը՝ 395 դրամ:

Եվրոյի առքի առավելագույն արժեքն է 426 դրամ, վաճառքի նվազագույն արժեքը՝ 433 դրամ:

Ռուսական ռուբլու առքի առավելագույն արժեքն է 4․50 դրամ, վաճառքի նվազագույն արժեքը՝ 4.7 դրամ:

Այսօր Սաուդյան Արաբիայում կայացած բանակցություններից հետո Ուկրաինայի և ԱՄՆ-ի պատվիրակությունները հանդես են եկել համատեղ հայտարարությամբ, որում կողմերը հաստատում են, որ առաջիկայում Ուկրաինան և ԱՄՆ-ն կստորագրեն հանքային ռեսուրսների վերաբերյալ համաձայնագիրը․

«Ուկրաինան հայտարարեց, որ պատրաստ է ընդունել ԱՄՆ-ի առաջարկը՝ հաստատելու 30-օրյա անհապաղ և ժամանակավոր հրադադար, որը կարող է երկարաձգվել կողմերի փոխադարձ համաձայնությամբ և ենթակա է Ռուսաստանի Դաշնության ընդունման ու միաժամանակյա իրականացման։ ԱՄՆ-ն կհաղորդի Ռուսաստանին, որ խաղաղության հասնելու համար վճռորոշ գործոնն այդ երկրի փոխադարձ քայլերն են։

Միացյալ Նահանգները անհապաղ կվերացնի հետախուզական տվյալների փոխանակման դադարը և կվերսկսի անվտանգության աջակցության տրամադրումը Ուկրաինային։

Պատվիրակությունները քննարկեցին նաև խաղաղության գործընթացի շրջանակներում մարդասիրական օգնության ջանքերի կարևորությունը, հատկապես նշված հրադադարի ընթացքում։ Դրանք ներառում են ռազմագերիների փոխանակումը, քաղաքացիական ձերբակալվածների ազատումը և բռնի տեղափոխված ուկրաինացի երեխաների վերադարձը։

Վերջում, երկու երկրների նախագահները համաձայնեցին հնարավորինս արագ ստորագրել համապարփակ համաձայնագիր՝ Ուկրաինայի կարևոր հանքային ռեսուրսների զարգացման վերաբերյալ։ Սա կօգնի ընդլայնել Ուկրաինայի տնտեսությունը, փոխհատուցել ԱՄՆ-ի տրամադրած աջակցությունը և երաշխավորել Ուկրաինայի երկարաժամկետ բարօրությունն ու անվտանգությունը»։

«Tesla»-ի և «SpaceX»-ի սեփականատեր Իլոն Մասկը մեկ օրում 29 մլրդ դոլար է կորցրել, երբ «Tesla»-ի բաժնետոմսերի գները նվազել են 15,4%-ով: Այս մասին են վկայում «Bloomberg Billionaires Index»-ի (BBI) տվյալները։

Մարտի 11-ի տվյալների համաձայն` էլեկտրամեքենաներ արտադրող «Tesla»-ի բաժնետոմսերը հասել են 222,15 դոլարի։ Ընդ որում` տարեսկզբից բաժնետոմսերն արդեն իսկ էժանացել են 1,8 անգամ՝ 2024 թվականի ավարտին մեկ բաժնետոմսն արժեր 403,84 դոլար։

Արդյունքում Մասկի կարողությունը մեկ օրում նվազել է 29 մլրդ դոլարով՝ հասնելով 301 մլրդ դոլարի։ Տարեսկզբից միլիարդատերն արդեն կորցրել է իր կարողության 30,5%-ը կամ 132 մլրդ դոլար, ինչի մասին վկայում է «Bloomberg»-ի վարկանիշը։

Այդուհանդերձ, ձեռնարկատերն առաջինն է աշխարհի ամենահարուստ մարդկանց ցանկում։ Մասկի կարողությունն իր գագաթնակետին էր հասել անցյալ տարվա դեկտեմբերին, երբ կազմում էր 486 մլրդ դոլար:

ԱՄՆ նախագահ Դոնալդ Թրամփը հայտարարել է, որ մտադիր է ՌԴ նախագահ Վլադիմիր Պուտինի հետ հեռախոսով քննարկել հրադադարի մասին համաձայնագրի մանրամասները արդեն այս շաբաթ:

