Թուրքական ընդդիմությունը հայտարարել է, որ հավաքել է ավելի քան 10 մլն ստորագրություն՝ ի աջակցություն արտահերթ նախագահական ընտրությունների և ձերբակալված քաղաքապետ Էքրեմ Իմամօղլուին ազատ արձակելու: Այս մասին, ինչպես հաղորդում է Halk TV -ն, Սամսուն նահանգում հանրահավաքի ժամանակ հայտարարել է հիմնական ընդդիմադիր Ժողովրդահանրապետական կուսակցության առաջնորդ Օզգյուր Օզելը:
«Շաբաթ երեկոյի դրությամբ արտահերթ ընտրությունների անցկացման համար ստորագրությունների թիվը գերազանցել է 10 միլիոնը: Սակայն մենք ավելի մասշտաբային նպատակ ունենք և միասին կհասնենք դրան», - հեռուստաալիքը մեջբերում է նրա խոսքը:
Թուրքիայում արտահերթ ընտրությունների համար ստորագրահավաքի արշավը մեկնարկել է մարտի 30-ին Տրապիզոն նահանգում, որտեղ ծնվել է Ստամբուլի ձերբակալված քաղաքապետ Էքրեմ Իմամօղլուն: Այդժամանակ էլ հայտարարվել է 28 միլիոն ստորագրություն հավաքելու պլանների մասին, ինչը մի փոքր ավելին է, քան այն ձայների քանակը, որոնք Թուրքիայի գործող նախագահ Ռեջեփ Թայիփ Էրդողանը հավաքել էր 2023 թ-ի մայիսին կայացած ընտրություններում։
Թուրքիայում նախագահական ընտրությունները նախատեսված են 2028 թ-ին, սակայն ընդդիմությունը պնդում է, որ արտահերթ ընտրություններ անցկացվեն:
Աղբյուրը՝ Live24.am
0Comments