Ստամբուլի կալանավորված քաղաքապետը X սոցիալական ցանցում գրառում է կատարել՝ թուրք ժողովրդին պայքարի կոչ անելով։
Իմամօղլուն իր դեմ հարուցված քրեական գործը անվանել է «մեծ դավաճանություն»։
«Սա իսկական արտադատական մահապատիժ է։ Կոչ եմ անում մեր ժողովրդին պատասխանատվությամբ պայքարել իր իրավունքների համար։ Մարդու իրավունքների համար այս պայքարը մեր պետության և մեր երեխաների ապագայի հարցն է։ Այսօր անպայման քվեարկեք հանուն Թուրքիայի ապագայի։ Ապա բարձրացրեք ձեր ձայնը՝ հավաքվելով Սարաչենի, Ստամբուլի և այլ նահանգների ժողովրդավարության հրապարակներում։ Սա պատասխանատվություն ստանձնելու և ազգի կամքը գողացողների դեմ իրավունքների համար պայքարին միանալու օրն է։ Բոլորը միասին՝ ոչ մեկին հետևում չթողնելով»,- նշել է նա։
Ավելի վաղ Թուրքիայում դատարանը որոշում էր կայացրել կալանավորել Իմամօղլուին։
Չորեքշաբթի օրը Ստամբուլի գլխավոր դատախազությունը հայտնել էր, որ ձերբակալել է քաղաքի ընդդիմադիր քաղաքապետ Էքրեմ Իմամօղլուին կոռուպցիայի, կաշառակերության և կաշառման մեջ ներգրավված կազմակերպության գործով։ Ինքը՝ քաղաքական գործիչը, հայտարարել է, որ «մտադիր չէ տեղի տալ» իշխանությունների ճնշմանը։ Դրանից հետո ամբողջ երկրում բողոքի ցույցեր են սկսվել։
Ավելի վաղ ընդդիմադիր Ժողովրդահանրապետական կուսակցությունը (ԺՀԿ) սկսել էր նախագահական փրայմերիզներ անցկացնել՝ Իմամօղլուին որպես նախագահի թեկնածու աջակցելու համար՝ չնայած նրա ձերբակալմանը։
Կուսակցությունը նաև ամբողջ երկրում խորհրդանշական քվեատուփեր, այսպես կոչված, «համերաշխության քվեատուփեր» է տեղադրել, որպեսզի անկուսակցականները կարողանան իրենց աջակցությունը հայտնել քաղաքապետին:
0Comments