Գիտնականները ստեղծել են նյութ, որը թույլ կտա լիցքավորել գաջեթները մարդկային մարմնի ջերմությամբ

^{«ՄԻՍիՍ» Ազգային հետազոտական տեխնոլոգիական համալսարանի մասնագետները ստեղծել են ջերմաէլեկտրական պոլիմերային նյութ նանոխողովակների հիման վրա, որը կարող է կիրառվել լիցքավորող ապարանջան-սարքերի պատրաստման համար, որոնք վերափոխում են մարդու մարմնի ջերմությունը էլեկտրաէներգիայի։ Այս մասին տեղեկացրել է համալսարանի մամուլի ծառայությունը, հաղորդում է ՏԱՍՍ-ը։}

^{Գոյություն ունեցող ջերմաէլեկտրական սարքերը ունենում են ոչ մեծ ՕԳԳ (մոտ 10 տոկոս) եւ մի շարք թերություններ։ Որպես այլընտրանք գիտնականները դիտարկում են պոլիմերային նյութերը, որոնք կարող են աշխատել սենյակային ջերմաստիճանում, ի հաշիվ ճկունության դրանց կարելի է տալ ցանկացած ձեւ, դրանք թունավոր չեն եւ ցածր ջերմահաղորդ են, ինչը խանգարում է կորուստներին էներգիայի փոխակերպման ժամանակ։ Հետազոտության հեղինակները ստեղծել են պոլիմերային նյութ նանոխողովակների հիման վրա, որն ապագայում կարող է կազմել հեռախոսների լիցքավորման ապարանջան-սարքերի հիմքը։ Այն մարդկային մարմնի ջերմությունը փոխարկում է էլեկտրաէներգիայի։}

^{«Համալսարանի գիտնականները Լուլելոյի (Շվեդիա) եւ Ենի Ֆրիդրիխ Շիլլերի անվան համալսարանի (Գերմանիա) գործընկերների հետ համատեղ  մշակել են աշխարհում առաջին ջերմաէլեկտրական նյութը նանոխողովակներով։ Այն ճկուն է, մի քանի անգամ բարձրացնում է էլեկտրահաղորդականությունը։ Ապագայում այդ նյութը կարելի կլինի կիրառել բջջային սարքերի լիցքավորման համար հենց մարդկային մարմնի ջերմությունից»,- ասվում է հաղորդագրությունում։}

^{Գիտնականները նանոխողովակներն ստացել են կիսահաղորդչային հիմքից եւ մակերեսին լցրել պոլիմեր, ինչից հետո հավասարեցրել են խողովակների կուտակման մասերը ի հաշիվ հավելյալ մշակման։ Որպես հիմք հետազոտության հեղինակներն օգտագործել են ամենահեռանկարային պոլիմերներից մեկը՝ պոլիէթիլենդիօքսիտիոֆենը, որը ոչ միայն էլեկտրահաղորդականությամբ է ուժեղ, այլեւ կարող է լրացուցիչ ուժեղացնել այդ ցուցանիշը քիմիական միացություններում ավելացվելիս։}

^{«Հետազոտության մասնակից Հաբիբ Յուսուպովի խոսքով՝ նյութի այդ բնութագրերը կարող են թույլ տալ վերափոխել անգամ մարդկային մարմնի ջերմությունը (սենյակային ջերմաստիճանի համեմատ) օգտակար էլեկտրաէներգիայի։ Օրինակ, նման նյութից ժամացույցի համար ապարանջան կամ բջջային հեռախոսի համար տոպրակ սարքելով՝ կարելի կլինի սարքը մշտապես, առանց էլեկտրաէներգիայի աղբյուրի, սնուցել»,- ասվում է հաղորդագրությունում։}

^{Աշխատանքի արդյունքների մասին հոդվածը հրապարակվել է Advanced Functional Materials ամսագրում։}