Նա նաև նշել է, որ եթե Ռուսաստանը չդադարեցնի ռազմական գործողությունները, ԱՄՆ-ը կշարունակի աջակցել Ուկրաինային և սպառազինություն մատակարարել նրա։

«Եթե Պուտինը համաձայնի հրադադարին, դա կարող է մեռյալ կետից շարժել Ուկրաինայում պատերազմի հետ կապված ամբողջ իրավիճակը: Մենք ցանկանում ենք ավարտել այս պատերազմը»,- ասել է նա։

ԱՄՆ նախագահ Դոնալդ Թրամփը, ըստ ամենայնի, հետ է կանգնել ավելի վաղ հայտարարված կանադական մետաղների մաքսատուրքերը կրկնապատկելու մասին իր խոստումից, որոնք այսօր ցնցել են շուկաները, հայտնում է NBC News-ը։

«Թերևս այդպես է», -պատասխանել է Թրամփը լրագրողների այն հարցին, թե արդյոք նա կնվազեցնի կանադական պողպատի և ալյումինի մաքսատուրքերը, որոնք, ինչպես Թրամփը խոստացել էր, 25- 50 տոկոս կկազմեն:

Մաքսատուրքերի ուժի մեջ մտնելու ժամկետների առնչությամբ ԱՄՆ նախագահն ասել է. «Ես ձեզ կտեղեկացնեմ»։

Ավելի վաղ Թրամփը սպառնացել էր կրկնապատկել կանադական պողպատի և ալյումինի մաքսատուրքերը՝ սկսած չորեքշաբթի օրվանից՝ ի պատասխան Օնտարիոյի՝ նահանգին մատակարարվող էլեկտրաէներգիայի վրա 25 տոկոս մաքսատուրքի սահմանման:

Դա նախորդել էր Օնտարիոյի վարչապետ Դուգ Ֆորդի՝ Կանադայից էլեկտրաէներգիայի ներմուծման հավելավճար սահմանելու խոստումից հրաժարվելուն:

ԱՄՆ Միջազգային զարգացման գործակալության գործադիր տնօրենի պաշտոնակատար Էրիկա Քարը ծառայողական գրագրությամբ հրահանգել է անընդհատ աղալ-մանրացնել և այրել գործակալության Վաշինգտոնի կենտրոնակայանում եղած պաշտոնական թղթե արխիվները:

Լիկվիդացիայի են ենթարկվել նաև գաղտնի պահարաններից և անձնական գործերում առկա նյութերը։ ԱՄՆ ՄԶԳ ղեկավարության այս հրահանգի նամակագրության որոշ մասը Politico-ի ձեռքի տակ են: Գործակալության կենտրոնական գրասենյակի լուծարման արդյունքում ազատված գրասենյակային տարածքը կզբաղեցնեն ԱՄՆ Ներգաղթի և մաքսային մարմինները։

Մերձմոսկովյան շրջանում անօդաչու թռչող սարքի հարձակման հետևանքով երեք մարդ է զոհվել։ Այս մասին հայտնել է Մոսկվայի մարզի Դոմոդեդովո քաղաքային շրջանի ղեկավար Եվգենյա Խրուստալևան Telegram-ի իր ալիքում։

«Քիչ առաջ ինձ տեղեկացրին, որ մահացել է նաև երրորդ տղամարդը։ Բժիշկներն արեցին այն ամենը, ինչ կարող էին», – նշել է նա:

Ավելի վաղ տեղեկություններ էին հաղորդվել երկու զոհի և 18 վիրավորի մասին։

Մինչ այդ Մերձմոսկովյան շրջանի նահանգապետ Անդրեյ Վորոբյովը հայտնել էր, որ ԱԹՍ-ների հարձակման հետևանքով Լենինի քաղաքային շրջանում 1 մարդ է զոհվել, 3-ը՝ վիրավորվել։ Ռամենսկի շրջանում ԱԹՍ-ի բեկորներն ընկել են բազմաբնակարան շենքի վրա, որի բնակարանները վնասվել են, մարդկանց տարհանել են։

