Չինաստանի իշխանությունները երկրի ավիաընկերություններից պահանջել են դադարեցնել Boeing ինքնաթիռների, մասերի և սարքավորումների մատակարարումը ԱՄՆ-ի հետ առևտրային պատերազմի շրջանակներում, հայտնում է Bloomberg-ը՝ հղում անելով աղբյուրներին։
Պատվերը տրվել է ընկերություններին այն բանից հետո, երբ անցյալ շաբաթ Չինաստանը հայտարարեց ամերիկյան ապրանքների համար 125% պատասխան մաքսատուրքերի մասին, հայտնում է DW-ն։ Ինչպես նշում է Bloomberg-ը, միայն այդ մաքսատուրքերը կկրկնապատկեն ԱՄՆ-ում արտադրված ինքնաթիռների և մասերի արժեքը՝ անհնարին դարձնելով չինական ավիաընկերությունների կողմից Boeing-ից գնելը:
Պեկինը նաև դիտարկում է ուղիներ՝ աջակցելու այն փոխադրողներին, որոնք վարձակալում են Boeing ինքնաթիռներ և բախվում են ավելի մեծ ծախսերի, գրում է գործակալությունը։ Aviation Flights Group-ի տվյալներով՝ մոտ տասը Boeing 737 Max ինքնաթիռներ պատրաստվում են մուտք գործել չինական ավիաընկերությունների պարկ, գրում է Bloomberg-ը։
Չինական փոխադրողները դեռ կարող են ընդունել դրանցից մի քանիսը, քանի որ նրանց համար փաստաթղթերը տրվել են մինչև չինական տուրքերի ուժի մեջ մտնելը, ասել է գործակալության աղբյուրը։
Աղբյուրը՝ Live24.am
0Comments