Մայիսի 11
Հեռու վանեք նեղության ու կասկածի ամեն մի մտածմունք: Մի թողեք, որ դրանք ձեր մտքում մնան անգամ մի րոպե: Ծածկեք ու փակեք ձեր հոգու դռներն ու պատուհանները դրանց ներխուժման դեմ, ինչպես որ ձեր տան դռներն եք փակում գողերի դեմ, որ ներս մտնելով՝ չգողանան ձեր ունեցվածքը:
Ուրախություն, հանգստություն, խաղաղություն. սրանցից ավելի մեծ ի՞նչ գանձեր կարող եք դուք ունենալ: Այս ամենը գողացվում են ձեզնից՝ կասկածամտության, վախի ու հուսահատության պատճառով:
Դիմավորեք յուրաքանչյուր օր սիրով ու խնդությամբ: Դիմավորեք փոթորիկը երես առ երես: Ուրախությունը, խաղաղությունը և Սերը Իմ ամենամեծ պարգևներն են: Ես կամենում եմ, որ դուք այս պահին ու այսուհետ զգաք պաշտպանվածության ու ապահովության հրճվանքը: Այս բանը որևէ մեկը կարող է զգալ բաղձալի նավահանգստում, բայց իրական ուրախությունը և հաղթանակը գալիս է միայն նրանց, ովքեր կարող են այս զգալ, երբ նավարկում են փոթորկահույզ ծովում:
Ասեք՝ Ամեն ինչ լավ է: Ասեք այս ոչ իբրև անիմաստ մի կրկնություն: Օգտագործեք այս բառերը, ինչպես կօգտագործեիք բուժիչ դեղը՝ կտրվածքի կամ վերքի դեպքում. գործածեք այս, մինչև որ թույնը դուրս քաշվի, մինչև որ բժշկվի վերքը, մինչև որ ձեր էությունը համակվի Նոր Կյանքի հրճվանքով: Մի մոռացեք՝ Ամեն ինչ լավ է:
0Comments