Ընդհանուր առմամբ, ուկրաինական ուժերը մարտի լույս 11-ի գիշերը Ռուսաստանի տարածքի վրա են արձակել 337 ԱԹՍ։

Գրենլանդիայում մեկնարկել են խորհրդարանական ընտրությունները։ 31 պատգամավորական մանդատի համար կպայքարեն վեց կուսակցությունների 231 ներկայացուցիչներ։ Քվեարկությանը կմասնակցի կղզու մոտ 40 հազար ընտրող։ Այս մասին հայտնում է BBC-ի ռուսական ծառայությունը։

Ակնկալվում է, որ արդյունքները վճռորոշ նշանակություն կունենան Դանիայի հետ Գրենլանդիայի ապագա հարաբերությունների համար, հատկապես Արկտիկայի նկատմամբ միջազգային հետաքրքրության աճի ֆոնին:

Ներկայում խորհրդարանի մեծամասնությունը՝ 31 մանդատներից 21-ը, վերահսկվում է «Ինուիտ Ատակվատիգիիտ» (Ժողովրդական համայնք) և «Սիումուտ» (Առաջ) կուսակցությունների կոալիցիայի կողմից: Նրանք երկուսն էլ հանդես են գալիս անկախության օգտին, սակայն «Ինուիտ Ատակվատիգիիտ»-ը չի շտապում հանրաքվե անցկացնել, մինչդեռ «Սիումուտ»-ը խոստանում է այն անցկացնել առաջիկա չորս տարվա ընթացքում։

Համաձայն վերջին հարցումների՝ կղզու բնակիչների ավելի քան 80%-ը կողմ է անկախության։ Գրենլանդացիները ցանկանում են անկախանալ Դանիայից, քանի որ դժգոհ են փաստացի գաղութ լինելուց, չնայած որ լայն ինքնավարության իրավունք ունեն:

Դանիան ներքին գործերի կառավարումը վաղուց հանձնել է Գրենլանդիային, սակայն շարունակում է վճարել անվճար կրթության և առողջապահության համար: Պաշտպանությունն ու արտաքին քաղաքականությունը մնում են Կոպենհագենի իրավասության ներքո։ Դանիան տարեկան գրեթե 600 միլիոն եվրո է հատկացնում կղզուն՝ դրանով իսկ փակելով Գրենլանդիայի գանձապետարանի ծախսերի զգալի մասը։

56 700 բնակչություն ունեցող Գրենլանդիան Դանիայի խորհրդարանում երկու ներկայացուցիչ ունի։ 1951 թվականին Վաշինգտոնը և Կոպենհագենը, ի լրումն ՆԱՏՕ-ի դաշինքի պարտավորությունների, ստորագրել են Գրենլանդիայի պաշտպանության պայմանագիրը։ 1979 թվականից Գրենլանդիան ունի իր վարչապետը։

ԱՄՆ նախագահ Դոնալդ Թրամփը նախկինում մի քանի անգամ նշել է, որ Գրենլանդիան պետք է միանա Միացյալ Նահանգներին։ Նա սպառնացել է բարձր առևտրային տուրքեր սահմանել Դանիայի վրա, եթե վերջինս չհրաժարվի կղզուց։ Թրամփը հրապարակայնորեն չէր բացառել նաև կղզին ամերիկյան վերահսկողության տակ վերցնելու համար ռազմական ուժ կիրառելու հնարավորությունը։

Թրամփին գրավում է կղզու պաշտպանական և տնտեսական նշանակությունը։ Գրենլանդիան Եվրոպայից դեպի Հյուսիսային Ամերիկա տանող ամենակարճ ճանապարհն է, նրա ափերն առատ են ձկներով, իսկ ընդերքը հարուստ է օգտակար հանածոներով։

Նույնիսկ իր առաջին նախագահական ժամկետում էր Թրամփն առաջարկել գնել Գրենլանդիան։ Ինչպես այն ժամանակ,  այնպես էլ այժմ, Դանիայի և Գրենլանդիայի իշխանությունները մերժել են այդ գաղափարը։

ԱՄՆ նախագահ Դոնալդ Թրամփը հայտարարել է, որ կգնի նոր Tesla մեքենա՝ ընկերության սեփականատեր Իլոն Մասկին աջակցելու համար։ Այս մասին Թրամփը գրել է իր Truth Social հարթակում։

