ԱՄՆ նորընտիր նախագահ Դոնալդ Թրամփը շաբաթ օրը հայտարարել է, որ Նիկի Հեյլին, որը ՄԱԿ-ում ԱՄՆ դեսպանն էր իր առաջին ժամկետում, իսկ հետո հանրապետական կուսակցությունից իր դեմ առաջադրվեց ընտրությունների այդ փուլում, չի հրավիրվի միանալու իր վարչակազմին:
Նա նաև ասել է, որ Մայք Պոմպեոն, որը Թրամփի առաջին ժամկետի ընթացքում զբաղեցրել է պետքարտուղարի և ԿՀՎ տնօրենի պաշտոնը, նույնպես չի ընդգրկվի իր կաբինետում:
«Ես չեմ հրավիրի նախկին դեսպան Նիկի Հեյլիին կամ նախկին պետքարտուղար Մայք Պոմպեոյին միանալ Թրամփի վարչակազմին, որն այժմ իր ձևավորման փուլում է։ Ինձ շատ է դուր եկել նախկինում նրանց հետ աշխատելը և ցանկանում եմ շնորհակալություն հայտնել նրանց մեր երկրին մատուցած ծառայության համար»,- գրել է Թրամփը։
52-ամյա Հեյլին առաջադրվել է հանրապետական կուսակցության կողմից 2016 թվականին, սակայն աջակցել է Ֆլորիդայի սենատոր Մարկո Ռուբիոյին՝ ընտրություններին մասնակցելուց հրաժարվելուց հետո:
Սակայն Թրամփն, այնուամենայնիվ, նրան նշանակեց ՄԱԿ-ում իր մշտական ներկայացուցիչ, և այդ պաշտոնը նա զբաղեցրեց մինչև 2018-ի իր հանկարծակի հրաժարականը:
Հեյլին չի առաջադրվել 2020 թվականի նախագահական ընտրություններում, սակայն իր թեկնածությունն առաջադրեց նախկին ղեկավարի դեմ 2024 թվականի ընտրություններում։ Նա դադարեցրեց իր քարոզարշավը մարտի Սուպեր երեքշաբթիից հետո: Բայց միայն երկու ամիս անց, երբ հուլիսին ելույթ ունեցավ Միլուոկիում Հանրապետականների ազգային համագումարի ժամանակ, նա աջակցություն հայտնեց Թրամփին: Այն ժամանակ նա ասաց, որ Թրամփը խնդրել է իրեն ելույթ ունենալ՝ «միասնություն դրսևորելու համար»:
Սեպտեմբերին CBS News-ին տված հարցազրույցում Հեյլին ասաց, որ «100%-ով համաձայն չէ Թրամփի հետ»:
Պոմպեոն, որը նույնպես աջակցում էր Թրամփին, պաշտոնավարեց Թրամփի առաջին վարչակազմի բոլոր չորս տարիների ընթացքում։ Նա որոշեց չառաջադրվել Թրամփի դեմ 2024 թվականին։ Թրամփը ուրբաթ հայտարարեց, որ իր նախընտրական շտաբի համանախագահ Սյուզի Ուայլսին նշանակել է Սպիտակ տան աշխատակազմի ղեկավար՝ դարձնելով նրան պատմության մեջ այդ պաշտոնը զբաղեցրած առաջին կինը: Սա նրա առաջին խոշոր կադրային որոշումն էր Սպիտակ տանը՝ նախագահական ընտրություններում ԱՄՆ փոխնախագահ Քամալա Հարիսին հաղթելուց հետո։
0Comments