Միացյալ Նահանգները և Իրանը շաբաթ օրը Հռոմում անցկացրել են բանակցությունների երկրորդ փուլը Թեհրանի արագ ընդլայնվող միջուկային ծրագրի շուրջ, հաղորդում է CBS News-ը՝ վկայակոչելով Վաշինգտոնի պաշտոնյաներին:
ԱՄՆ-ի հատուկ բանագնաց Սթիվ Ուիտկոֆը Հռոմի Կամիլուչա շրջանում՝ Օմանի դեսպանատանը, հանդիպել է Իրանի արտաքին գործերի նախարար Աբաս Արաղչիի հետ: Բանակցությունները տեղի են ունեցել Օմանի արտգործնախարար Բադր ալ Բուսաիդիի միջնորդությամբ։
«Այսօր Հռոմում, մեր բանակցությունների երկրորդ փուլի ընթացքում, որը տևել է ավելի քան չորս ժամ, դրական առաջընթացի ենք հասել մեր ուղղակի և անուղղակի քննարկումներում», - CBS News-ին է ասել ամերիկացի պաշտոնյան:
«Մենք պայմանավորվել ենք կրկին հանդիպել հաջորդ շաբաթ և երախտապարտ ենք մեր օմանցի գործընկերներին այս բանակցությունները կազմակերպելու համար, ինչպես նաև մեր իտալացի գործընկերներին՝ այսօր մեզ հյուրընկալելու համար», - ավելացրել է նա:
Ավելի վաղ Իրանի արտգործնախարար Աբաս Արաղչին հայտարարել էր, որ Իրանի և ԱՄՆ-ի պատվիրակությունները պայմանավորվել են փորձագիտական մակարդակով տեխնիկական բանակցությունների նոր փուլի շուրջ, որը պետք է անցկացվի Օմանում ապրիլի 23-ին։
Նախարարը հայտարարել է, որ պատվիրակություններին հաջողվել է հասնել ավելի լավ փոխըմբռնման մի շարք սկզբունքների և նպատակների շուրջ։
Նա ասել է, որ փորձագետները կաշխատեն գործարքի մանրամասների վրա:
Արտաքին գործերի նախարարը նշել է, որ գլխավոր բանակցողները կհանդիպեն շաբաթ օրը, որպեսզի գնահատեն փորձագետների հանդիպումների արդյունքները և արձանագրեն, թե որքանով են նրանք մոտ համաձայնությանը։
0Comments