«Ես վաղն առավոտյան պատրաստվում եմ գնել բոլորովին նոր Tesla՝ ի նշան  վստահության և աջակցության իսկապես մեծ ամերիկացի Իլոն Մասկի: Ինչո՞ւ նա պետք է պատժվի այն բանի համար, որ գործի է դնում իր հսկայական հմտությունները, որպեսզի օգնի ԱՄՆ-ն կրկին հզոր դարձնել», – գրել է ԱՄՆ նախագահը։

Նա ուղերձ է հղել հանրապետականներին, պահպանողականներին և բոլոր ամերիկացիներին՝ նշելով, որ Իլոն Մասկն անում է ամեն ինչ ազգին օգնելու համար և կատարում է «ֆանտաստիկ աշխատանք»:

«Սակայն արմատական ձախ խելագարները, ինչպես հաճախ, փորձում են անօրինական կերպով և դավադրաբար բոյկոտել Tesla-ն՝ աշխարհի մեծ ավտոարտադրողներից մեկին, Իլոնի «երեխային», որպեսզի հարձակվեն և վնաս հասցնեն Իլոնին և այն ամենին, ինչի համար նա պայքարում է։ Նրանք փորձեցին դա անել ինձ հետ 2024 թվականի նախագահական ընտրությունների ժամանակ,  սակայն ի՞նչ ստացվեց», – նշել է Թրամփը:

Մասկի Կառավարության արդյունավետության վարչության (DOGE) գործողությունները, ուղղված կառավարական ապարատի կրճատմանը, ԱՄՆ-ում Tesla-ի դեմ բողոքի ակցիաների պատճառ են դարձել։ Մասկի կարողությունը Tesla-ի բաժնետոմսերի զգալի անկումից հետո ընդամենը մեկ օրում նվազել է 8,8 միլիարդ դոլարով:

Ընկերության բաժնետոմսերի գինը նվազել է այն բանից հետո, երբ Թրամփը նոր մաքսատուրքեր է սահմանել Կանադայից ներկրվող ապրանքների նկատմամբ, որտեղից պահեստամասեր են ներմուծվում, և ավելացրել մաքսատուրքերը Չինաստանից՝ Tesla էլեկտրական մեքենաների երկրորդ ամենամեծ շուկայից ներկրվող ապրանքների նկատմամբ:

Ընդհանուր առմամբ, Մասկի ակտիվները 2024 թվականի դեկտեմբերից նվազել են 121 միլիարդ դոլարով, սակայն նա պետք է կորցնի ևս 116 միլիարդ դոլար՝ մոլորակի ամենահարուստ մարդու կարգավիճակը կորցնելու համար։

Ըստ Bloomberg-ի միլիարդատերերի ինդեքսի՝ աշխարհի ամենահարուստ մարդկանց ցանկում երկրորդ հորիզոնականը զբաղեցնում է Amazon-ի սեփականատեր Ջեֆ Բեզոսը՝ 216 միլիարդ դոլար կարողությամբ։ Նրան հաջորդում է Meta Corporation-ի գործադիր տնօրեն Մարկ Ցուկերբերգը, որի կարողությունը գնահատվում է 211 մլրդ դոլար։

Հռոմի պապ Ֆրանցիսկոսի առողջական վիճակը բարելավվել է և կայուն է, Vatican News-ի փոխանցմամբ՝ հայտնել է Վատիկանի մամուլի ծառայությունը՝ մանրամասնելով, որ պոնտիֆիկոսը հանգիստ է քնել և գնացել է հիվանդանոցում գտնվող մատուռ՝ աղոթելու:

Հիվանդանոցից հայտնել են, որ Հռոմի պապի առողջական իրավիճակի բարելավումը բժիշկներին թույլ է տվել հրաժարվել է կլինիկական պատկետրի զգուշավոր կանխատեսումից:

«Սակայն դեռևս անհրաժեշտ կլինի շարունակել դեղորայքային բուժումը հիվանդանոցային պայմաններում որոշ ժամանակով», - ասվում է հաղորդագրությունում։

Հռոմի պապը հոսպիտալացվել էր փետրվարի 14-ին: Նրա մոտ երկկողմանի թոքաբորբ էր ախտորոշվել: