ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը բացատրել է, թե ինչու էր Ռուսաստանի առաջնորդը «խաղադրույք կատարել» ԱՄՆ ներկայիս նախագահ Ջո Բայդենի թեկնածու Քամալա Հարիսի վրա։
Այս մասին նա ասել է «Մոսկվա, Կրեմլ, Պուտին» հաղորդաշարի հեղինակ և վարող Պավել Զարուբինին` պատասխանելով հարցին, թե ինչու նախագահ Պուտինի խաղադրույքը Բայդենի թեկնածուի վրա չի աշխատել:
«Մի բան է խաղադրույք կատարել տիկին Հարիսի կամ Բայդենի վրա, որտեղ ամեն ինչ բավականին կանխատեսելի է, այդ գիծը նրանք կզբաղեցնեն մինչև այն պահը, երբ լքեն Սպիտակ տունը։ Պարոն Թրամփն այս առումով քիչ կանխատեսելի է, նաև քիչ կանխատեսելի է, թե որքանով նա հավատարիմ կմնա այն հայտարարություններին, որոնք արել է նախընտրական քարոզարշավի ընթացքում: Ուստի եկեք սպասենք, և մենք միասին տեսնենք ամեն ինչ` այդ ընթացքում զբաղվելով մեր գործերով», - պատասխանել Է Պեսկովը։
Պեսկովը, մեկնաբանելով Ռուսաստանի հետ երկխոսություն սկսելու ԱՄՆ-ի պատրաստակամության մասին ազդակները, ասել է, որ առնվազն ԱՄՆ նախագահական ընտրություններում հաղթած Դոնալդ Թրամփը չի խոսում Ռուսաստանի հետ առճակատման մասին։
Նա նշել է, որ Թրամփը նախընտրական քարոզարշավի ժամանակ ասել է, որ կարող է գործարք կնքել, որը բոլորին կտանի դեպի խաղաղություն։ Համենայնդեպս, նա խոսում է խաղաղության մասին, չի խոսում առճակատման, Ռուսաստանին ռազմավարական պարտություն հասցնելու ցանկության մասին։
Նրա խոսքով՝ Թրամփի նման հայտարարությունները իրեն շահեկանորեն տարբերում են ամերիկյան ներկայիս վարչակազմի հայտարարություններից։
Պեսկովը նաև նշել է, որ ԱՄՆ-ում նախագահական ընտրությունները դժվար թե ազդեցություն ունենան աշխարհի ապագայի վրա։
0Comments